დღეს მშვიდობის საბჭომ ისტორიულ შეთანხმებას მიაღწია „ჰამასის" და ღაზაში მოქმედი ყველა სხვა შეიარაღებული დაჯგუფების სრული განიარაღების შესახებ, - ამის შესახებ აშშ-ის პრეზიდენტი დონალდ ტრამპი სოციალურ ქსელში წერს. მისი განცხადებით, ეს არის მონუმენტური ნაბიჯი მდგრადი მშვიდობისა და უსაფრთხოებისკენ.

„ეს შეთანხმება კრიტიკული ნაბიჯია იმისკენ, რომ ღაზას საბოლოოდ მართავდეს პალესტინის ახალი მთავრობა, რომელიც მჭიდროდ ითანამშრომლებს მშვიდობის საბჭოსთან პალესტინელი ხალხის დასახმარებლად. ამავდროულად, ისრაელს ექნება ის უსაფრთხოება, რასაც იმსახურებს. ღაზას ტერორისტული თავდასხმების ბაზად აღარ გამოიყენებენ", - აცხადებს ტრამპი.

მისი თქმით, ეს არის მნიშვნელოვანი ეტაპი ტრამპის 20-პუნქტიანი გეგმის განხორციელებაში.

„შეთანხმება შესრულდება ფრთხილად სტრუქტურირებულ ეტაპებად. განიარაღების დასრულების შემდეგ, ისრაელის ძალები გავლენ და საერთაშორისო სტაბილიზაციის ძალები იმუშავებენ პალესტინის ახალ საპოლიციო ძალებთან ერთად, რათა აიღონ პასუხისმგებლობა ღაზას უსაფრთხოებაზე მისი მაცხოვრებლებისა და მეზობლებისთვის", - წერს ტრამპი.

აშშ-ის პრეზიდენტი მადლობას უხდის შუამავალ ქვეყნებს - ეგვიპტეს, კატარსა და თურქეთს. „მინდა მადლობა გადავუხადო შუამავლებს - ეგვიპტეს, კატარსა და თურქეთს - მათი მნიშვნელოვანი ძალისხმევისთვის და განსაკუთრებით ჩემს გამორჩეულ გუნდს, რომელთა დაუღალავმა შრომამ შესაძლებელი გახადა ეს ისტორიული გარღვევა. საფრთხე, რომელიც 7 ოქტომბერს ღაზადან გაჩნდა, აღარ აღდგება! ამ შეთანხმების თანახმად, ღაზა საბოლოოდ პალესტინის ახალი მთავრობის ხელში აღმოჩნდება, რომელიც თავის ხალხს ემსახურება", - წერს ტრამპი.

„ბი-ბი-სი" აცხადებს, რომ „ჰამასის" მაღალჩინოსანმა მათთან საუბარში აღნიშნა, რომ ოფიციალური განცხადება მალე გამოქვეყნდება.

ამ განცხადებას საერთაშორისო პოლიტიკურ და უსაფრთხოების ექსპერტთა წრეებში დიდი გამოხმაურება მოჰყვა. ანალიტიკოსების შეფასებები იყოფა სიფრთხილით აღსავსე ოპტიმიზმსა და სერიოზულ სკეპტიციზმს შორის, რადგან მსგავსი მასშტაბის შეთანხმებების მთავარი გამოწვევა ყოველთვის პრაქტიკული აღსრულებაა. მთავარი კითხვაა, როგორ მოხდება იარაღის ჩაბარება და ვინ გააკონტროლებს პროცესს?

ექსპერტები აღნიშნავენ, რომ „ჰამასისა" და განსაკუთრებით უფრო რადიკალური დაჯგუფებების (მაგ. „ისლამური ჯიჰადი") სრული განიარაღება ქაღალდზე გაცხადებულ დაპირებაზე ბევრად რთულია. არსებობს რისკი, რომ ცალკეულმა ფრაქციებმა იარაღისა და მიწისქვეშა ტუნელების ნაწილი მალულად შეინარჩუნონ. ანალიტიკოსები სვამენ კითხვას - ვინ ითავებს ღაზას ადმინისტრირებას? მათი აზრით, თუ ახალი მმართველობა აღქმული იქნება როგორც „გარედან მოხვეული", მას შესაძლოა ადგილობრივ მოსახლეობაში ლეგიტიმაციის პრობლემა შეექმნას.

ამასთან, „ჰამასის" პოლიტიკური ფრთის როლი გაურკვეველი რჩება - დათმობს თუ არა ორგანიზაცია სამოქალაქო მმართველობასაც, თუ მხოლოდ სამხედრო ფრთის დაშლას დათანხმდა.

ანალიტიკოსების შეფასებით, ვინაიდან შეთანხმება „ფრთხილად სტრუქტურირებულ ეტაპებად" უნდა განხორციელდეს, ნებისმიერმა პროვოკაციამ ან შეფერხებამ (მაგალითად, ცალკეული ჯგუფის მიერ ცეცხლის გახსნამ) შესაძლოა მთლიანი პროცესის ჩაშლა და ისრაელის ჯარების გასვლის შეჩერება გამოიწვიოს. ამასთან, ექსპერტები თანხმდებიან, რომ ამ სამი ქვეყნის ჩართულობა საკვანძოა: კატარსა და თურქეთს აქვთ ფინანსური და პოლიტიკური ბერკეტები „ჰამასის" ხელმძღვანელობაზე. ეგვიპტე წარმოადგენს უსაფრთხოებისა და საზღვრის კონტროლის მთავარ გარანტს. თუმცა, ანალიტიკოსების თქმით, მათი გარანტიების რეალური ძალა სწორედ განიარაღების პროცესში გამოჩნდება.