გორში 26 სექტემბერს დაგეგმილი „კამარა ფესტივალი", რომლის ფარგლებში ექსპერიმენტული მუსიკოსის ალექსანდრე კორძაიას, იგივე „კორძის", კონცერტიც უნდა გამართულიყო, უსაფრთხოების მიზეზით გადაიდო.

ფესტივალის ორგანიზატორმა, დანიის კულტურის ინსტიტუტმა, გადაწყვეტილების მიზეზად უსაფრთხოების საკითხები დაასახელა. თავად კორძაია კი აცხადებს, რომ ღონისძიების გაუქმებას წინ უძღოდა მმართველი პარტიის წარმომადგენლებისა და ხელისუფლებისადმი ლოიალური მედიის მხრიდან მის წინააღმდეგ წარმოებული კამპანია. მუსიკოსის თქმით, გორის მუნიციპალიტეტმა ღონისძიების მასპინძელ სივრცეს მისი კონცერტის ჩატარების შემთხვევაში „გაბრაზებული ხალხის" მობილიზებით დაემუქრა.

დანიის კულტურის ინსტიტუტმა 23 სექტემბერს განაცხადა: „უსაფრთხოების მიზნებიდან გამომდინარე, „კამარა ფესტივალი" დაგეგმილი სახით ვერ ჩატარდება და, შესაბამისად, ის გადაიდო".

• „კორძი" ამბობს, რომ გორის მუნიციპალიტეტი ღონისძიების მასპინძელ სივრცეს „გაბრაზებული ხალხის" მობილიზებით დაემუქრა, თუ მისი გამოსვლა არ გაუქმდებოდა. „ეს მოხდა სამთავრობო მედიისა და პარლამენტის მხრიდან ერთკვირიანი შეუფერებელი თავდასხმების შემდეგ"

ფესტივალის გადადების შესახებ ინფორმაცია სხვა მედიასაშუალებებმაც გაავრცელეს.

ალექსანდრე კორძაიამ ფესტივალის გადადების შემდეგ სოციალურ ქსელში დაწერა, რომ ორგანიზატორებისგან უფრო მეტ მხარდაჭერას ელოდა. მისი თქმით, გორის მუნიციპალიტეტი ღონისძიების მასპინძელ სივრცეს „გაბრაზებული ხალხის" მობილიზებით დაემუქრა, თუ მისი გამოსვლა არ გაუქმდებოდა. „ეს მოხდა სამთავრობო მედიისა და პარლამენტის მხრიდან ერთკვირიანი შეუფერებელი თავდასხმების შემდეგ", - წერს მუსიკოსი.

კორძაია ასევე აკრიტიკებს ღონისძიების სპონსორებს - ევროკავშირს, გოეთეს ინსტიტუტსა და დანიის კულტურის ინსტიტუტს - და აცხადებს, რომ მათგან ასეთ ვითარებაში უფრო მკაფიო მხარდაჭერას ელოდა. ამბობს, რომ მმართველი პარტიის მიერ მისი კონცერტის გაუქმება ახალი შემთხვევაა და ორგანიზატორებისგან „მცირედი მხარდაჭერა" მაინც კარგი იქნებოდა.

რატომ დაუპირისპირდა „ქართული ოცნება" კორძაის

კორძაიას წინააღმდეგ ბოლო დღეებში გაკეთებულ განცხადებებს უკავშირებენ მის მიერ ადრე გამოქვეყნებულ სიმღერას „ოლე ოლა", რომელიც ხელისუფლების მხარდამჭერებმა შეურაცხყოფად შეაფასეს.

„ქართული ოცნების" წარმომადგენლების მხრიდან კრიტიკის შემდეგ ფესტივალის ორგანიზატორებისა და ევროპული ინსტიტუტების მისამართითაც გაჩნდა კითხვები. პარლამენტის თავმჯდომარემ „ფაშისტების დაფინანსებაში“ უშუალოდ ევროკავშირის ელჩი პაველ ჰერჩინსკი დაადანაშაულა. თქვა, რომ „ევროკავშირი ფულს უხდიდა საქართველოს მოსახლეობის უმრავლესობის მაგინებელს“ და მისი დაფინანსებით იყო დაკავებული.

„ამდენი წელია [ჰერჩინსკი] საქართველოშია და წარმოდგენა არ აქვს, რას ნიშნავს საქართველო და ქართული საზოგადოება. ეს არის დაცინვა. პაველ ჰერჩინსკი გვეუბნება, რომ საქართველოს მოსახლეობისთვის დედის გინება ქართული კულტურული მემკვიდრეობაა. გვეუბნება, რომ მონის წოდება ან ფაშიზმი საქართველოს კულტურული მემკვიდრეობაა. პაველ ჰერჩინსკის თუ ქართველები ფაშისტები ვგონივართ და ქართველებისთვის საჯაროდ დედის გინება მოსულა, მაშინ ამ ადამიანს მართლა ვერაფერი გაუგია. თუ მისი სტანდარტია, რომ გამოხატვის სტანდარტია დედის გინება, ამას მხედველობაში მივიღებთ, რომ დედის გინება ევროპული სტანდარტი ყოფილა“, – განაცხადა პაპუაშვილმა.

„არ შეიძლება, ევროკავშირი და დანია აფინანსებდნენ ისეთ ფესტივალს, სადაც მთავარი მოქმედი პირი იქნება ადამიანი, რომელიც გამოირჩეოდა იმით, რომ 1 200 000-ზე მეტ ადამიანს აყენებდა ყველაზე მძიმე ფორმით შეურაცხყოფას", - განაცხადა ქადაგიშვილმა.

მისივე თქმით, ევროკავშირსა და დანიას მისთვის დასმულ კითხვებზე კონკრეტული პასუხები არ გაუციათ და საბოლოოდ მათ „უხერხულ მდგომარეობას თავი აარიდეს".

„ქართული ოცნების" დეპუტატმა თორნიკე ჭეიშვილმა კი კორძაის კონცერტი „რადიკალიზმის წახალისებად" და „საზოგადოებაში პოლარიზაციის გაღვივების ხელშეწყობად" შეაფასა.

„აღნიშნული პირის მხრიდან ადგილი ჰქონდა ფართო საზოგადოებრივი ჯგუფების პირდაპირ მძიმე შეურაცხყოფას და, რა თქმა უნდა, როდესაც ახლა კონკრეტული დიპლომატიური მისიები ახდენენ ერთგვარ წახალისებას ამ ე.წ. მუსიკოსისა, რა თქმა უნდა, ისინი ამით ცდილობენ, როგორც ჩანს, რომ ცეცხლზე ნავთი დაასხან", - თქვა ჭეიშვილმა.

2025 წლის ინციდენტი

ფესტივალის უსაფრთხოებასთან დაკავშირებული საკითხების კონტექსტში ასევე იხსენებენ 2025 წლის ივლისში თბილისში მომხდარ ინციდენტს, რომლის მონაწილეებიც კორძაია და ძმები ფეიქრიშვილები იყვნენ.

გავრცელებული ინფორმაციით, დაპირისპირება რუსთაველის გამზირზე, შუქნიშანთან, ავტომობილებით გადაადგილებისას მომხდარი ინციდენტის შემდეგ დაიწყო და ფიზიკურ კონფლიქტში გადაიზარდა.

თუმცა, ამ ფაქტის დეტალები სხვადასხვა წყაროში განსხვავებულად არის აღწერილი და აღნიშნული გარემოებები ცალკე გადამოწმებას საჭიროებს.

კორძაიას თქმით, გორში კონცერტის დაგეგმვის შემდეგ მას და ორგანიზატორებს ადგილობრივი პირებისგან გაფრთხილებები და მუქარა ჰქონდათ, რომ ღონისძიების ჩატარების შემთხვევაში შესაძლოა პროვოკაცია და ფიზიკური დაპირისპირება მომხდარიყო.

სწორედ შესაძლო ინციდენტებისა და მაყურებლების უსაფრთხოების დაცვის საკითხი დაასახელა ორგანიზატორმა ფესტივალის გადადების მიზეზად.

რას ამბობს ევროკავშირი

ფესტივალის გადადებას 24 სექტემბერს საქართველოში ევროკავშირის წარმომადგენლობაც გამოეხმაურა.

ევროკავშირის წარმომადგენლობამ განაცხადა, რომ სინანულს გამოთქვამს იმის გამო, რომ „კრეატიული კომპასი საქართველოს" პროექტის ფარგლებში დაგეგმილი ფესტივალის გადადება უსაფრთხოებასთან დაკავშირებული მოსაზრებების გამო გახდა საჭირო.

„კამარა ფესტივალი" დანიის კულტურის ინსტიტუტის მიერ ევროკავშირის მიერ დაფინანსებული ოთხწლიანი, 2023-2027 წლების პროექტის ფარგლებში ტარდება და მას საქართველოს გოეთეს ინსტიტუტი თანადაფინანსებას უწევს.

ფესტივალის ორგანიზატორებს ამ ეტაპზე არ განუმარტავთ, კონკრეტულად რა უსაფრთხოების რისკები გახდა ღონისძიების გადადების მიზეზი.