სოფელ თვალივში მეწყერი ჩამოწვა - დუშეთის მუნიციპალიტეტში დატბორილია სახლები, განადგურებულია მოსავლის ნაწილი და დაზიანებულია გზები.  მოსახლეობას დაუზიანდა საკარმიდამო ნაკვეთებიც. 

ძლიერი წვიმის გამო ღამით მდინარე ადიდდა და მთაში დაგუბდა - ქვა-ღორღი მთიდან სოფელშია ჩამოტანილი. მოსახლეობა ღამით დახმარებას ითხოვდა, მაგრამ მაშველები მათთან დროულად მისვლას ვერ ახერხებდნენ, რადგან ჟინვალი-ბარისახო- შატილის გზაზ, რომელიც მათ უნდა გაევლოთ, ჩახერგილი იყო.  

„სადღაც 20:15 საათზე დაიწყო პატარა სეტყვა, მერე დაიწყო ძალიან ძლიერი წვიმა. ეს მოვარდნა კიდე 21:30-ზე იყო. ძალიან დიდი ხამა იყო. 23-24 საათზე ყველამ გამოვიფხიზლეთ დიდიან-პატარიანად და გარეთ გამოვედით. გადავედით ისეთ ადგილას, სადაც უსაფრთხო იყო. სამაშველო გამოვიძახეთ, მაგრამ იქითკენ მეწყერი იყო ჩამოსული და ვერ მოდიოდნენ. წყალი შემოგვივიდა სახლებში, მაღაზიებში. ახალი გაკეთებული რემონტი გაგვიფუჭა“, - ამბობს მოსახლე. 

სოფელ თვალივში ცენტრალურ გზებში ამ წუთებში გაწმენდითი სამუშაოები მიმდინარეობს. თუმცა,  ოჯახთან მძმე ტექნიკა ჯერ არ ასულა და სოფლის მაცხოვრებლებს თავიანთი სახსრებით უწევთ პრობლემებთან გამკლავება.