მომხმარებლების დიდი რაოდენობა „ჯორჯიან უოთერ ენდ ფაუერსს“ უჩივის. 2023 წელს სემეკში შესული საჩივრების 85% სწორედ ამ კომპანიაზე მოდის და მათგან თითქმის ყოველი მეორე დაკმაყოფილდა. ენერგოომბუსდმენმა იმ ხარვეზებზე ისაუბრა, რომელსაც „ჯივიპი“ თითქმის მუდმივად აქვს ხოლმე. 

2023 წელს სემეკის აპარატის მომხმარებელთა საჩივრების დეპარტამენტმა ყველაზე მეტი განაცხადი წყალმომარაგების სექტორთან დაკავშირებით მიიღო, რაც „ჯორჯიან უოთერ ენდ ფაუერთან" დაკავშირებულ მაღალ მიმართვიანობას უკავშირდება.

სემეკის წლიური ანგარიშის მიხედვით, ელექტროენერგეტიკის, ბუნებრივი გაზის და წყალმომარაგების სექტორების კომპანიებს შორის მომხმარებლები ყველაზე ხშირად სწორედ „ჯორჯიან უოთერ ენდ ფაუერთან" დავობენ. გასულ წელს სასმელი წყლისა და წყალარინების სექტორში სადავო საკითხები იყო კომპანიის მხრიდან ხანდაზმული დავალიანების გადახდის მოთხოვნა, მომხმარებლებზე პირობითი დარიცხვები. ასევე ჩვენებების არადროული აღება და გამანაწილებელ ქსელთან ახალი მომხმარებლის მიერთებასთან დაკავშირებული საკითხები.

სექტორში სადავო საკითხებთან დაკავშირებით სემეკის აპარატის მომხმარებელთა საჩივრების დეპარტამენტში 1 333 განცხადება/საჩივარი შევიდა, რომელთა 85% „ჯორჯიან უოთერ ენდ ფაუერზე" მოდის.

განხილვის შედეგად სრულად საჩივრების 47% დაკმაყოფილდა. წყალმომარაგების სექტორში მომხმარებლებს 443 336 ლარი ჩამოეწერათ.

„ჯივიპის“ ხარვეზებზე ისაუბრა ენერგოომბუდსმენმა სალომე ვარდიაშვილმა და დაადასტურა, რომ ამ კუთხით სამუშაო ბევრია.

„ჩვენს აპარატში მომხმარებელთა მომართვიანობა ყოველწლიურად მართლაც საკმაოდ მაღალია. დაახლოებით 10 ათასი კონსულტაცია გავიარეთ 2023 წლის განმავლობაში, როგორც ელექტროენერგეტიკის, ისე ბუნებრივი აირისა და წყალმომარაგების მიმართულებით. 

წყალმომარაგება პრობლემურია როგორც რეგიონებში, ისე დედაქალაქში. თბილისში „ჯორჯიან ოუთერ ენდ ფაუაერი“ ოპერირებს და მათი მიმართულებით ძირითადი საჩივარი მოდის მომსახურებაზე, რაც მოიცავს მომსახურების ხშირ შეწყვეტას, აღდგენის გაჭიანურებას. ასევე მრიცხველებთან დაკავშირებით აქვს ზოგს პრობლემა. მაგალითად, გამრიხველიანებული აბონენტები ხშირად უჩივიან იმას, რომ ჩვენება დროულად არ არის აღებული, გადასახადი შემდგომში გროვდება და აბონენტთა მხრიდან ეფექტურად დაფარვას შეუძლებელს ხდის. როდესაც გადასახადი მომხმარებელს ყოველთვიურად არ მიდის, ეს საკმაოდ სერიოზული პრობლემაა. ჩვენ ამაზეც გავამახვილეთ ყურადღება, შარშანდელ ანგარიშში. 

არსებობს ისეთი უბნები, რომელთაც არ აქვთ წყალანირება, მაგალითად, სოფელი დიღომი, რაც სერიოზული პრობლემაა, მაგრამ იქ კიდევ სხვა საკითხია და არ არის „ჯორჯიან ოუთერ ენდ ფაუერის“ პასუხისმგებლობა. უბრალოდ, იქ ქსელი არის განსავითარებელი. 

მრავალფეროვანი არის საჩივრების შინაარსი. რაოდენობრივად ადმინისტრაციული წარმოების დაწყების შეიძლება ბევრი არ იყოს, მაგრამ ეს იმას არ ნიშნავს, რომ იქ რაიმე პრობლემა იხსნება. რადგანაც 10 ათასი მოქალაქე მოდის კონსულტაციისთვის, ესე იგი, ეს იმას ნიშნავს, რომ ცნობიერება ამაღლებულია. ნაწილი ცდილობს არ დაირღვეს მისი უფლება, ხოლო ნაწილი ცდილობს, რომ რაღაც გამოსწორდეს. 

როგორც გითხარით, ძირითადი პრობლემა არის მომსახურებაზე, რაც კომპანიის მხრიდან უყურადღებობას გულისხმობს. დროულად არ ხდება რეაგირება. დარეკა მოქალაქემ ცხელ ხაზზე და კომპანია დროულად არ ახდენს რეაგირებას.  მაგალითად, გაფუჭდა წყალანირების ჭა და არ არის შეკეთებული და ა.შ. 

ჩვენ ეფექტურად ვმუშაობთ „ჯივიპისთან“. მხოლოდ რეკომენდაციებით არ შემოვიფარგლებით. წყალი სასიცოცხლოდ აუცილებელი პროდუქტია, ამიტომ გადავწყვიტეთ, რომ ყველა პრობლება დაუყონებლივ, ონლაინ შიდა „ჩატში“ მივაწოდოთ. 

ჩვენი აქტიურობის შედეგად რეაგირება უფრო სწრაფად ხდება და თუ არის რაიმე შენიშნა, ვაწვდით მარეგულირებელ კომისიასაც და ვაფიქსირებთ ანგარიშშიც. შედეგად, კომპანია ცდილობს, რომ სისტემურად აღარ დაუშვას შეცდომა, რადან სისტემურ ხარვეზს სხვა სანქციები მოსდევს. რა თქმა უნდა, სამუშაო მაინც ბევრია“, - განაცხადა „რეზონანსთან“ ენერგოომბუდსმენმა. 

პრობლემებზე საუბრობენ მომხმარებელთა უფლებათა დამცველებიც. როგორც სტუ-ს პროფესორმა ლია კვარაცხელიამ განაცხადა, კომპანია ხარვეზების გამოსწორებაზე ყოველდღიურად უნდა მუშაობდეს, რაც მაღალ დონზე უნდა კონტროლდებოდეს.  

„კომპანიის პრობლემებზე მსმენია კი არა, პირადად მქონია შეხება. წყალმომარაგებამ თავის თავზე უნდა აიღოს დედაქალაქის თითოეული აბონენტისთვის წყლის მიწოდება. ეს არის უმნიშვნელოვანესი. მე აგარაკი მაქვს თბილისის ზღვაზე და იქ წყლის მიერთება ძალიან ჭირს, თან ყველაფერს დროში ახანგრძლივებენ. კარგად არ მუშაობენ და ჩემს ირგვლივაც მეზობლები შეწუხებულები არიან ასეთი სიტუაციით. 

ბოლო პერიოდში არ მსმენია, მაგრამ ადრე იყო ხალხის წყლით მოწამვლის შემთხვევები. ალბათ, ახლა ხარისხს ამოწმებენ და შესაბამისი მონიტორინგი ტარდება. წყლის შემოწმება რეგულარულად უნდა ხდებოდეს და წარმოდგენილი დასკვნა უნდ აიყოს საჯარო, ყველასათვის ხელმისაწვდომი. დღის მანძილზე ადამიანი საკვებზე უფრო ხშირად წყალს იღებს, ამიტომ მკაცრი კონტროლი ძალიან მნიშვნელოვანია. წყლიდან ნებისმიერი საზიზღარი დაავადება შეიძლება გავრცელდეს. 

საჩივრების სტატისტიკური მაჩვენებელი მართლაც პრობლემაა. 85% როგორ უნდა დაგროვდეს, თუნდაც წყლის მომარაგებით ან ხარისხით, ანდა მიწოდების სერვისით?! ეს ხომ წარმოუდგენელია რამაა. დღე და ღამ უნდა ხდებოდეს შემოწმება და კონტროლი. ჩემთვის სიგნალი არის სწორედ ეს უკმაყოფილო მომხმარებლების 85%. 

ქვეყანა დგას მოსახლეობაზე. ეს კომპანია ხომ გადასახადებით არსებობს, ამიტომ ნებისმიერ განცხადებას უნდა ელოლიავებოდნენ და ყოველ დღე უნდა ფიქრობდნენ, დღეს რა პრობლემა მოაგვარონ და ხვალ რომელი ხარვეზი გამოასწორონ, სხვანაირად არ გამოვა“, - განუცხადა „რეზონანსს“ ლია კვარაცხელიამ.