საკონსტიტუციო სასამართლოში ხუთი ოპოზიციური პარტიის აკრძალვის საქმის განხილვა მეორე დღესაც მწვავე კამათის, ურთიერთბრალდებებისა და უარყოფილი შუამდგომლობების ფონზე გაგრძელდა. სასამართლომ ჯერჯერობით ოპოზიციის არცერთი მოთხოვნა არ დააკმაყოფილა, მათ შორის, მოსამართლეთა აცილების, პოლიტიკოსების პროცესზე დასწრებისა და საქმის ცალკეულ პარტიებთან მიმართებით დამოუკიდებლად განხილვის შესახებ. ოპოზიცია 23 ოქტომბრის სხდომისთვისაც ახალი შუამდგომლობების წარდგენას არ გამორიცხავს.

რუსეთთან ურთიერთობებში საქართველოს სპეცწარმომადგენლად საგარეო საქმეთა მინისტრის პირველი მოადგილის დანიშვნას ქართულ ანალიტიკურ წრეებში არაერთგვაროვანი შეფასება მოჰყვა. მოსკოვში ამ საკადრო ცვლილებას დადებითად უყურებენ და რუსი ანალიტიკოსების ნაწილი ამას „საქართველოს რუსეთისკენ შემობრუნების" დასაწყისადაც აღიქვამს. ამ მხრივ, სავარაუდოდ, ბევრი რამ ნათელი გახდება ნოემბერის დასაწყისში დაგეგმილ ჟენევის დისკუსიების მორიგ რაუნდზე, სადაც ქართულ დელეგაციას სწორედ ზურაბაშვილი უხელმძღვანელებს.

„საქსტატის“ მონაცმებით, საქართველოში ელექტრომობილების იმპორტის ახალი რეკორდი დაფიქსირდა. 2026 წლის იანვარ-სექტემბერში, ქვეყანაში 157.215 მილიონი აშშ დოლარის ღირებულების 10 938 ერთეული ელექტროძრავიანი მანქანა შემოვიდა, რაც გასული, 2025 წლის 9 თვის მაჩვენებელზე 79%-ით მეტია. სპეციალისტების ერთი ნაწილის მოსაზრებით, ელექტრომობილებზე მოთხოვნის გაზრდის მიზეზი ბენზინისა და დიზელის საწვავის გაძვირებამ განაპირობა, ხოლო მეორე ნაწილი მიიჩნევს, რომ მოთხოვნის ზრდა ელექტრომობილების პოპულარობას უკავშირდება. 

ერევანში, ბიოლოგიური მრავალფეროვნების საკითხებზე გამართულ COP17-ის ლიდერთა სამიტზე სიტყვით გამოსვლისას პრემიერმა ირაკლი კობახიძემ საქართველოს ბიომრავალფეროვნებაზე, დაცული ტერიტორიების გაფართოებაზე, ტყეების აღდგენის გეგმებსა და გადაშენების საფრთხის წინაშე მყოფი სახეობების დაცვის მიმართულებით მიღწეულ შედეგებზე ისაუბრა. კობახიძემ ასევე ყურადღება გაამახვილა ქართული ვაზისა და ხორბლის უნიკალურ სახეობებზე და ბუნებრივი მემკვიდრეობის მნიშვნელობაზე ქვეყნის ეკონომიკური და სოციალური განვითარებისთვის.

ევროკავშირი საქართველოს ხელისუფლებასთან კვლავ დისტანციას ინარჩუნებს, ბრიუსელსა და თბილისს შორის პოლიტიკური დიალოგის აღდგენის პერსპექტივა კი ამ ეტაპზე ბუნდოვანია. მაშინ, როდესაც ევროკავშირის წევრ სახელმწიფოთა ნაწილი სანქციების დაწესებასა და დამატებითი შეზღუდვების ამოქმედებას უჭერს მხარს, ნაწილი თბილისთან კომუნიკაციის შენარჩუნებისა და ნაჩქარევი გადაწყვეტილებების თავიდან აცილების აუცილებლობაზე საუბრობს.

საკონსტიტუციო სასამართლოში ხუთი ოპოზიციური პარტიის აკრძალვის შესახებ სარჩელის განხილვის პირველმა დღემ ხმაურის, ურთიერთბრალდებებისა და არაერთი დაუკმაყოფილებელი შუამდგომლობის ფონზე ჩაიარა.

პარტიების შესაძლო აკრძალვის საქმეზე საკონსტიტუციო სასამართლოში მიმდინარე პროცესის პარალელურად, პრემიერ-მინისტრმა ირაკლი კობახიძემ სპეციალურ ბრიფინგზე რუსეთთან ურთიერთობის საკითხებში პრემიერის სპეციალური წარმომადგენლის დანიშვნის შესახებ განაცხადა.

ევროკავშირსა და „ქართულ ოცნებას" შორის დაპირისპირება ოპოზიციური პარტიების შესაძლო აკრძალვის ფონზე ახალ ეტაპზე გადადის. მას შემდეგ, რაც ევროკომისიამ საკონსტიტუციო სასამართლოში მიმდინარე პროცესზე შეშფოთება გამოხატა და განაცხადა, რომ ოპოზიციური პარტიების აკრძალვა დემოკრატიულ პლურალიზმსა და სამართლიან პოლიტიკურ კონკურენციას საფრთხეს უქმნის, საქართველოს საგარეო საქმეთა სამინისტრომ ბრიუსელი სასამართლოზე ზეწოლის მცდელობასა და ქვეყნის შიდა საქმეებში ჩარევაში დაადანაშაულა.

საკონსტიტუციო სასამართლოში „ოცნების" სარჩელის განხილვის დაწყებამდე პოლიტიკური დაძაბულობა ახალ ეტაპზე გადადის - ოპოზიცია სასამართლო პროცესისთვის ემზადება, აქტიურდება დიპლომატიურ ფრონტზე და საპროტესტო დღის წესრიგზეც მსჯელობს. პარტიების ნაწილი საკონსტიტუციო სასამართლოში დასწრებას გეგმავს, ნაწილი კი ქუჩის აქციებით აპირებს საკუთარი პოზიციის გამოხატვას. ამ ფონზე, პროცესის დაწყებამდე ერთი დღით ადრე, გახარიას პარტიამ სასამართლოს მიმართა და მოითხოვა, მისი კონსტიტუციურობის საკითხი ცალკე საქმედ განიხილონ.

ქართული მოცვისთვის ევროპულ სავაჭრო ქსელებთან პირდაპირი კავშირების დამყარება, ნუშისა და თხილისთვის კი ინდოეთის ბაზარზე ახალი პარტნიორების მოძიება ქართველი მეწარმეების საგამოფენო საქმიანობის კონკრეტული მიზნებია. 2026 წელს სოფლის განვითარების სააგენტოს ორგანიზებითა და გარემოს დაცვისა და სოფლის მეურნეობის სამინისტროს მხარდაჭერით საერთაშორისო გამოფენებში მონაწილეობა კომპანიებს საშუალებას აძლევს, პროდუქცია პოტენციურ შემსყიდველებს გააცნონ და სხვადასხვა ბაზრის მოთხოვნები ადგილზე შეისწავლონ. ამ საქმიანობის მთავარი ამოცანა საექსპორტო მიმართულებების დივერსიფიცირება და ქართული პროდუქციისთვის ახალი სავაჭრო შესაძლებლობების შექმნაა.

სემეკის დასკვნით 24-25 ივლისის სისტემური ავარიების თავიდან აცილება შესაძლებელი იყო. დოკუმენტში აღნიშნულია, რომ შესაბამისი რეგულაციების დროულად განხორციელებისა და ტექნიკური ავტომატიკის გამართვის შემთხვევაში, სრულიად საქართველო შუა ზაფხულში ორი დღით არ ჩაბნელდებოდა. ამ მოსაზრებას არ იზიარებენ „სახელმწიფო ელექტროსისტემასა“ და „ხრამჰესში“. ენერგეტიკოსებს კი მიაჩნიათ, რომ უკვე დროა, ელექტროენერგიის გამანაწილებელმა კომპანიებმა მოსახლეობასთან - ფიზიკურ და იურიდიულ პირებთან - ინდივიდუალური ხელშეკრულება გააფორმონ. 

ეკონომიკური ზრდის პარალელურად ინფლაციაც მატულობს. ნეგატიური ტენდენციის ფონზე მოსახლეობა პროგრესს ვერ გრძნობს. როგორც სპეციალისტები აღნიშნავენ, ეკონომიკა, ძირითადად, ტრანზიტისა და საფინანსო სფეროს ხარჯზე იზრდება, სადაც შემოსავალი მხოლოდ მცირე ჯგუფის ხელში იყრის თავს მაშინ, როცა ადგილობრივი წარმოების კლება იმპორტდამოკიდებულებასა და ფასების მატებას იწვევს. საბოლოო ჯამში, მაღალი ინფლაციის წნეხი მძიმე ტვირთად აწვება საზოგადოების უდიდეს ნაწილს და ეკონომიკური ზრდის  მიღწევებს აუფასურებს.

თბილისის სატრანსპორტო კოლაფსისა და მძიმე ტრანზიტული ნაკადის განტვირთვის მიზნით, დედაქალაქის შემოვლითი გზის პროექტი იწყება. ინფრასტრუქტურის მინისტრის, რევაზ სოხაძის ინფორმაციით, უკვე გამოვლენილია ტენდერში გამარჯვებული კომპანია, რომელიც წიწამური-ავჭალის მონაკვეთზე 4-ზოლიანი საავტომობილო გზის მშენებლობას უზრუნველყოფს. მიუხედავად იმისა, რომ ეს ინიციატივა მნიშვნელოვანი პრევენციული ნაბიჯია, სპეციალისტები აქტიურად საუბრობენ იმაზე, რომ დედაქალაქი დიდი ხანია ფართომასშტაბიან შემოვლით მაგისტრალს საჭიროებს, რომელიც ტრანზიტული ტრანსპორტის მოძრაობისაგან თბილისს სრულად აარიდებს. 

ქართულ კულტურულ და პოლიტიკურ კულუარებში ხმაურიანი დაპირისპირებაა. „კულტურის პალატის" ხელმძღვანელი დავით ოქიტაშვილი კულტურის ყოფილ მინისტრს, თინათინ რუხაძეს ღია წერილით უპირისპირდება და მას საქმიანობის მიზანმიმართულ ბლოკირებაში, რეპუტაციის შელახვასა და შესაძლო ფინანსურ დარღვევებში ადანაშაულებს. დავით ოქიტაშვილის მტკიცებით, ყოფილი მინისტრი კულტურის სფეროს წარმომადგენლებს მასთან ურთიერთობას უზღუდავდა, ბლოკავდა კულტურულ ღონისძიებებზე და შეაჩერა „ვარსკვლავების გახსნის" ისტორიული პროექტი.

საფრანგეთი 2027 წლის საპრეზიდენტო არჩევნებს ღრმა პოლიტიკური და სოციალური კრიზისის ფონზე ხვდება. მიმდინარე არეულობების ფონზე სულ უფრო იზრდება მემარჯვენე პოლიტიკოსების მხარდაჭერა. ბოლო გამოკითხვები ერთმნიშვნელოვნად აჩვენებს, რომ მემარჯვენე ფლანგზე ქვეყნის მთავარი პოლიტიკოსი, მარინ ლე პენი, ორივე ტურში დამაჯერებლად იმარჯვებს. ხაზგასასმელია, რომ ეს მოხდება ყველა საარჩევნო კონფიგურაციაში თუ, რა თქმა უნდა, მანამდე რაიმე ძირეული ცვლილება არ მოხდა.

რუსეთის პრეზიდენტმა ვლადიმერ პუტინმა აშშ-ის პრეზიდენტ დონალდ ტრამპთან ურთიერთობების დათბობის ფონზე, სამმხრივი შეხვედრის გამართვის იდეა წამოაყენა, რომელშიც ჩინეთის ლიდერი სი ძინპინიც უნდა მონაწილეობდეს. შესაძლო შეხვედრის მიზნად უკრაინის ომის დასრულება სახელდება და დასავლური მედიის შეფასებით, კრემლი ცდილობს, შეთანხმებას მოსკოვისთვის ხელსაყრელი პირობებით მიაღწიოს. მიმომხილველები იმასაც წერენ, რომ ეს შეხვედრა, თუკი ის შედგა, ფაქტიურად განასაზღვრავს მსოფლიოში გავლენის სფეროების ხელახალ გადანაწილებას.