პრემიერ ირაკლი კობახიძის გაეროს გენერალური ასამბლეის 81-ე სესიაზე გამოსვლას ოპოზიციის მხრიდან კრიტიკა მოჰყვა. ოპოზიციონერი პოლიტიკოსების შეფასებით, პრემიერის სიტყვით გამოსვლაში არაერთი მნიშვნელოვანი საგარეო-პოლიტიკური საკითხი, მათ შორის საქართველოს ევროპული ინტეგრაციის დღის წესრიგი, სათანადოდ არ ყოფილა წარმოჩენილი, ხოლო ოკუპაციის პრობლემაზე საუბარი კონკრეტული პოლიტიკური გზავნილების გარეშე დარჩა.

მმართველი პარტია ევროკავშირს ინტეგრაციის პროცესის აღდგენას კვლავ სთხოვს. პარლამენტის თავმჯდომარე შალვა პაპუაშვილის თქმით, პასუხი ყოველთვის დისკუსიასა და დიალოგშია, რასაც პარტნიორი ქვეყნების მხრიდანაც სჭირდება სამართლიანი მიდგომა. ანალიტიკოსთა ნაწილი ბრიუსელის მხრიდან პოლიტიკის შესაძლო ცვლილებებსა და დიალოგის აღდგენას ელის. მეორე მხარის აზრით კი ვალდებულებები მხოლოდ საქართველოს აკისრია და ევროინტეგრაციის პროცესის განახლებაც ხელისუფლების ნაბიჯებზეა დამოკიდებული.

საქართველოში ჩინური წარმოების ავტომობილების წილი სტაბილურად მზარდია, ქვეყანაში იმპორტირებული მანქანების მოცულობა მატულობს. ჩინური მანქანები უახლოეს პერიოდში ბაზარზე ლიდერობას ვერ მოიპოვებენ, თუმცა კონკრეტული ნიშის დაკავება უკვე შეძლეს.

აშშ-ში ჩინეთის პრეზიდენტ სი ძინპინის ოფიციალური ვიზიტი მიმდინარეობს. მსოფლიოს ორი ყველაზე მდიდარი ქვეყნის ლიდერმა გლობალურ პასუხისმგებლობასა და პარტნიორობაზე ისაუბრა. ჩინეთისა და სამხრეთ-აღმოსავლეთ აზიის კვლევების ცენტრის დირექტორ ბექა ნაცვლიშვილის შეფასებით, მხარეებს შორის დახურულ კარს მიღმა გამართულ მოლაპარაკებებზე მთავარი თემები უკრაინისა და ახლო აღმოსავლეთის კონფლიქტების დარეგულირება, ტარიფები და ტაივანის ირგვლივ არსებული უსაფრთხოების საკითხები იქნება, სადაც ორივე ქვეყანას დათმობებზე წასვლა მოუწევს.

პოლიტიკური პარტიის აკრძალვის საკითხი კვლავ ერთ-ერთ მთავარ პოლიტიკურ თემად რჩება. ამ ფონზე, ოპოზიციაში ალტერნატიულ გეგმებზე მსჯელობენ, იმ შემთხვევისთვის, თუ საკონსტიტუციო სასამართლო პარტიების აკრძალვის გადაწყვეტილებას მიიღებს, თუმცა დეტალების გასაჯაროებისგან ამ ეტაპზე თავს იკავებენ. პარალელურად, მოქმედი საკანონმდებლო ცვლილებები აკრძალული პარტიის წევრებისთვის პოლიტიკური საქმიანობის გაგრძელების შესაძლებლობას ზღუდავს.

ქართული დელეგაცია კვლავ ნიუ-იორკში იმყოფება, სადაც გაეროს გენერალური ასამბლეის 81-ე სესიის მაღალი დონის კვირეულის ფარგლებში შეხვედრებსა და სხვადასხვა ღონისძიებაში მონაწილეობს. სესიის გენერალური დებატები 22 სექტემბერს დაიწყო და 26 სექტემბრამდე გაგრძელდება.

პარლამენტის თავმჯდომარე საპარლამენტო დელეგაციასთან ერთად ევროპულ ტურნეშია - შალვა პაპუაშვილი ბელგიის შემდეგ ლუქსემბურგში გაემგზავრა. ოფიციალური ვიზიტის ფარგლებში დაგეგმილია შეხვედრები ლუქსემბურგის დეპუტატთა პალატის სპიკერთან, მათ შორის პირისპირ და გაფართოებულ ფორმატში.

ექსპრემიერი, ირაკლი ღარიბაშვილი ციხიდან მორიგ, რიგით მეშვიდე წერილს აქვეყნებს, სადაც აცხადებს, რომ იგი პოლიტიკური განეიტრალების მიზნით დააპატიმრეს და შემდეგ სამჯერ „გადააგდეს". იგი „ქართული ოცნებას" „ნაციონალური მოძრაობის" მეთოდებით მოქმედებაში ადანაშაულებს და მიმართავ - „ბოროტებას ჩადიხართ, ფრთხილად იყავით".

„ქართული ოცნების" განახლებული სარჩელი, რომლითაც მმართველი პარტია ახლა უკვე 5 ოპოზიციური პარტიის აკრძალვას ითხოვს, საკონსტიტუციო სასამართლოში 21 სექტემბერს შევიდა. შესაბამისად, მისი განხილვისთვის კანონით განსაზღვრული 9-თვიანი ვადის ათვლაც თავიდან დაიწყო. ანალიტიკოსი რამაზ საყვარელიძე არ გამორიცხავს, რომ ხელისუფლებამ მომავალშიც განაახლოს სარჩელი და მასში ახალი პარტიები დაამატოს, რასაც შესაძლოა საქმის საბოლოო გადაწყვეტის კიდევ უფრო გადავადება მოჰყვეს.

სოციალური უთანასწორობა ქვეყნის მოსახლეობის შემოსავლებში აშკარა და თვალშისაცემია. გაერთიანებული პროფკავშირების მონაცემებით, 417 მაღალანაზღაურებად პირს იმდენივე შემოსავალი აქვს, რამდენიც 235 000 მოქალაქეს, ჯამში. შემოსავლების ასეთი მკვეთრი დისბალანსი რეალური პრობლემაა. ეკონომისტები და სტატისტიკოსები მიიჩნევენ, რომ ამ პრობლემის მოგვარება შესაძლებელია, მცირე და საშუალო ბიზნესის ხელშეწყობით, ასევე დასაქმებული მოსახლეობის კვალიფიკაციის ამაღლებით. 

არ არის გამორიცხული, რომ ნამოხვანჰესის შეჩერებული პროექტის გამო, საქართველოს სახელმწიფოს საკმაოდ სოლიდური ჯარიმის გადახდა მოუხდეს. საუბარია 443.26 მილიონ აშშ დოლარზე, ასევე, 356 ათას ევროსა და 40 ათას ფუნტ სტერლინგზე, რომელიც საქართველომ თურქულ კომპანია „ენკას“ უნდა გადაუხადოს. ექსპერტების შეფასებით, აუცილებელია სახელმწიფომ კანონმდებლობა გაამკაცროს და პრინციპული პასუხისმგებლობა დააკისროს იმ ადამიანებს, თუ ორგანიზაციებს, რომლებიც ქვეყნის მასშტაბით, ჰესების მშენებლობის წინააღმდეგ საბოტაჟს აწყობენ. 

თხილის ფასი მკვეთრად შემცირდა, რის გამოც ფერმერების ნაწილმა წელს მოსავლის აღება საერთოდ გადაიფიქრა. განსაკუთღებით რთული ვითარებაა სამეგრელოსა და გურიაში, სადაც თხილი მოსახლეობის ძირითადი შემოსავალია. უამინდობამ ხარისხი იმდენად გააუარესა, რომ პოტენციური შემოსავალი ხარჯს ვერ ფარავს, ამიტომ გლეხებმა ხელი საერთოდ ჩაიქნიეს.

ევროპული სანქციების რიგით 22-ე პაკეტის მიღება ვერ ხერხდება. მართალია სიიდან ორი რუსი მილიარდერი - ალიშერ უსმანოვი და მიხაილ ფრიდმანი ბოლოს და ბოლოს ამოიღოს, მაგრამ საბოლოო შედეგის მისაღწევად ეს საკმარისი მაინც არ არის. მეტიც, რაც დრო გადის კრემლის წინააღმდეგ ახალ-ახალი სანქციების დაწესება ძალიან ჭირს და რაც უკვე დაწესებულია, პრაქტიკაში არ მუშაობს.

გორში 26 სექტემბერს დაგეგმილი „კამარა ფესტივალი", რომლის ფარგლებში ექსპერიმენტული მუსიკოსის ალექსანდრე კორძაიას, იგივე „კორძის", კონცერტიც უნდა გამართულიყო, უსაფრთხოების მიზეზით გადაიდო.

ევროკავშირის სანქციების პოლიტიკაში მოულოდნელი ცვლილებაა - ქვეყნები რუსეთის წინააღმდეგ დაწესებული ინდივიდუალური სანქციების უპრეცენდენტოდ, სამი წლის ვადით გახანგრძლივებაზე შეთანხმდნენ (მანამდე ეს ექვსი თვით ხდებოდა-ხოლმე). შეზღუდვები, რომლებიც აქტივების გაყინვასა და გადაადგილების აკრძალვას მოიცავს, 3 000-მდე ფიზიკურ და იურიდიულ პირს ეხება, თუმცა შავ სიას გამოაკლდა რამდენიმე პირი, მათ შორის ცნობილი რუსი მილიარდერები - ალიშერ უსმანოვი და მიხეილ ფრიდმანი. სიიდან უსმანოვის ამოღებას საფრანგეთი და სლოვაკეთი ითხოვდნენ, ფრიდმანისას კი ლუქსემბურგი. ამას თავდაპირველად აღმოსავლეთ ევროპის ქვეყნები, განსაკუთრებით ლატვია ეწინააღმდეგებოდა, თუმცა საბოლოოდ კომპრომისი შედგა.

ბალტიის ქვეყნებმა ევროკომისიას დრონსაწინააღმდეგო თავდაცვისთვის 500 მილიონი ევრო სთხოვეს. თავდაცვის მინისტრებმა შესაბამისი წერილი ურსულა ფონ დერ ლაიენს გაუგზავნეს, - იუწყება ფინური გამოცემა Iltalehti.