საქართველო-აშშ-ის ურთიერთობის გადატვირთვასთან დაკავშირებით ხელისუფლების მიერ გამოთქმულ ოპტიმიზმს რამდენიმე დღეში განსხვავებული პოლიტიკური სიგნალი მოჰყვა ვაშინგტონიდან. მას შემდეგ, რაც აშშ-ის პრეზიდენტ დონალდ ტრამპის წერილი პრემიერ-მინისტრ ირაკლი კობახიძემ ორმხრივი ურთიერთობის განახლების შესაძლებლობად შეაფასა, საქართველოში აშშ-ის საელჩომ მედიის თავისუფლებასა და პოლიტიკური პლურალიზმის საკითხებზე კრიტიკული განცხადება გაავრცელა, რამაც ორ ქვეყანას შორის ურთიერთობის პერსპექტივის შესახებ ახალი კითხვები გააჩინა.

საქართველოში აშშ-ის საელჩო შეშფოთებას გამოთქვამს საქართველოს მთავრობის მიერ სიძულვილის ენის წინააღმდეგ ბრძოლის სამმართველოს შექმნის გამო. მმართველი გუნდი საქართველოს კანონმდებლობის ევროპულ პრაქტიკასთან შესაბამისობაზე მითითებით პასუხობს, რომ სამმართველოსა და კანონის გაუქმებას არ აპირებს და ამბობს, რომ ამ საკითხზე დამატებით განცხადებას საგარეო საქმეთა სამინისტრო გააკეთებს.

ვლადიმერ პუტინმა ომში ინიციატივა დაკარგა, - ამის შესახებ უკრაინის პრეზიდენტმა ვოლოდიმირ ზელენსკიმ „ფოქსნიუსთან" ინტერვიუში განაცხადა. ვოლოდიმირ ზელენსკის განცხადებით, უკრაინის სამხედრო ტექნოლოგიებმა ბრძოლის ველზე დინამიკა შეცვალა.

ევროკავშირში კონსენსუსის წესის გაუქმების საფრთხესა და საქართველოს საგარეო კურსზე საუბრისას, ანალიტიკოსი ზაალ ანჯაფარიძე აცხადებს, რომ „ქართული ოცნება" ევროინტეგრაციაზე უარს ვერ იტყვის. მისი თქმით, კონსტიტუციის 78-ე მუხლის დარღვევა მმართველ გუნდს მნიშნელკოვნად დააზიანებს.

ანალიტიკოსი ვახტანგ ძაბირაძე ფიქრობს, რომ „ქართული ოცნება" მიზანმიმართულად ცდილობს საზოგადოების მომზადებას ევროინტეგრაციასა და დასავლურ კურსზე საბოლოო უარის სათქმელად. მისი შეფასებით, ხელისუფლების პროპაგანდისა და ქმედებების შედეგად ევროკავშირში გაწევრიანების პროცესი ფაქტობრივად ჩავარდა, რაც საქართველოს კვლავ რუსულ ორბიტაზე ტოვებს.

ენმ დაანონსებული პარტიული ყრილობისთვის კვლავ ემზადება, თუმცა პროცესი ფინანსური სირთულეების გამო ჭიანურდება. პარტიამ მხარდამჭერებს საჯარო შემოწირულობის კამპანიით მიმართავს და აცხადებს, რომ მიზანი არა მხოლოდ ყრილობის დაფინანსება, არამედ ფინანსურად დამოუკიდებელი და გამჭვირვალე პარტიული მოდელის შექმნაა.

პარლამენტის თავმჯდომარე შალვა პაპუაშვილი ვრცელ წერილს აქვეყნებს, სადაც აცხადებს, რომ ევროკავშირში კონსენსუსის წესის შესაძლო გაუქმება მცირე სახელმწიფოებს გავლენის მნიშვნელოვან ბერკეტს წაართმევს და ასეთ პირობებში კავშირის გარეთ დარჩენა მათთვის "შესაძლოა უფრო ხელსაყრელიც" აღმოჩნდეს.

ანალიტიკოსი ვახტანგ ძაბირაძე მიიჩნევს, რომ ხელისუფლებას ამ ეტაპზე არანაირი საფუძველი არ აქვს, ოპოზიციის წინაში რაიმე დათმობებზე წავიდეს და ახალ საპროტესტო კამპანიას, რომელსაც ოპოზიცია, სავარაუდოდ, შემოდგომაზე დაიწყებს, მხოლოდ პიარის თვალსაზრისით ექნება მნიშვნელობა.

რუსთაველის გამზირის დაწყებულ რეაბილიტაციას უკვე აკრიტიკებენ. სპეციალისტების ნაწილს წინასწარი დასკვნების გაკეთება უჭირს, მაგრამ ნაწილი წინასწარვე აცხადებს, რომ ქალაქის მთავარი გამტარი ქუჩის კეთილმოწყობა შეიძლება საგზაო კოლაფსით დასრულდეს.

საქართველო შეიძლება, მარცვლეულის გამტარი ჰაბი გახდეს. აზოვის ზღვის აკვატორიაზე უკრაინული დრონების დარტყმებმა, რამაც აზოვისა და ტამანის პორტების მუშაობა შეაჩერა, რუსული მარცვლეულის ექსპორტის პარალიზება გამოიწვია. შესაბამისად, რუსეთს, საქართველოს გარდა, სხვა ალტერნატივა  ნაკლებად აქვს. მოსალოდნელია, რომ ჩვენი ქვეყანა ამით  უკეთეს მდგომარეობაში აღმოჩნდება, რადგან სტრატეგიულად მნიშვნელოვანი საქონელი შესაძლია, უფრო ხელსაყრელი პირობებით მიიღოს.  ერთადერთი დაბრკოლება საქართველოს დერეფნის გამტარუნარიანობაა. 

თბილისში გასაბერი რეზინის კაშხლის მქონე ჰიდროელექტროსადგურის მშენებლობა იგეგმება. რა არგუმენტებს ემყარება გადაწყვეტილება, პროექტის ავტორები ჯერჯერობით არ საუბრობენ, თუმცა სპეციალისტები ღიად აცხადებენ, რომ თბილისისთვის მსგავსი ექსპერიმენტი არასწორია და მსგავსი პროექტის განხორციელებას  ემიჯნებიან. 

ბოლო პერიოდში საქართველო ექსპორტისა და რეექსპორტის კუთხით მნიშვნელოვან მატებას განიცდის. "საქსტატის" მონაცემებით, საგრძნობლად გაიზარდა ავტომობილების რეექსპორტი ირანთან. პარალელურად მომატებულია ნავთობპროდუქტების ექსპორტი ისეთ ქვეყნებთან, როგორიცაა ტოგო, ჩინეთი, ლიბია და ა.შ. ექსპერტები ვარაუდობენ, რომ ახლო აღმოსავლეთში მიმდინარე კონფლიქტის ფონზე ქვეყნებმა შეცვალეს მომწოდებლები და საქართველომ ამით ისარგებლა. 

იუმორისტულ გადაცემა „ისაუბრეს“-ში პარლამენტში მომხდარი ფიზიკური დაპირისპირების შესახებ გაკეთებულმა სარკასტულმა კომენტარმა სკანდალი გამოიწვია. ჯგუფური ძალადობის ბრალდებით დაკავებული ონისე ცხადაძის ძმამ, სანდრო ცხადაძემ, ეტლით მოსარგებლე დეპუტატის, რატი იონათამიშვილის მისამართით გაჟღერებული რეპლიკის გამო ბოდიში მოიხადა. უფლებადამცველები მომხდარს შშმ პირთა დისკრიმინაციად და სტიგმის გაძლიერებად აფასებენ, თავად ცხადაძე კი აცხადებს, რომ ეს იყო უბრალოდ „არასწორი ხუმრობა“ და არა ბულინგი.

ამჟამად ვითარება საკმაოდ სერიოზულია - რუსეთის წინააღმდეგ პრაქტიკულად მთელი დასავლური სამყარო გაერთიანდა, - ამის შესახებ რუსეთის საგარეო საქმეთა მინისტრმა სერგეი ლავროვმა განაცხადა.

სომხეთის საპარლამენტო არჩევნებში პრემიერ ნიკოლ ფაშინიანის პარტიის გამარჯვების შემდეგ, მოსკოვმა ერევანს ეტაპობრივად თითქმის ყველაფერზე ემბარგო დაუწესა და დაჟინებით ითხოვს რეფერენდუმის ჩატარებას. 27 ივლისს ორი ქვეყნის პრეზიდენტებს შორის სატელეფონო საუბარი გაიმართა, რომელიც, სავარაუდოდ, საკმაოდ დაძაბული გამოდგა და კამათით დასრულდა, რაც ორივა მხარის მიერ გავრცელებული ოფიციალური პრესრელიზებიდანაც ჩანს.