მინდა იცოდეთ, საიდან წამოვიდა ჩვენი ჰიმნის იდეა, ხუთი წლის ვიყავი, როცა დედაჩემს მივყავდი ინგლისურის გაკვეთილზე და ამ დროს შევესწარით ცნობილი ტენორის, დავით გამრეკელის გამოსვენებას, ჩართული იყო არია ზაქარია ფალიაშვილის დაისიდან „ოდა თავისუფლებას" და გულში ჩამივარდა ამ არიის სიტყვები „თავისუფლება დღეს ჩვენი", - ამის შესახებ საქართველოს ყოფილი პრეზიდენტი მიხეილ სააკაშვილი სოციალურ ქსელში წერს.

მისივე თქმით, „ვარდების რევოლუციის" შემდეგ, როდესაც ჰიმნის შეცვლის საკითხი დადგა, კომისიას ეს მელოდია შესთავაზა.

„„თავისუფლება დღეს ჩვენი".

მინდა იცოდეთ, საიდან წამოვიდა ჩვენი ჰიმნის იდეა. ასე ხუთი წლის ვიყავი, როცა დედაჩემს რუსთაველის გამზირით მივყავდი ინგლისურის გაკვეთილზე და ამ დროს შევესწარით ოპერის თეატრიდან ცნობილი ტენორის, დავით გამრეკელის გამოსვენებას.

მთელ რუსთაველზე დინამიკებში ჩართული იყო არია ზაქარია ფალიაშვილის დაისიდან „ოდა თავისუფლებას", დავით გამრეკელის შესრულებით. გულში ჩამივარდა ამ არიის სიტყვები „თავისუფლება დღეს ჩვენი". „ვარდების რევოლუციის" შემდეგ, როდესაც ჰიმნის შეცვლის საკითხი დადგა, მე კომისიას ეს მელოდია შევთავაზე. მალე ტექსტის პროექტიც მომიტანეს, რომელშიც ვერ ვიპოვე მთავარი სიტყვები "თავისუფლება დღეს ჩვენი", ამიტომ ჩემი ხელით ჩავწერე:

„თავისუფლება დღეს ჩვენი,

მომავალს უმღერს დიდება;

დიდება თავისუფლებას,

თავისუფლებას დიდება".

ძალიან ვამაყობ, როდესაც ეს სიტყვები მრავალგზის გამეორებული მესმის მოედნებზე და ქუჩებში. არასდროს დამიწერია ეს, მაგრამ ახლა მინდა რომ იცოდეთ. ვინაიდან ჩემი ღრმა რწმენით სწორედ სიტყვები „თავისუფლება დღეს ჩვენი" ყველაზე ზუსტად გამოხატავს ჩვენს გენეტიკურ კოდს", - წერს სააკაშვილი.