ამერიკელი სენატორები რუსეთისა და ირანის წინააღმდეგ ახალ სანქციებზე შეთანხმდნენ. ამის შესახებ ინფორმაციას გამოცემა Bloomberg-ი ავრცელებს.
როგორც გამოცემა აღნიშნავს, აშშ-ის პრეზიდენტი მხარს უჭერს კანონპროექტს და მისი კენჭისყრა სამშაბათს გვიან საღამოს იგეგმება.
“სენატორების ორპარტიულმა ჯგუფმა სამშაბათს დიდი ხნის ნანატრ კანონპროექტზე შეთანხმების მიღწევის შესახებ გამოაცხადა, რომელიც საშუალებას მისცემს პრეზიდენტ ტრამპს დამატებითი შეზღუდვები შემოიღოს რუსული ენერგორესურსების ძირითადი მყიდველების წინააღმდეგ, ასევე ირანის წინააღმდეგ. ტრამპმა თავისი მხარდაჭერა გამოხატა ამ ზომის მიმართ, რომელსაც გარდაცვლილი სენატორი ლინდსი გრემი იცავდა, ხოლო მასზე პროცედურული კენჭისყრა სამშაბათს გვიან საღამოთია დაგეგმილი,” - წერს გამოცემა.
კანონპროექტი ირანის წინააღმდეგ სანქციების მოქმედებას ახანგრძლივებს და ცალკე ეხება რუსული ბუნებრივი აირისა და ნავთობის ექსპორტიორებს.
კანონპროექტის გამოქვეყნებული ტექსტის თანახმად, ის ძალაუფლებას ანიჭებს აშშ-ის პრეზიდენტს ტარიფები შემოიღოს რუსული ნედლი ნავთობისა და ბუნებრივი აირის ხუთი ძირითადი მყიდველის წინააღმდეგ, და ასევე ხუთი ქვეყნის წინააღმდეგ, რომლებიც ყველაზე მეტად ეხმარებიან რუსეთს ენერგეტიკული სანქციების გვერდის ავლაში.
გამოცემა აღნიშნავს, რომ იმის მიუხედავად, რომ კანონპროექტისთვის დიდხანს იბრძოდნენ გრემი და უკრაინის სხვა მხარდამჭერები, მან შეიძლება საფრთხის ქვეშ დააყენოს აშშ-ის ისედაც არასტაბილური სავაჭრო ურთიერთობები ჩინეთთან და ინდოეთთან, რომლებიც რუსული ენერგორესურსების ძირითადი მყიდველები არიან.