ხაბეიშვილის თქმით, ხელისუფლებას ლეგიტიმაცია და მხარდაჭერა დაკარგული აქვს და ამიტომ ძალადობაზე არიან გადასული.
„კანონი, რომელიც ქართველი ხალხისთვის არ არის და ქართველ ხალხს არ სჭირდება, უნდა გაიწვიონ! ხელისუფლებას ლეგიტიმაცია, მხარდაჭერა დაკარგული აქვს და ამიტომ ძალადობაზე არიან გადასულები. რა მოსატანია ჩემი ფიზიკური ანგარიშსწორება, როდესაც ადამიანებს ოჯახებში უვარდებიან, სახლში აწიოკებენ, პენსიონერ დედ-მამას, მცირეწლოვან ბავშვებს, მეუღლეებს. ხალხს სახლთან ხვდებიან ჩასაფრებით და სცემენ, აგონიაში არიან, რადგან ხელისუფლებას კარგავენ და აუცილებლად დაკარგავენ, რადგან ხალხთან არიან დაპირისპირებაში.
12 წლის განმავლობაში ერთი კანონი გახსენდებათ, რომელიც ქართველი ხალხისთვის არის კარგი? - არა, ასეთი არ არსებობს! ჩვენი შეთავაზება კიდევ ერთხელ, გაიწვიონ ეს კანონი, ხუთი თვეა დარჩენილი არჩევნებამდე და ხალხს მიეცით მშვიდად გადაწყვეტილების შესაძლებლობა. თუ ვინმემ ქვეყანაში დაპირისპირება გააღვივა, ეს არის ივანიშვილი. ივანიშვილის გამოსვლის მეორე დღიდან ადამიანებს თავპირს ალეწავენ. „რუსული ოცნების" წარმომადგენლებს უნდა ესმოდეთ, რომ სახის ძვლები ხორცდება, ჩემს მაგალითზე გეუბნებით, მაგრამ როგორც კი ქართველი ხალხი მათ ხელისუფლებას გადატეხს წელში, ისინი ვეღარ გამთელდებიან. ქართველ ხალხთან ასე ძალმომრეობით საუბარი არ არის სწორი, ხელების გადაგრეხით, დაშინებით ქართველ ხალხს ვერ შეაშინებენ. ქართველ ხალხს მინდა მივმართო, ნუ შეშინდებით, ყველაფერი გაივლის, მოშუშდება, მაგრამ საქართველოს ეროვნულ ინტერესებზე ვსაუბრობთ. ეს არის ისტორიული მომენტი და ჩვენთვის მნიშვნელოვანია ის კანონი, რომელიც არის ევროკავშირისთვის მიუღებელი და ევროკავშირისკენ მიმავალ გზაზე ხელს უშლის საქართველოს, არ იქნას მიღებული.
მე ამ აქციაზე ვარ როგორც რიგითი მოქალაქე და არა პოლიტიკოსი. უნდა გვესმოდეს, რომ ეს არ არის პარტიული საკითხი, ეს არის საქართველოს ეროვნული ინტერესი და ეს „რუსული კანონი" ეწინააღმდეგება ჩვენი ქვეყნის ეროვნულ და ევროპულ ინტერესებს", - განაცხადა ლევან ხაბეიშვილმა.