ოპოზიციის შიგნით ახალი დაპირისპირებაა - „გირჩი" ერთ-ერთი ლიდერი იაგო ხვიჩია ოპოზიციური პარტიების ნაწილს არჩევნების შედეგების ირიბად აღიარებაში ადანაშაულებს. მისი თქმით, პარლამენტის რეალური ბოიკოტის რეჟიმში ორი პარტია რჩება - თავად „გირჩი" და ალეკო ელისაშვილის „მოქალაქეები", რადგანაც მხოლოდ მათ განაცხადეს უარი 31 ოქტომბრის არჩევნების შედეგებიდან გამომდინარე საბიუჯეტო დაფინანსების მიღებაზე. სხვებმა კი - „ნაციონალურმა მოძრაობამ", „ევროპულმა საქართველომ", „ლელომ", „პატრიოტთა ალიანსმა", „სტრატეგია აღმაშენებელმა" და „ლეიბორისტულმა პარტიამ" საპირისპირო გადაწყვეტილება მიიღეს. „ნაცმოძრაობაში" ამ ბრალდებას არ ეთანხმებიან და ამბობენ, რომ დაფინანსების მიღება არჩევნების შედეგების ამა თუ იმ ფორმით აღიარებას არ ნიშნავს.