სახელი*
    ელ–ფოსტა
    წერილის ტექსტი*
    საკონტროლო კოდი* კოდის განახლება
    გაგზავნა
    გია ხუხაშვილის აზრით, "ოცნებამ" ამ ეტაპზე თავი იმიტომ შეიკავა, რომ ეს მიმდინარე მოვლენებს არ დაბრალებოდა
    ელზა პაპოშვილი
    13.06.2018

     ანალიტიკოსი გია ხუხაშვილი "რეზონანსთან" შესაძლო სამთავრობო ცვილებებსა და ბოლო დღეებში ქვეყანაში განვითარებულ მოვლენებზე საუბრობს. იგი ამბობს, რომ მთავრობის ცვლილება რაც უფრო დროში იწელება, საზოგადოების უკმაყოფილება მით უფრო იზრდება.

    მისი თქმით, მმართველმა გუნდმა ამ ეტაპზე ცვლილებების განხორციელებისგან მხოლოდ იმიტომ შეიკავა თავი, რომ მიმდინარე პოლიტიკურ პროცესებზე მიბმული არ ყოფილიყო. დრო კი ჩართულია და ეს მხოლოდ და მხოლოდ "ოცნებას" დააზარალებს.

    ხუხაშვილი ბოლო დღეებში განვითარებულ მოვლენებსაც აფასებს და ამბობს, რომ რუსთაველზე მიმდინარე აქცია პოლიტიკოსებმა ჩაიგდეს ხელში, რაც სამართლიანობის აღდგენის მოთხოვნის მუხტს კარგავს. დაუშვებელია, რომ სარალიძისა და მაჩალიკაშვილის მოთხოვნები პოლიტიკურმა პროცესებმა ჩაანაცვლოს.

    ანალიტიკოსის თქმით, ხელისუფლებას ამ ადამიანებთან სწორი კომუნიკაცია უნდა ჰქონდეს, რათა სიტუაციის კონტროლი შეძლოს და პოლიტიკურად ანგაჟირებულ ადამიანებს სიტუაციით სარგებლობის უფლება არ მისცეს.

    "რეზონანსი": "ქართული ოცნების" დახურული სხდომის შემდეგ გაჩნდა მოლოდინი და მედიაში ვრცელდებოდა ინფორმაცია, რომ კონკრეტული მინისტრების გადაყენება მოხდებოდა. შეხვედრის შემდეგ კი არჩილ თალაკვაძემ განაცხადა, რომ ამაზე საუბარი არ ყოფილა. რა მოხდა დახურულ სხდომაზე?

    გია ხუხაშვილი: ეს მხოლოდ დროის საკითხია, როგორც ჩანს, გუნდმა ამ ეტაპზე ჩათვალა, რომ საჭირო არ იყო. კი, ბატონო, მათი გადასაწყვეტია, მაგრამ დრო მიდის. ყველაზე გულდასაწყვეტი ის არის, რომ დრო იკარგება.

    გარდა ამისა, ჟურნალისტებმა ტექნოლოგიური შეცდომა დაუშვით. ჯერ, როგორც წესი, პრემიერი განაცხადებს წასვლაზე და მინისტრების შეცვლა შემდეგ ხდება.

    ახალი მინისტრთა კაბინეტის განხილვა სხდომაზე არც შეიძლება ყოფილიყო. ფორმალურად ასე ხდება, ჯერ პრემიერი უნდა გადადგეს და ახალი მინისტრთა კაბინეტის წარდგენა შემდეგ მოხდეს.

    "რ": ფიქრობთ, რომ მთავრობაში ცვლილება დასაჩქარებელია და რაც დრო გადის, საზოგადოების უკმაყოფილება მით უფრო გაიზრდება?

    გ.ხ: რა თქმა უნდა, დღეს კი არა, მე ჯერ კიდევ როდის ვსაუბრობდი, რომ ცვლილება სასწრაფოდ იყო განსახორციელებელი. როგორც ჩანს, "ოცნებამ" ამ ეტაპზე თავი იმიტომ შეიკავა, რომ მიმდინარე მოვლენებს არ დაბრალებოდა.

    ეს ყველაფერი უკვე გუშინ იყო გასაკეთებელი. მმართველობითი სისტემაა გადასახედი და არა კონკრეტული პირების გადაადგილება. ალბათ ამ პოლიტიკურ პროცესებზე მიბმა არ სურდათ.

    "რ": როგორ შეაფასებთ გუშინ რუსთაველზე განვითარებულ მოვლენებს? მესამე სექტორის წარმომადგენლები ფიქრობენ, რომ კარვების დაშლა უკანონო ქმედება იყო, რამაც სიტუციის ესკალაციის რისკი შექმნა.

    გ.ხ.: ხელისუფლება სიტუაციას შორიდან მშვიდად აკვირდებოდა, სანამ აქცია კანონის ფარგლებს არ გასცდა. კანონის დარღვევის შემდეგ, როდესაც აქციის მონაწილეებმა კარვები შუა რუსთაველის გამზირზე გადაიტანეს და გზა გადაკეტეს, მათ სრულიად ადეკვატურად იმოქმედეს.

    არ მგონია, რომ ხელისუფლებას ნერვებმა უღალატა. პატარა ინციდენტებს თუ არ ჩავთვლით, დაკავება საკმაოდ ცივილიზებული ფორმით ჩატარდა. ზოგიერთი დაკავებული ეგზოტიკურ ფორმაში ინტერვიუებსაც კი იძლეოდა.

    თუმცა ხელისუფლებას იმის ილუზია არ უნდა გაუჩნდეს, რომ რადგან პროტესტი შეწყდა, სარალიძის საქმე არ უნდა გამოიძიონ. ასევე, მნიშვნელოვანია, გამოძიებულ იქნეს, ვინ და რატომ გააყალბა ეს საქმე.

    კარვების შუა გზაზე გადატანა წმინდა პროვოკაცია იყო. მას შემდეგ, რაც დაინახეს, რომ ხალხს ვერ აგროვებდნენ და გზის გადაკეტვის კანონიერი გზა აღარ არსებობდა, ასეთი გადაწყვეტილება მიიღეს. ეს იყო პროვოკაცია არა მხოლოდ ხელისუფლების, არამედ საზოგადოების მიმართაც.

    მიშა ხომ ვერ მოისვენებს. მას არჩევნების გზით გამარჯვების გზა ჩაკეტილი აქვს და ერთადერთი გამოსავალი რევოლუციური სცენარით მოქმედებაა. როდესაც საზოგადოების დიდი ტალღის აგორება ვერ შეძლეს, უკვე პროვოკაციაზე გადავიდნენ.

    როცა უკვე წმინდა პოლიტიკური მოთხოვნები გამოჩნდა, ხალხმა ეს დაინახა და აქციებზე ამიტომ აღარ მივიდა. ეს იყო ორგანიზატორების მხრიდან პოლიტიკური შეცდომა.

    "რ": როგორ აფასებთ "ევროპული საქართველოს" საპარლამენტო კომისიაში ყოფნას. თავად ოპოზიციის ზოგიერთი ლიდერი ამ ფაქტს აბსურდად მიიჩნევს. გვახსოვს, რომ არც სარალიძე და არც აქციის სხვა მონაწილეები საპარლამენტო კომისიის შექმნას არ ითხოვდნენ და რატომ გადაწყვიტა მმართველმა გუნდმა მისი შექმნა?

    გ.ხ: "ევროპული საქართველოს" მიერ ამ კომისიის დაარსება ისტორიული ცინიზმია. არ შეიძლება, ადამიანებმა, რომლებიც ზუსტად მსგავს დანაშაულში არიან ეჭვმიტანილები, ხელისუფლება გაასამართლონ და ის კითხვები დაუსვან, რომლებზეც საზოგადოებისთვის პასუხები თავად არ გაუციათ.

    ბოკერია დღეს კახიძესა და კაპანაძეს არის ამოფარებული. სინამდვილეში ეს პარტია იმ სისტემაზე პასუხისმგებლობას სრულად იზიარებს, რომელიც ამ დანაშაულის ექოა. ეს არის ხელისუფლების მხრიდან სრული სიბრიყვე. ეს კომისია ამ ჯგუფის ბაზაზე არ უნდა შექმნილიყო.

    "რ": მაჩალიკაშვილმა განაცხადა, რომ ის 15 ივნისიდან პანკისში აქციებს დაიწყებს. როგორ ფიქრობთ, არსებობს თუ არა ამ რთულ ხეობაში პროვოკაციის საფრთხე და როგორ უნდა იმოქმედოს ამ შემთხვევაში ხელისუფლებამ?

    გ.ხ: მაჩალიკაშვილთან დაკავშირებით ხელისუფლება, მარტივად რომ ვთქვათ, არაგონივრულად იქცევა. დღემდე ხეობაში არც ერთი პოლიტიკოსი არ ჩასულა. ის ხალხი თავს მიტოვებულად გრძნობს და განცდა აქვთ, რომ ამ ქვეყნის მოქალაქეები არ არიან. ხელისუფლება უგუნურად იქცევა და ხეობას სპეცსამსახურების ამარა ტოვებს.

    პოლიტიკოსის ფუნქცია ის არის, რომ ამ სიტუაციაში მოსახლეობასა და სპეცსამსახურების შუაში ჩადგეს, ამ ადამიანებს დაუყვავოს, აუხსნას. ამას არავინ აკეთებს. ამ სიტუაციას ვინ რაში გამოიყენებს, კაცი არაა გამრკვევი.

    აქ პოლიტიკოსებმა უნდა იმუშაონ. მაჩალიკაშვილი ულტიმატუმებით იმიტომ საუბრობს, რომ მასთან კომუნიკაცია არავის აქვს. პოლიტიკოსები არ ელაპარაკებიან. პრემიერს რამდენჯერ მოვუწოდე, რომ ჩასულიყო. ეგ კი არა, კანცელარიასთან მისულ კაცს არ ხვდებოდა. ადგილობრივი დეპუტატი არ ჩასულა, რაც ეს ტრაგედია მოხდა.

    ლიცენზია
    დატოვე კომენტარიკომენტარები (0)
    ჩაწერა სახელი

    Copyright © 2006-2018 by Resonance ltd. . All rights reserved