სახელი*
    ელ–ფოსტა
    წერილის ტექსტი*
    საკონტროლო კოდი* კოდის განახლება
    გაგზავნა
    მსოფლიო ბაზარზე ნავთობი ერთბაშად გაძვირდა და თუ ვითარება სწრაფად არ შეიცვალა, ფასის ზრდა გარდაუვალი იქნება
    ნათია ლომიძე
    13.04.2018

     მსოფლიო ბაზარზე ნავთობი ძვირდება. 1 ბარელის ღირებულებამ 72 აშშ დოლარს გადააჭარბა. შეიძლება ითქვას, რომ ნავთობის ფასი წლის ყველაზე მაღალ ნიშნულზეა. საერთაშორისო ბაზარზე საწვავის გაძვირების ერთ-ერთ ტენდენციად დოლარის გაუფასურებაც შეიძლება ჩაითვალოს. საქართველოში საწვავის გაძვირების საფრთხეა, თუმცა იმპორტიორები ამბობენ, რომ ნავთობკომპანიებმა, შესაძლოა, ფასის გაზრდისგან თავი შეიკავონ.

    ბოლო პერიოდში ბირჟებზე თვალში საცემად არის გაძვირებული ბენზინი და დიზელიც. "პლატცის" მიხედვით, 10 აპრილის მდგომარეობით, 1 ტონა ბენზინი 672 დოლარი ღირს, ხოლო - დიზელი 626 დოლარი. ბოლო 1 თვეში ორივე ტიპის საწვავი დაახლოებით 11%-ით გაძვირდა.

    ამჟამად ბრენდირებულ ბენზინგასამართ სადგურებს შორის "ლუკოილს" ყველაზე დაბალი ფასი აქვს. 1 ლიტრი "რეგულარი" 2,09 ლარად იყიდება, სხვა აგს-ებზე კი ფასი 2.17-დან 2,25 ლარამდე მერყეობს. რაც შეეხება არაბრენდირებულ სადგურებს, იქ საწვავის ღირებულება 1.95-2,0 ლარია.

    საერთაშორისო ბაზარზე არსებული ტენდენციის მიუხედავად, ნავთობპროდუქტების იმპორტიორთა კავშირის ხელმძღვანელი ვანო მთვრალაშვილი უახლოეს პერიოდში საწვავის საცალო ფასის ზრდას არ ელოდება. როგორც მან "რეზონანსს" განუცხადა, სამომავლოდ რა იქნება, დაზუსტებით საუბარი გაჭირდება, რადგან მსოფლიო ბაზარზე არსებული ფასი რამდენიმე დღის პანიკის შედეგია და უახლოეს მომავალში შეიძლება შეიცვალოს.

    "ნავთობის ღირებულება მართლაც გაიზარდა. მსოფლიო ბაზარზე ეს არის ბოლო დღეებში მიმდინარე პოლიტიკური დაძაბულობის გამოძახილი, ძირითადად რაც სირიის გარშემო ხდება. ამ ვითარებამ განაპირობა, რომ ფასი წავიდა ზემოთ. ზოგადად, ბოლო პერიოდში ბირჟებზე გაძვირების ტენდენციაა როგორც ნედლ ნავთობზე, ასევე უშუალოდ საწვავზე.

    ვფიქრობ, ჩვენთან საგანგაშო მდგომარეობა ამ ეტაპზე არ არის. მიუხედავად იმისა, რომ საერთაშორისო ფასი გაიზარდა, ლარი გამყარდა დოლარის მიმართ. ამ ვითარებამ სიტუაცია დაასტაბილურა. თუ ჩვენ წინა თვეს მიმოვიხილავთ, მარტში ნავთობის ღირებულება მატულობდა, საქართველოში კი საწვავის საცალო ფასი 4-5 თეთრით შემცირდა. ამ მხრივ ერთ-ერთი მნიშვნელოვანი ლარის გამყარებაა.

    რა იქნება მომავალში, ამაზე ჯერ ნაადრევია საუბარი. რამდენიმე დღის ტენდენციით ვერ ვიხელმძღვანელებთ. ხვალ-ზეგ რა მოვლენები განვითარდება, ამაზე საუბარი ახლა რთულია. გაძვირებას ამ ეტაპზე ნაკლებად ვვარაუდობ, მაგრამ შემდეგ შეიძლება ვითარება შეიცვალოს. თვის ბოლოს რა მოცემულობა იქნება, ამაზე ცოტა ხნის შემდეგ შეგვიძლია ვისაუბროთ", - განუცხადა "რეზონანსს" მთვრალაშვილმა.

    მსოფლიო ბაზარზე ნავთობის ფასის ცვლილებაზე კომენტარს გამოთქვამს "ლუკოილ ჯორჯიას" დირექტორის მოადგილე შავლეგ მიშველაძეც. მისი მტკიცებით, მიუხედავად იმისა, რომ მსოფლიო ბაზარზე საკმაოდ რთული ვითარებაა, "ლუკოილი" მაქსიმალურად ცდილობს, გამოიყენოს ყველა რესურსი საწვავის ფასის შესანარჩუნებლად. ბრენდირებულ სადგურებს შორის მათ მიერ დადგენილ ყველაზე დაბალ ფასს მიშველაძე იმით ხსნის, რომ ქვეყანაში ეროვნულმა ვალუტამ გამყარება დაიწყო, რაც საწვავის ფასზეც აისახა.

    "მსოფლიო ბაზარზე არსებული ვითარება საკმაოდ არასტაბილურია. ბევრ რამეზე გახდა დამოკიდებული ნავთობის ფასი. ეს არის არა მხოლოდ ეკონომიკის ან გეოპოლიტიკის შედეგი, არამედ ბევრი სხვა ფაქტორის ურთიერთკავშირი. შესაბამისად, პროგნოზი ურთულესი გახდა.

    რაც შეეხება საქართველოს ბაზარს და ამჟამინდელ ფასს, მთელი ძალისხმევით ვცდილობთ, შევინარჩუნოთ არსებული ნიშნული. ჩვენი მიზანია, მაქსიმალურად მცირე გავლენა იქონიოს იმ მოვლენებმა, რაც საერთაშორისო ბაზარზე ფასწარმოქმნას უკავშირდება. რასაკვირველია, მაინც ვერ გავექცევით მსოფლიო ბაზარზე არსებულ ტენდენციას. საბედნიეროდ, გვაქვს საკმაოდ პოზიტიური სურათი, ლარი მყარდება დოლარის მიმართ. ამიტომ ამ ეტაპზე, საერთაშორისო ბირჟებზე განვითარებული მოვლენების მიუხედავად, გაძვირებას ვერ დაგიდასტურებთ. ეს ძალიან კარგია ჩვენთვისაც და მომხმარებლისთვისაც. იმედია, სამომავლოდაც მოგვეცემა საშუალება, ამჟამინდელი ფასი შევინარჩუნოთ. "ლუკოილი" მაქსიმალურად ცდილობს, გამოიყენოს ყველა რესურსი სტატუს-კვოს შესანარჩუნებლად", - განუცხადა "რეზონანსს" მიშველაძემ.

    ლიცენზია
    დატოვე კომენტარიკომენტარები (0)
    ჩაწერა სახელი

    Copyright © 2006-2018 by Resonance ltd. . All rights reserved