სახელი*
    ელ–ფოსტა
    წერილის ტექსტი*
    საკონტროლო კოდი* კოდის განახლება
    გაგზავნა
    "უეცარი ცვლილება ამ მხრივ მოსალოდნელი არ არის, მაგრამ..."
    თეო გუდავაძე
    12.02.2019

     სასამართლო სისტემასთან დაკავშირებული სკანდალები როგორც პოლიტიკურ, ასევე ეკონომიკურ მდგომარეობაზეც ცუდად იმოქმედებს. მოსამართლეების ირგვლივ განვითარებული მოვლენები ინვესტორებისათვის ერთ-ერთი შემაფერხებელი ფაქტორი იქნება. ჯერჯერობით ამ მიმართულებით დიდი ვარდნა არ არის, მაგრამ თუკი სისტემური პრობლემები არ მოგვარდა, უცხოური კაპიტალის კლება, საბოლოო ჯამში, დიდ გავლენას მოახდენს ეკონომიკაზე.

    არასტაბილურობა სასამართლოში საინვერსტიციო გარემოზე თანდათან მოიტანს უარყოფით შედეგს. ე.წ. განვითარებად ქვეყნებში საქმის წამოწყების წინ, ერთ-ერთი მთავარი ინდიკატორი სწორედ სასამართლოს დამოუკიდებლობა, გამჭვირვალობა და მის მიმართ ნდობაა. საქართველოში ბოლო წლებში ამ მხრივ მუდმივად გაუგებრობა და სკანდალებია.

    ეკონომისტი, პროფესორი ვახტანგ ჭარაია "ბიზნეს-რეზონანსთან" საუბრისას აღნიშნავს, რომ სასამართლო სისტემის რყევა ცუდ გავლენას მოახდენს უცხოურ ინვესტიციებზე, ამიტომ ერთხელ და სამუდამოდ აუცილებელია მისი მოწესრიგება:

    "რასაკვირველია, რყევებს, რომლებიც ახლა სისტემაშია, გავლენა ექნება საინვესტიციო გარემოზეც. კარგია, რომ ჯერ არ ჩანს გამამართლებელი განაჩენების ან უსამართლო განაჩენებთან დაკავშირებული კითხვის ნიშნები, მაგრამ ეს არ იძლევა დამშვიდების საბაბს.

    საკმაოდ მსხვილი ინვესტორები ქვეყნაში დღესაც არიან, მიუხედავად იმისა, რომ ეს პრობლემები სასამართლოში არსებობს. უეცარი ცვლილება ამ მხრივ მოსალოდნელი არ არის. საუბარი, თითქოს ბიზნესმენები შეწყვეტენ საქართველოში თანხის დაბანდებას, სანამ სასამართლოში ყველა პრობლემა არ აღმოიფხვრება, არასწორია. შემოდიან ახლაც და შემოდიოდნენ ბევრად უფრო ცუდი ვითარების დროსაც. აქვე ისიც უნდა ითქვას, რომ საქართველოს რეიტინგს, რასაც პოტენციური ივესტორი უყურებს, განაპირობებს ძალიან ბევრი ფაქტორი და მათ შორის ერთ-ერთია სასამართლოს დამოუკიდებლობა და სანდოობა", - აღნიშნა "ბიზნეს-რეზონანსთან" ვახტანგ ჭარაიამ.

    სასამართლოში არსებული გაურკვეველი მდგომარეობა დიდ გავლენას მოახდენს უცხოურ ინვესტიციებზე. პოტენციურმა ინვესტორებმა ქვეყანაში არსებული დაძაბულობის გამო, შესაძლოა, თავი შეიკავონ დიდი თანხების დაბანდებისაგან, თუმცა ჯერჯერობით ეს პრობლემა დღის წესრიგში არ დგას. მიუხედავად ამისა, აუცილებელია სასამართლოს პრობლემების სრულად მოგვარება უმოკლეს ვადებში, რათა შიდა პრობლემებმა მასშტაბური პროექტების წამოწყებას ხელი არ შეუშალოს.

    აკადემიკოსი ავთანდილ სილაგაძე აღნიშნავს, რომ სასამართლო სისტემის რყევა მნიშვნელოვნად იმოქმედებს უცხოურ ინვესტიციებზე და სამომავლოდ პირდაპირ გავლენასაც მოახდენს:

    "სასამართლოში მიმდინარე პოცესები აბსოლუტურად ყველა სფეროზე ახდენს პირდაპირ თუ არაპირდაპირ გავლენას. თავისთავად ცხადია, ამ კატეგორიაშია ინვესტიციებიც. როცა სასამართლოს მიმართ ნდობა დაბალია, რა თქმა უნდა, იგი პირდაპირ ასახვას ჰპოვებს უცხო ქვეყნის მოქალაქეზე, რომელმაც ფული უნდა დააბანდოს და გაუგებრობის შემთხვევაში, სწორედ სასამართლოს გზით უნდა დაიცვას თავი. ეს საკვანძო საკითხია, რადგან პირდაპირ კავშირშია ქონებისა და საკუთრების დაცვასთან, რომლის გარანტორიც სასამართლოს შტოებია, ვისაც მმართველი გუნდის ნდობაც კი არ აქვთ, აღარაფერს ვამბობ საზოგადოებაზე.

    ვფიქრობ, დღეს არსებული ვითარება იმდენად არ აისახება მოკლევადიან პერიოდში, თუმცა საბოლოოდ როგორც საერთაშორისო თანამეგობრობისა და სადამკვირვებლო ორგანიზაციების დასკვნებზე, ასევე ინვესტიციებზეც დიდი გავლენის მომხდენი იქნება", - აღნიშნა "ბიზნეს-რეზონანსთან" საუბრისას ავთო სილაგაძემ.

    ლიცენზია
    დატოვე კომენტარიკომენტარები (0)
    ჩაწერა სახელი

    Copyright © 2006-2019 by Resonance ltd. . All rights reserved