სახელი*
    ელ–ფოსტა
    წერილის ტექსტი*
    საკონტროლო კოდი* კოდის განახლება
    გაგზავნა
    პირველ რიგში, ავეჯისა და სამშენებლო მასალების ყიდვა-გაყიდვა გაჭირდა
    მარი ჩიტაია
    14.03.2019

     ძველ, საბჭოურ პერიოდში აშენებულ ბინებზე ფასი მოიმატებს. როგორც დეველოპერები ამბობენ, ამის მიზეზი მშენებლობების ტემპის დაცემაა, რამაც შეიძლება, მიწოდების მხრივ პრობლემა შექმნას. სპეციალისტების ინფორმაციით, მშენებლობების დიდი ნაწილი შეჩერებულია, მასშტაბური პროექტების განხორციელებაზე კი საუბარიც არ არის. ასეთ ვითარებაში უძრავი ქონების ბაზარი საბანკო და სამშენებლო რეგულაციების გამო აღმოჩნდა. რა ტენდენცია გამოიკვეთა და როგორი იქნება რეგულაციების გავლენა სექტორზე, სპეციალისტებს შეფასება უჭირთ. ბაზარზე დიდი გაურკვევლობაა.

    უძრავი ქონების სააგენტოებში აცხადებენ, რომ ბინებზე მოთხოვნა უკვე დაახლოებით 40%-ით შემცირდა და სამომავლოდ კიდევ დაიკლებს. მეტი პრობლემაა მოსალოდნელი რეგიონებში, სადაც ძლივს წამოიწია სამშენებლო სექტორმა და ახლა საერთოდ ჩაკვდება. მშენებლობის ტემპი შენელდა ბათუმშიც, ქუთაისში - კიდევ უფრო მეტად, სხვა რეგიონებში მოთხოვნა ისედაც არ იყო.

    უძრავი ქონების სფეროს ექსპერტი გურამ ფალავანდიშვილი ამბობს, რომ ტენდენცია იცვლება და ძველ ბინებზე მოთხოვნა მატულობს, რაც ფასზეც ადეკვატურად აისახება. მისი ვარაუდით, საბჭოური ბინების ფასი საბოლოოდ მოიმატებს.

    ფალავანდიშვილის შეფასებით, ბაზარზე არსებული მდგომარეობა გადამდები აღმოჩნდა პარალელური ბიზნესებისთვისაც, განსაკუთრებით კი ავეჯისა და სამშენებლო მასალების ბიზნესს უჭირს.

    "სამშენებლო პროცესი ერთ ადგილზე გაჩერდა, რაც კრიზისს გამოიწვევს და მშენებლობაზე მიბმული ბიზნესიც გაჭირვებაში აღმოჩნდება. სამშენებლო მასალებისა და ავეჯის ბიზნესს ეს პრობლემა დაეტყო კიდეც. რეგულაცია აუცილებელი იყო, მაგრამ ნაჯახის ეფექტი ახლავს. მოთხოვნა სტაბილურად იყო და ახლა აღარ არის. ასე თუ გაგრძელდება, ახალი ბინების დეფიციტი გარდაუვალი იქნება.

    ველოდები, რომ ძველი, ე.წ. საბჭოური ბინების ფასი მოიმატებს. ახალი არ აშენდება და ძველ ბინებზე მოთხოვნაც და ფასიც გაიზრდება. ახლა ისეთი ვითარებაა, რომ მიწის ნაკვეთების შოვნაც ჭირს. შეიძლება, შეიცვალოს სიტუაცია, მაგრამ ჯერ ნამდვილად ცუდი მდგომარეობაა. პრობლემა გარეუბნებსაც შეეხო.

    ლამისაა, სამშენებლო სექტორის პარალიზება მოახდინონ, ეს რეგულაციებმა გამოიწვია. ცვლილება კარგია, მაგრამ დრო ცუდად შეირჩა და ამან მდგომარეობა საგრძნობლად დაამძიმა. ასე თუ გაგრძელდა, უძრავი ქონების ბაზარზე კრიზისი გარდაუვალი გახდება. პრობლემაა როგორც თბილისში, ასევე რეგიონებში, ბათუმში ეს პროცესი დაიწყო, ქუთაისში ისედაც არ იყო სახარბიელო ვითარება, სხვა ქალაქებზე საუბარიც ზედმეტია", - განუცხადა "რეზონანსს" ფალავანდიშვილმა.

    საპირისპირო მოსაზრება აქვს კომპანია "ბონუსის" წარმომადგენელ ილია ინაშვილს. ის ფიქრობს, რომ რეგულაციების გავლენა ზაფხულის პერიოდში გამოიკვეთება და შესაძლოა, უძრავი ქონების ფასი შემცირდეს.

    "ამ დროისთვის ბინებზე მოთხოვნა დაახლოებით 40%-მდე არის შემცირებული. რეგულაციებმა ამ მხრივ პრობლემა შექმნა. მოკლე პერიოდში ტენდენციას ვერ დავინახავთ, დრო სჭირდება, სანამ მომხმარებელი სიტუაციას მოერგება. მომხმარებელიც დაბნეულია.

    რაც შეეხება გაქირავების სეგმენტს, ხალხი უფრო ბინის დაქირავებას ცდილობს. გირაოზე მოთხოვნაც არ არის. არ ვიცით, საფასო ტენდენცია საითკენ აიღებს გეზს, რეგულაციებიდან გამომდინარე, ფასის კლებას ველოდით, მაგრამ ასევე არა უცებ, არამედ გრძელვადიან პერსპექტივაში. გამოსავალი თუ არ მონახეს, ეს პროცესი გარდაუვალი იქნება.

    საბანკო რეგულაციების გავლენა უფრო ზაფხულის პერიოდში გამოიკვეთება. ვფიქრობ, აგვისტოდან ფასი დაიწევს. მიწოდებაც შემცირდება, სამშენებლო რეგულაციები ამ მხრივ გავლენას მოახდენს", - ვარაუდობს ილია ინაშვილი.

    უძრავი ქონების სააგენტოების ერთი ნაწილის ინფორმაციით, ბინების რეალიზაციის კლების საპირისპიროდ, კომერციულ ფართებზე მოთხოვნა გაზრდილია. კომპანია "კიბის" ხელმძღვანელი ნელი გოგუაძე ამბობს, რომ მსყიდველუნარიანი მოსახლეობა კომერციულ ფართებს შემოსავლის გაჩენის მიზნით ყიდულობს.

    "აშკარა დაბნეულობაა. მოთხოვნა რაღაც დონეზე არის, მაგრამ ყველა მცირეფართიან და დაბალფასიან ბინას ეძებს. ქირაზეც არ გაზრდილა მოთხოვნა, თუმცა არც შემცირებულა. რაც შეეხება ყიდვას, უფრო კომერციული ფართებით არიან დაინტერესებული. სიტუაციას ვაკვირდებით და ვამჩნევთ, რომ ხალხი უკვე გაქირავებული კომერციული ფართის ყიდვას ცდილობს, რათა შემოსავალი მიიღონ. სასტუმროს ტიპის სახლების მიმართაც გაჩნდა მოთხოვნა", - ამბობს "რეზონანსთან" გოგუაძე.

    უძრავი ქონების ბაზრის პრობლემაზე საუბრობენ იურისტებიც. სამშენებლო სამართლის ლექტორის, უჩა ზაქაშვილის თქმით, სამშენებლო სფეროს რეგულაციები ბაზარზე არსებულ გამოწვევებს ვერ ასახავს.

    "მშენებლობის დაწყების ნებართვაზე ბევრ კომპანიას უარი ეთქვა. სამართლებრივად ეს პოზიცია დასაბუთებული არ არის. გენგეგმა არ არის ჯერ მიღებული და გარკვეული ცვლილებები იქაც შეიძლება, შევიდეს. ესეც გახდა დამაბრკოლებელი გავლენა. ბევრი წინააღმდეგობაა, რომლებიც აფერხებს დარგის განვითარებას და ინვესტორებსაც კაპიტალის დაბანდების საფრთხეს უქმნის.

    საბოლოოდ ყველაფერი ქმნის არაპროგნოზირებადობისა და დაუცველობის განცდას ინვესტორებში და ბიზნესზე უარყოფითად მოქმედებს. რეალურად, ინვესტორებმა არ იციან, რა ნორმებით იხელმძღვანელონ, რეგულაცია კარგია, მაგრამ "უკან მიდევნებული ლამპარივითაა", - აღნიშნა "რეზონანსთან" ზაქაშვილმა.

    ლიცენზია
    დატოვე კომენტარიკომენტარები (0)
    ჩაწერა სახელი

    Copyright © 2006-2019 by Resonance ltd. . All rights reserved
    ×