მარი ჩიტაია
25.12.2014

ხელოვნური ნაძვის ხეები, წინა წელთან შედარებით, 10-15%-ით გაძვირდა. მოვაჭრეების ინფორმაციით, ცვლილება ლარის დევალვაციამ გამოიწვია. რაც შეეხება ცოცხალ ნაძვის ხეს, ფასი თითქმის არ შეცვლილა და მისი შეძენა ბაზრობებზე 5-10 ლარის ფარგლებშიც კი არის შესაძლებელი.

მარი ჩიტაია
24.12.2014

საქართველოში რუსული და უკრაინული პროდუქტების სიმცირეა. დედაქალაქის სუპერმარკეტებში აცხადებენ, რომ ცვლილება განსაკუთრებით რუსული წარმოების პროდუქტს დაეტყო და მარაგი აშკარად შემცირებულია. ეს ეხება როგორც ტკბილეულს, ასევე სხვადასხვა დასახელების ბურღულეულს, ზეთს, მარცვლეულს და სხვა.

მაკა ხარაზიშვილი
24.12.2014

სასოფლო-სამეურნეო მიწებზე სტატუსის შეცვლის მორატორიუმი, შესაძლოა, ივლისამდე გაგრძელდეს. თუმცა მორატორიუმის გაგრძელებას აზრი დაეკარგება, თუკი ეკონომიკის სამინისტრო მიწის პრივატიზაციაზე მორატორიუმს ასევე არ გაახანგრძლივებს. სამინისტროში ჯერჯერობით ვერ გარკვეულან, დაიწყონ თუ არ დაიწყონ სახელმწიფოს საკუთრებაში არსებული მიწების პრივატიზაცია.

მაკა ხარაზიშვილი
23.12.2014

 სახელმწიფო ბიუჯეტი 300-400 მილიონი ლარით გაირღვევა. 11 თვის მონაცემებმა ქვეყნის მთავარი ფინანსური დოკუმენტის გადარჩენის იმედი საბოლოოდ მოსპო. ბოლო წლებში პირველად საგადასახადო შემოსავლების შესრულების საკითხიც კი კითხვის ნიშნის ქვეშ დადგა.

ელზა წიკლაური
23.12.2014

საქართველოში ბიზნეს-საქმიანობის მაჩვენებელი გაუმჯობესდა, ყოველ შემთხვევაში, სტატისტიკურად. "საქსტატის" მონაცემებით, შარშანდელთან შედარებით გაზრდილია ბიზნეს-სექტორის ბრუნვა, პროდუქციის გამოშვება, დასაქმებულთა რაოდენობაც და შრომის ანაზღაურებაც. ამ დროს კი ბიუჯეტში ის ძირითადი პარამეტრები, რომლებიც მეტწილად ბიზნეს სექტორის საქმიანობის ხარჯზე ფორმირდება, ვერ სრულდება. 2014 წლის 11 თვის მონაცემებით, ბიუჯეტში დღგ-ს მაჩვენებელი - 91%-ით, საშემოსავლო გადასახადი კი 89,2%-ითაა შესრულებული.

მაკა ხარაზიშვილი
20.12.2014

ლარი უმნიშვნელოდ გამყარდა, თუმცა ეს არ არის ის კურსი, რომელიც მოსახლეობას დამშვიდების საფუძველს მისცემს. ეროვნული ბანკის მიერ დადგენილი კურსით 1 დოლარი 1,9156 ლარი ღირს. მიუხედავად იმისა, რომ სურსათი გაძვირდა, საერთაშორისო სავალუტო ფონდში აცხადებენ, რომ ინფლაცია დაგეგმილ მაჩვენებელზე დაბალია, შესაბამისად, ეროვნულ ბანკს მონეტარული პოლიტიკის გაზრდის საფუძველი არ ჰქონდა.

მაკა ხარაზიშვილი
20.12.2014

სტატისტიკის ეროვნულმა სამსახურმა მე-3 კვარტალში 5,6%-იანი ეკონომიკური ზრდა დააფიქსირა. ეს ერთ-ერთი ყველაზე მაღალი მაჩვენებელია მთელი ევროპის მასშტაბით. მთავრობაში ამ მაჩვენებელს წარმატებულად აფასებენ და აღნიშნავენ, რომ საქართველოს რეგიონში ყველაზე მაღალი ეკონომიკური ზრდა აქვს.

მარი ჩიტაია
20.12.2014

"ფორბსის" ახალმა რეიტინგმა ხელისუფლებას ინვესტიციების მოსაზიდად მეტი სტიმული მისცა. მთავრობაში ფიქრობენ, რომ პოზიტიური ინფორმაცია პოტენციური ინვესტორებისთვის სასიკეთო სიგნალად იქცევა.

მაკა ხარაზიშვილი
19.12.2014

 პრემიერ-მინისტრის მუშტის დაბრახუნების შემდეგ ნავთობიმპორტიორებმა ბენზინი მცირედით გააიაფეს, თუმცა ეს ზღვაში წვეთია. ავტოგასამართ სადგურებზე საწვავის ღირებულება საერთაშორისო ფასისგან მკვეთრად განსხვავებულია. ბოლო რამდენიმე თვის განმავლობაში მსოფლიოში ბენზინისა და დიზელის ფასი განახევრდა. "რეზონანსის" გათვლებით, საქართველოში 1 ლიტრი ბენზინი საცალო ქსელში მაქსიმუმ 1,5 ლარი უნდა ღირდეს.

მარი ჩიტაია
19.12.2014

საქართველოში პურის ფქვილის ფასი მოიმატებს. ქართველი მეხორბლეები ვარაუდობენ, რომ 1 ტომარა ფქვილი 4 ლარით გაძვირდება, თუმცა ცვლილება პურის ფასზე არ აისახება. ისინი ირწმუნებიან, რომ რუსეთიდან ხორბლის იმპორტის შეჩერება ქართულ ბაზარს ვერ დააზარალებს.

ელზა წიკლაური
19.12.2014

საქართველოში დასაქმებულთა საშუალო ხელფასი გაიზარდა. სტატისტიკის ეროვნული სამსახურის მონაცემებით, 2014 წლის მესამე კვარტალში, წინა წლის ანალოგიურ პერიოდთან შედარებით, საშუალო ანაზღაურებამ 6,3%-ით მოიმატა, 2012 წელთან შედარებით კი თითქმის 13%-ით. ერთადერთი სფერო, სადაც საშუალო ხელფასი შემცირდა, სახელმწიფო მმართველობაა, იქ კლება, დაახლოებით, 5,3%-ია.

მაკა ხარაზიშვილი
18.12.2014

ეროვნული ვალუტის მკვეთრი გაუფასურების ახალი ტალღა დაიწყო, ეროვნული ბანკი კი ინტერვენციების განხორციელებას არ ჩქარობს. 18 დეკემბრის კურსი უკვე საგანგაშოა - 1 დოლარი 1.9114 ლარი. ვალუტის გადამცვლელ ჯიხურებში კი ერთი დოლარის ფასმა 1,94 ლარს მიაღწია. ერთი კვირის წინათ ეროვნული ვალუტის გაუფასურებას უკვე მოჰყვა სასურსათო პროდუქტზე ფასის ზრდა. მოვაჭრეები იგივე ნაბიჯის გადასადგმელად ემზადებიან.


Copyright © 2006-2020 by Resonance ltd. . All rights reserved
×