სახელი*
    ელ–ფოსტა
    წერილის ტექსტი*
    საკონტროლო კოდი* კოდის განახლება
    გაგზავნა
    მაკა ხარაზიშვილი
    21.12.2010

      გაისად სახელმწიფო 35 მილიონი ლარის შიდა ვალს დაფარავს. სახელმწიფო შიდა ვალის ზღვრული მოცულობა 1,7 მილიარდ ლარს შეადგენს. მათ შორის, ეროვნული ბანკისათვის განკუთვნილი ერთწლიანი ყოველწლიურად განახლებადი სახელმწიფო ობლიგაცია 640 მილიონზე მეტია, ე. წ. "ისტორიული ვალები" 675 მილიონი ლარი.

    ელზა წიკლაური
    14.12.2010

      სალარო აპარატების თემა კვლავ აქტუალური ხდება. უკვე ცნობილია, რომ ფინანსთა მინისტრი ბაინდურაშვილი იანვრიდან ახალი სალარო აპარატების შემოტანას გეგმავს, თუმცა ჯერჯერობით უცნობია, მოსთხოვს თუ არა ბაინდურაშვილის უწყება ყველა მეწარმეს ძველის ახლით შეცვლას. ამასთან, უკვე პირველი ივლისიდან ძალაში შევა კანონი, რომლის მიხედვითაც სალარო აპარატის გამოყენება ყველა ტიპის სავაჭრო და მომსახურების ობიექტისთვის სავალდებულო გახდება.

    მაკა ხარაზიშვილი
    14.12.2010

      მეწარმეები მორიგ საგადასახადო ექსპერიმენტში ჩართეს. ფინანსთა სამინისტრომ მეწარმეების ადმინისტრირების გამარტივების მიზნით ახალი კომპიუტერული სისტემა დანერგა, ანუ სისტემა გასცემს დირექტივას კონკრეტული მეწარმის შემოწმებასთან დაკავშირებით. ექსპერტების განცხადებით, აღნიშნული მეთოდი ბევრ ქვეყანაშია აპრობირებული, თუმცა ჩვენთან ადმინისტრირების ტვირთს მხოლოდ ამ სისტემის უქონლობა არ ამძიმებდა. გარდა ამისა, უცნობია პროგრამაში მეწარმის შერჩევის რა კრიტერიუმები შევიდა. შესაძლოა, რომელიმე კრიტერიუმმა არ გაამართლოს და, შესაბამისად, მსხვერპლი ისევ გადასახადის გადამხდელი აღმოჩნდეს.

    ელზა წიკლაური
    14.12.2010

      "სოკარი", "გაზპრომი" და "გაზპრომის" შვილობილი სომხური კომპანია "არმროსგაზპრომი" - ის კომპანიები არიან, რომლებსაც საქართველოზე გამავალი მაგისტრალური გაზსადენის შეძენა სურთ. თუმცა, საქართველოს მთავრობას გაზსადენის გასხვისებასთან დაკავშირებით ჩამოყალიბებული პოზიცია კვლავ არ აქვს.

    ელზა წიკლაური
    09.12.2010

      საქართველოში 2010 წლის ნოემბერში, ოქტომბერთან შედარებით, ინფლაციის მაჩვენებელმა 1,1% შეადგინა, აზერბაიჯანში ეს მაჩვენებელი 1,8%-ით განისაზღვრა, რუსეთში ნოემბრის თვის ინფლაციამ 0,8% შეადგინა, სომხეთში კი ეს მაჩვენებელი 1,6%-ით განისაზღვრა. საქართველოში წლიურ ინფლაციის მაჩვენებელმა, იანვარ-ნოემბერში ამ მაჩვენებელმა 6,7% შეადგინა, სომხეთში - 11,1%, რუსეთში - 7,6%. რაც შეეხება აზერბაიჯანს, ინფორმაცია იანვარ-ნოემბრის ინფლაციასთან დაკავშირებით აზერბაიჯანულ საიტებზე ჯერჯერობით არ დევს, ცნობილია მხოლოდ იანვარ-ოქტომბრის ინფლაციის მაჩვენებელი, რომელმაც სულ რაღაც 5,3% შეადგინა.

    მაკა ხარაზიშვილი
    04.12.2010

      სოფლის მეურნეობის გაზრდილი ბიუჯეტის 70% მარცვლეული თესლის შემოტანას მოხმარდება. სოფლის მეურნეობის სამინისტროს ინფორმაციით, ხორბლის თესლი არ არის გენმოდიფიცირებული და მისი მრავალჯერადი გამოყენება შეიძლება, თუმცა შემოვა ჰიბრიდული სიმინდის თესლი, რომელიც ერთჯერადად გამოიყენება და სპეციალისტების განცხადებით, საფრთხეს უქმნის სხვა კულტურების გადაშენებასაც.

    მაკა ხარაზიშვილი
    03.12.2010

      მსოფლიოს კრიზისი ისევ უტევს. ირლანდიის შემდეგ ეკონომიკურ დესტაბილიზაციას ესპანეთსა და იტალიაში ელიან, თუმცა ამ დროისთვის მდგომარეობა ასევე რთულია ევროპის რამდენიმე ქვეყანაში - საბერძნეთში, პორტუგალიაში, რუმინეთში და ა.შ. ექსპერტების განცხადებით, კრიზისმა ამჯერად საჯარო სექტორი მოიცვა. ევროპული ქვეყნები ვალების მომსახურებას ვერ ახერხებენ, შესაბამისად, აღნიშნული ქვეყნები დეფოლტის წინაშე დგანან. ქართველი ექპერტების განცხადებით, ევროპაში არსებული მდგომარეობის გამო, საქართველოს ინვესტორების დაყოლიება უფრო და უფრო გაუჭირდება.

    მაკა ხარაზიშვილი
    02.12.2010

      ეროვნული ბანკი დაგეგმილ ინფლაციურ მაჩვენებლებში ვერ ჩაეტია. ბანკში უკვე ოფიციალურად აღიარებენ, რომ წლის ბოლოს ინფლაცია ორნიშნა მაჩვენებელს გადააჭარბებს და დაგეგმილი 6%-ის ნაცვლად, 10,6% იქნება. სებ-ის პროგნოზით, ეკონომიკური ზრდა 6,3%-ს მიაღწევს. ბანკში ინფლაციის ზრდას გარე ფაქტორებს აბრალებენ, თუმცა ექსპერტებმა არაერთგზის აღნიშნეს, რომ ფასების მასშტაბური ზრდის უმთავრესი მიზეზი ქვეყნის შიგნით უნდა ვეძიოთ.

    მაკა ხარაზიშვილი
    30.11.2010

      მას შემდეგ, რაც კონტროლის პალატამ სახელმწიფო ბიუჯეტის შესრულება ეჭვქვეშ დააყენა, ფინანსთა სამინისტრომ საზოგადოებას ხაზინაში ერთმილიარდიანი ნაშთის შესახებ აუწყა. მინისტრს ბაინდურაშვილს არ აუხსნია, რატომ დევს ნაშთზე ამ რაოდენობის თანხა, როდესაც ქვეყნის ეკონომიკა არც ისე სახარბიელო მდგომარეობაშია. ან საიდან გაჩნდა ეს ნაშთი - ჭარბი შემოსავლებიდან, თუ რომელიმე პროგრამის განხორციელება, რომლისთვისაც ეს თანხა იყო გაწერილი, მომავალი წლისთვის გადაიდო. ექსპერტების განცხადებით, ის, რომ ხაზინაში 1 მილიარდი დაუხარჯავი ფული არსებობს, დადებით შეფასებას არ იმსახურებს.

    ელზა წიკლაური
    30.11.2010

      თუ 2003 წელს ერთი ადამიანის საშუალო თვიური ხარჯი 95,4 ლარს შეადგენდა, უკვე 2009 წლის მესამე კვარტალში ეს ციფრი, დაახლოებით, 70%-ით გაიზარდა და 139,4 ლარი შეადგინა (სტატისტიკის დეპარტამენტის ოფიციალურ ვებ-გვერდზე 2009 წლის საერთო მონაცემი ჯერ არ დევს). არადა, ზუსტად იმ პერიოდში ერთი შრომისუნარიანი მამაკაცის საარსებო მინიმუმი სულ რაღაც 127,3 ლარი იყო. მართალია, აქ ხარჯებსა და მინიმუმს შორის სხვაობა მხოლოდ 12,1 ლარია, თუმცა იმ ქვეყანაში, სადაც საარსებო მინიმუმის მაჩვენებელი ხარჯებზე დაბალია, ცხადია, რომ სოციალურ-ეკონომიკური მდგომარეობა საკმაოდ მძიმეა.

    მაკა ხარაზიშვილი
    26.11.2010

      წყლის ტარიფისა და ტრანსპორტის გაძვირების გადაწყვეტილების შემდეგ მოსახლეობა დანარჩენ პროდუქტებზე ფასების ზრდის მორიგ ტალღას ელის. მთელი წელია საქართველოში პროდუქტებზე ფასი მხოლოდ იმატებს. სურსათი დაახლოებით, 20-40%-ით გაძვირდა. ერთადერთი, გაძვირება არ შეხებია ტექნიკას. ფასების ზრდასთან ერთად საარსებო მინიმუმიც იზრდება, რაც იმას ნიშნავს, რომ საარსებო მინიმუმის ზღვარზე მყოფი მოსახლეობის მაჩვენებელი იზრდება. ხელისუფლება ფასების ზრდას მხოლოდ გარე ფაქტორებს უკავშირებს, ექსპერტების განცხადებით, უმთავრესი მიზეზები ქვეყნის შიგნით არსებობს და იგი არაერთია.

    მაკა ხარაზიშვილი
    25.11.2010

      იანვარ-ოქტომბერში ექსპორტსა და იმპორტს შორის უარყოფითი ბალანსი 7%-ით გაიზარდა. თუ ამ მაჩვენებელს მსუბუქი ავტომობილების რეექსპორტს გამოვაკლებთ, უარყოფითი ბალანსი გაცილებით მეტი იქნება. სექტემბრის მონაცემებით კი, უარყოფითი ბალანსი 4%-ით იყო გაზრდილი, ანუ ქვეყნის იმპორტზე დამოკიდებულება უფრო და უფრო მატულობს.


    Copyright © 2006-2018 by Resonance ltd. . All rights reserved