თაკო ჩარკვიანი დავით ბერძენიშვილს ეთანხმება, რომელმაც ოპოზიციის ძველ ლიდერებს მოუწოდა, ტელეეკრანებს დროებით ჩამოშორდნენ. ამის შესახებ „კანონი და სამართლის" ლიდერმა განაცხადა.

„დავით ბერძენიშვილს ვეთანხმები, ძალიან სწორი განცხადება იყო. „ლელომაც" რაც თქვა, ეს „ლელოს" პოზიციაა და განსაკუთრებული აქ არაფერი ხდება. მერწმუნეთ, არავითარი რღვევა არ არსებობს. ეს არის კორექტივი. უბრალო ჩვენ, ყველას გვაქვს ჩვენი შენიშვნები, რომ აი, ამ დოზით ეს ადამიანი აქ, შევთანხმდეთ, იყოს თუ არა", - განაცხადა ჩარკვიანმა „ქრონიკასთან" საუბარში და იმ მიზეზებზე ისაუბრა, თუ რატომ არ სურს ოპოზიციის აქციებზე ნინო ბურჯანაძისა და გიგა ბოკერიას ნახვა.

„ჩვენ კვლევებს ვაკეთებთ, ვმუშაობთ, ვხედავთ. არ მოსწონს ეს ხალხს, უნდათ სიახლე. ცოტა სხვა ლიდერულ მდგომარეობაში წარმოჩინდა ეს ქალბატონი. ვერაფრით ავიტან, რომ გავრილოვს ვებრძოდე გავრილოვნათი. ამ გაყალბებულ არჩევნებშიც კი ბოკერიამ და ბურჯანაძემ საერთოდ მანდატი ვერ მიიღეს. მე ვხედავ, რომ ბოკერია და ბურჯანაძე უბრალოდ თავისი გაცოცხლებისთვის იბრძვიან", - განაცხადა ჩარკვიანმა.