შეერთებული შტატების საელჩოში მიმდინარე საზეიმო მიღებაზე ცოტა ხნის წინ ფიზიკური დაპირისპირება მოხდა "ქართული ოცნების" დეპუტატებსა და "ტვ პირველის" დამფუძნებელს შორის. ანრი ოხანაშვილის თქმით, მას ვატო წერეთელმა სიტყვიერი შეურაცხყოფა მიაყენა და პროვოკაცია მოუწყო. თავად წერეთელი ამბობს რომ მას ფიზიკურად გაუსწორდნენ დეპუტატები.
"ტვ პირველის" დამფუძნებელიც და ანრი ოხანაშვილიც შეერთებული შტატების ელჩს კადრების გასაჯაროებას სთხოვენ.
"200-მდე სტუმარი იყო ეპიცენტრში, მე რომ ბევრი არ ვილაპარაკო, კელი დეგნანს მივმართავ, თქვენს ტერიტორიაზე მოხდა ჩემს მიმართ ფიზიკური გასწორება, გაასაჯაროვეთ ყველანაირი კადრები. ოხანაშვილი დაიძრა ჩემკენ, მოჰყვა ზარქუა, ოდიშარია, მგალობლიშვილი, მომიჭირა ხელზე, დამიწყო გარჩევები. ხელი მომიქნია სახეში, მერე სანამ აზრზე მოვედი, მეორემ გამწია და მეორემ მომიქნია ხელი," - თქვა წერეთელმა "ტვ პირველის" ეთერში.
"ქართული ოცნების" წევრი, ანრი ოხანაშვლი ამბობს, რომ ვატო წერეთლის მხრიდან უბინძურეს პროვოკაციას ჰქონდა ადგილი.
"უბინძურეს პროვოკაციას ჰქონდა ადგილი, უბინძურესს, წერეთლის მხრიდან. მიღებაზე ყოფნის დროს მოვიდა, მთხოვა, ორი სიტყვით რაღაცის თქმა სურდა, უბინძურესი პროვოკაცია მოაწყო... ხომ წარმოგიდგენიათ, რაზეა საუბარი?! სწრაფი ნაბიჯით გაიქცა. მინდოდა მეკითხა, რატომ იკადრა ასეთი რაღაცა, რაზეც გააგრძელა პროვოკაცია, შემდგომ, რა თქმა უნდა, პასუხი გავეცი და მიიღო ის პასუხი, რომელსაც ის იმსახურებდა.
საუბარია უბინძურეს პროვოკაციაზე, რომელსაც ვერც ერთი ქართველი ვერ აიტანს და ამას მოჰყვა მცირე შეხლა-შემოხლა, ეს იყო და ეს. კამერები, წესით, უნდა იყოს ყველგან და იმედი მაქვს, რომ აბსოლუტურად ყველაფერი ასახულია კამერაზე," - ამბობს ოხანაშვილი.
წყარო: "რუსთავი 2"