რეზონანსი
05.07.2022

ქუთაისის საერთაშორისო უნივერსიტეტის ბაზაზე, ადრონული თერაპიის ცენტრის მშენებლობის ადგილზე სიმბოლური კაფსულის ჩადების ცერემონია გაიმართა, რომელშიც მონაწილეობა მიიღეს საქართველოს პრემიერ-მინისტრმა ირაკლი ღარიბაშვილმა, საქართველოს განათლებისა და მეცნიერების მინისტრმა მიხეილ ჩხენკელმა, საერთაშორისო საქველმოქმედო ფონდ „ქართუს“ სამეთვალყურეო საბჭოს თავმჯდომარე ნიკოლოზ ჩხეტიანმა, ქუთაისის საერთაშორისო უნივერსიტეტის რექტორმა ალექსანდრე თევზაძემ და IBA-ის სამეთვალყურეო საბჭოს თავმჯდომარე პიერ მოტემ.

ღონისძიებაზე სიტყვით გამოსვლისას მთავრობის მეთაურმა განაცხადა, რომ პროექტი მთლიანად ფონდ „ქართუს“ მიერ არის დაფინანსებული და სიმსივნური დაავადებების პროტონული თერაპიის აპარატურის მწარმოებელ მსოფლიოს წამყვან კომპანია IBA-სთან თანამშრომლობით წარიმართება. პრემიერ-მინისტრმა ფონდ „ქართუს“ და მის ხელმძღვანელობას პროექტის განხორციელებისთვის მადლობა გადაუხადა.

ღონისძიების ფარგლებში, მოწვეულ სტუმრებს სიტყვით მიმართა მიხეილ ჩხენკელმა, რომელმაც ქუთაისის საერთაშორისო უნივერსიტეტის ბაზაზე ადრონული თერაპიის დაარსების მნიშვნელობაზე ისაუბრა.

„ჩვენი ადრონული თერაპიის ცენტრი ჭეშმარიტად უნიკალურია. როგორც ბატონმა პრემიერმა აღნიშნა, აქ იფუნქციონირებს ორი ციკლოტრონი, რომლებიც უკვე მზადაა. ამ მიმართულებით წამყვან კომპანია IBA-ში მიმდინარეობს ტესტირების ბოლო ფაზა და თანამედროვე ტექნოლოგიებით აღჭურვა. ორი ციკლოტრონი ხდის ჩვენს ცენტრს ჭეშმარიტად უნიკალურს, რადგანაც ერთი ციკლოტრონი მოხმარდება სიმსივნით მკურნალობას, და აქვე ორიოდე სიტყვით გეტყვით, რომ ეს არის სიმსივნის მკურნალობის წინა ხაზი – პროტონული თერაპიის დროს, როდესაც ხდება პაციენტის დასხივება, ნადგურდება მხოლოდ სიმსივნით დაავადებული უჯრედები, ხოლო ჯანსაღი უჯრედები არ ნადგურდება. სწორედ ამას აქვს გადამწყვეტი მნიშვნელობა და, როგორც ბატონმა პრემიერმა აღნიშნა, ეს უაღრესად მნიშვნელოვანია პაციენტების მკურნალობის დროს განსაკუთრებით კი სიმსივნით დაავადებული ბავშვების მკურნალობისას. შესაბამისად, კიდევ ერთხელ გავიმეორებ, რომ ადრონული თერაპიის ცენტრი უამრავი ადამიანის სიცოცხლეს გადაარჩენს.

მეორე ციკლოტრონი მთლიანად დაეთმობა სამეცნიერო კვლევით პროცესს. როდესაც მე პირადად მხვდა წილად ბედნიერება, ფონდ „ქართუს“ ხელმძღვანელებთან ერთად, მსოფლიოს წამყვან მეცნიერებს შევხვედროდი და მათთან დეტალურად მესაუბრა ამის შესახებ, ყველა უდიდესი ენთუზიაზმით შეხვდა იმ ამბავს, რომ ჩვენ გვექნება მთლიანად მეცნიერებისთვის განკუთვნილი ციკლოტრონი. მათ უკვე გამოთქვეს მზაობა, რომ აქ, ქუთაისის საერთაშორისო უნივერსიტეტში, ქართველ მკვლევრებთან ერთად, აწარმოონ ძალიან მაღალი დონის სამეცნიერო კვლევები მედიცინაში, სამედიცინო ფიზიკასა და ბირთვულ ფიზიკაში.

ასევე, ძალიან ემოციური იყო ის მომენტი, როდესაც ჩვენ, ფონდ „ქართუს“ ხელმძღვანელებთან ერთად, ვიხილეთ ჩვენი ციკლოტრონები, რომელზეც უკვე გამოსახულია ქართული დროშა და სულ მალე ციკლოტრონები საქართველოში იქნება. აღსანიშნავია, რომ ადრონული თერაპიის ცენტრი არის ქუთაისის საერთაშორისო უნივერსიტეტის ნაწილი, რადგან კავშირი სამეცნიერო კვლევით პროცესსა და იმ აკადემიურ პროცესს შორის, რომელიც უნივერსიტეტში მიმდინარეობს, უაღრესად მნიშვნელოვანია.

ქუთაისის საერთაშორისო უნივერსიტეტში აღიზრდება ქართველ მეცნიერთა ის მომავალი თაობა, რომელიც აქტიურად იმუშავებს ადრონული თერაპიის ცენტრში. ამასთან დაკავშირებით, მე კიდევ ერთი მნიშვნელოვანი სიახლე მაქვს, რაც მინდა საზოგადოებას გავუზიარო – ქუთაისის საერთაშორისო უნივერსიტეტში ჩვენ ვიწყებთ პირველ სადოქტორო პროგრამას. ეს გახლავთ საერთაშორისო სადოქტორო პროგრამა ბირთვულ ფიზიკაში, რომელსაც ჩვენ განვახორციელებთ გერმანიის ერთ-ერთ წამყვან უნივერსიტეტთან – აახენის უნივერსიტეტთან ერთად. სწორედ ეს არის ამ უნივერსიტეტის ფილოსოფია, რომ ყოველი აკადემიური პროგრამა შემუშავდეს მსოფლიოს ერთ-ერთ წამყვან უნივერსიტეტთან თანამშრომლობის საფუძველზე. მოქმედი აკადემიური პროგრამები, როგორც იცით, მიუნხენის ტექნიკური უნივერსიტეტის ბაზაზე და მათთან თანამშრომლობით არის შემუშავებული.

ჩვენ ყველას ძალიან გვეამაყება, რომ ქუთაისის საერთაშორისო უნივერსიტეტი მხოლოდ ერთი წლის შემდეგ, სახელმწიფო უნივერსიტეტებს შორის, რეიტინგში პირველ ადგილზეა ეროვნული გამოცდების ქულების მიხედვით. ეს, რასაკვირველია, ძალიან სასიხარულო და საამაყო ამბავია. ყველას კიდევ ერთხელ მინდა, მთელი გულით მოგილოცოთ დღევანდელი ისტორიული დღე - ადრონული ცენტრის მშენებლობის დაწყება და ყველას წარმატებები გისურვოთ!“ - განაცხადა მინისტრმა.

ღონისძიების ფარგლებში, ადრონული თერაპიის ცენტრის მშენებლობის თაობაზე შესაბამის წერილს მოეწერა ხელი, რომელიც კაფსულაში განთავსდა.

ვიდეო რეკლამა

სტატიების ნახვა შეგიძლიათ რუბრიკაში "ყველა სტატია"

ყველა ახალი ამბის ნახვა შეგიძლიათ ამ ბმულზე

საინტერესო ვიდეოები შეგიძლიათ იხილოთ რუბრიკაში "ყველა ვიდეო"

ბოლო ამბების ნახვა შეგიძლიათ ამ ბმულზე

ლიცენზია
ვიდეო რეკლამა

Copyright © 2006-2024 by Resonance ltd. . All rights reserved
×