უკრაინის ხელისუფლების ცნობით, რუსეთმა ზაპოროჟიეს ატომურ ელექსტროსადგურს ცეცხლი გაუხსნა. ქალაქ ენერგოდარის მერი დმიტრი ორლოვი მოუწოდებს მოქალაქეებ, ქუჩაში არ გავიდნენ. უკრაინის სამხედრო დაზვერვა იუწყება, რომ რუსები ატომურ ობიექტს სოფელ ვოდიანოედან ესვრის. მათივე ცნობით, შედეგად დაზიანდა სადგურის მიწისქვეშა კომუნიკაცია და სახანძრო ნაწილი.
პარალელურად, დნეპროპეტროვსკის ოლქის ადმინისტრაცია ავრცელებს ცნობას, რომ რუსეთის არმიამ ქალაქი ნიკოპოლი დაბომბა. ქალაქში დაზიანებულია მრავალსართულიანი და კერძო სახლები. ასევე საბავშვო ბაღი. მწყობრიდან გამოვიდა გაზსადენი და ელექტროგადამცემი ხაზი. მოქალაქეები არ დაშავებულან.
ამასთან, საბრძოლო მოქმედებები გრძელდება დონბასში და ხერსონის ოლქშიც. უკრაინის გენშტაბის ცნობით, უკრაინის შეიარაღებულმა ძალებმა გუშინ მწყობრიდან გამოიყვანეს ხერსონის ოლქში მდებარე ახალი კახოვკას დამბის ხიდი, რაც რუსებს ოკუპირებულ ტერიტორიაზე დისლოცირებული ჯარის მომარაგებას გაურთულებს.
თავის მხრივ, რუსეთის თავდაცვის სამინისტრო ავრცელებს ინფორმაციას, რომ მათ სრულად დაიკავეს დონეცკის ოლქის დასახლება პესკი.