გერმანიის მთავრობა Leopard 2-ის ტანკების რეექსპორტზე ნებართვას ხვალ გასცემს. ინფორმაციას ამის შესახებ სააგენტო Bloomberg-ი ინფორმირებულ წყაროზე დაყრდნობით ავრცელებს.

მანამდე გერმანიის თავდაცვის მინისტრმა, ბორის პისტორიუსმა განაცხადა, რომ გერმანია ძალიან მალე გადაწყვეტს, დაუშვებს თუ არა უკრაინისთვის Leopard 2-ის ტანკების მიწოდებას.

ბორის პისტორიუსის თქმით, თუ ოფიციალური ბერლინი ტანკების გაგზავნის გადაწყვეტილებას მიიღებს, გერმანია შეძლებს ძალიან მალე იმოქმედოს.

23 იანვარს, პოლონეთის პრემიერ-მინისტრმა, მატეუშ მორავეცკიმ განაცხადა, რომ პოლონეთის მთავრობა უკრაინას Leopard 2-ის ტანკებს მიაწვდის, თუ ის მოახერხებს სახელმწიფოთა მცირე კოალიციის შექმნას, რომლებიც იგივეს გააკეთებენ.

პოლონეთის მთავრობის მეთაურის თქმით, თუ ეს პირობა დაკმაყოფილდება, პოლონეთი მზად იქნება, უკრაინას გერმანული წარმოების აღნიშნული ტანკები მიაწოდოს ოფიციალური ბერლინის თანხმობით ან მის გარეშე.