სააკაშვილის შემდეგ ინვესტიციების მოზიდვაზე აქტიური მუშაობის დაწყების დირექტივა თბილისის მერმა გიგი უგულავამაც გასცა. პრეზიდენტისგან განსხვავებით, უგულავამ ეს მითითება ქალაქის მთავრობის წევრებს მისცა და კონკრეტული ვადაც დაუსახელა. რამდენად შეძლებენ ქალაქის მთავრობის წევრები ამ ბრძანების შესრულებას იმ ფონზე, როდესაც მთლიანად ქვეყანაში ინვესტიციების რაოდენობა მნიშვნელოვნად შემცირებულია, რთული სათქმელია, თუმცა დავალება დავალებაა და ის თბილისის მთავრობას უკვე მიღებული აქვს.
  ინვესტიციების მოზიდვასთან დაკავშირებით თბილისის მერიის მუშაკები გიგი უგულავამ გუშინდელ სხდომაზე დაამოძღვრა. მისი თქმით, ყველაზე სიცოცხლისუნარიანი პატარა ინვესტიციებია და როგორც მან სხდომის წევრებს განუცხადა, მათი შრომისუნარიანობა შეფასდება არა მარტო იმით, თუ როგორ გამწვანდება ქალაქი და დაიგება ასფალტი, არამედ იმით, რომ შეძლონ ინვესტორის მოყვანა. თუკი ვინმეს, უგულავას თქმით, ერთმილიონიანი ინვესტიციის ჩადება სურს, ხელი უნდა შეეწყოს თუნდაც იმიტომ, რომ 5-10 ადამიანი მაინც დასაქმდება.
  სექტემბერში გამგებლები და მერიის წარმომადგენლები კონკრეტულ გეგმას წარმოადგენენ, თუ როგორ განაგრძობენ იმ პრობლემების მოგვარებას, რომლებიც თბილისელებს აწუხებთ.
  გუშინვე მერმა გამგებლებსა და საქალაქო სამსახურის უფროსებს ზაფხულის განმავლობაში მოქალაქეების პრობლემების ადგილზე გაცნობა დაავალა.
  დედაქალაქის მთავრობის წევრებმა "ძველი თბილისს ახალი სიცოცხლის" პროექტის მე-2 ეტაპის შესახებაც იმსჯელეს. როგორც სხდომაზე აღნიშნეს, პროექტისთვის გამოცხადებულ კონკურსში 34 კომპანია მონაწილეობდა, საიდანაც 9 მათგანი დაფინანსდა. შედეგად კი, ძველი თბილისის უბნებში მაცხოვრებელ 223 ოჯახს საცხოვრებელი პირობები გაუუმჯობესდება, წლის ბოლოსთვის კი პროგრამის მე-3 ეტაპი დაიწყება.
  გიგი უგულავას მხრიდან თბილისის მთავრობის წევრებისთვის მიცემულ ასეთ დავალებას ექსპერტები "თამაშს" უწოდებენ და აცხადებენ, რომ ის შედეგზე ორიენტირებული ნამდვილად არ იქნება. მათი თქმით, ქვეყანაში ინვესტორი მხოლოდ მას შემდეგ შემოვა, რაც შესაბამისი ბიზნეს და სამართლებრივი გარემო შეიქმნება.
  "მინისტრებისა და ჩინოვნიკების საქმე ინვესტიციების მოზიდვა არ არის. მათი საქმეა, შექმნან ისეთი სამართლებრივი და ბიზნეს-ეკონომიკური გარემო, რომ ინვესტორები მოწოდების გარეშე შემოვიდეს. ჯოხით ინვესტორის შემოყვანა ანაქრონიზმია და არანაირ წესში არ ჯდება. ინვესტორი არ არის ცხვარი, რომ მწყემსმა ის ჯოხით იქით გააგდოს, საითაც თავად სურს.
  ასე რომ, იმ დრომდე, ვიდრე არ მოხდება სისტემური ცვლილებები, არ გაუმჯობესდება საინვესტიციო გარემო, ინვესტიციების ზრდაზე საუბარი ზედმეტია. ასეთი დავალებების გაკეთება კი მხოლოდ თამაშია. 
  რაც შეეხება გიგი უგულავას ამ განცხადებას, მოგეხსენებათ, რომ მოდის 2013 წელი და ყველა, მათ შორის ხელისუფლების შიგნით მყოფ ადამიანებს თავისი მიზნები აქვთ. ამიტომ უგულავაც გამორიცხული არ არის, რომ თავის თამაშს თამაშობს; ან შეიძლება ინვესტიციების მოზიდვა უგულავასაც დაავალეს, თუმცა ვიმეორებ, ეს შედეგზე ორიენტირებული არ იქნება", - განაცხადა "რეზონანსთან" საუბარში ექსპერტმა ეკონომიკის საკითხებში გია ხუხაშვილმა.
  კიდევ ერთი ექსპერტი ეკონომიკის საკითხებში სოსო ცისკარიშვილი უგულავას დავალება "პრეზიდენტობანას თამაშს" აგონებს და ისიც მისი კოლეგის ანალოგიურად, ამ დირექტივას უპერსპექტივოს უწოდებს.
  "გიგი უგულავა დღეს პრეზიდენტობანას თამაშობს. ამ განცხადების შემდეგ აშკარაა, რომ მას ქალაქის ქვეყნისგან განსხვავება უჭირს. თუ ქვეყანაში ინვესტიცია შემოვა, რა თქმა უნდა, მისი დიდი ნაწილი დედაქალაქში მოხვდება. ეს მთავრობაში კარგად იციან, მაგრამ სააკაშვილი მინისტრებს ავალებს ინვესტორების შემოყვანას, ახლა კი მერი გასცემს ასეთ დავალებას. საერთო ჯამში, ანუ როცა აღმოჩნდება, რომ ინვესტორი არ შემოვიდა, დამნაშავე ისევ მეისრე იქნება.
მაგრამ ინვესტორი მაშინ შემოვა, როცა ქვეყანაში შეიცვლება გარემო და კანონმდებლობა, იქნება სამართლიანობა, რაც ყველა ინვესტორის მთავარი მოთხოვნაა, ამ ყველაფერზე კი მთავრობაში არავინ ფიქრობს. ამიტომაც ეს "თამაშობანა" შედეგის მომტანი არ იქნება. თანაც, მაშინ, როდესაც პრეზიდენტმა ვერ მოახერხა ინვესტიციების მოზიდვა, საინტერესოა ამას როგორ შეძლებს უგულავა და თბილისის მთავრობის წევრები? ამ საქმეს არა დავალება, არამედ მუშაობა სჭირდება, რაც ნამდვილად არ ჩანს", - განაცხადა ცისკარიშვილმა.