რეზონანსი
14.02.2020

ხელისუფლების მაღალჩინოსნების პასუხისმგებლობაზე საუბრობს ოპოზიცია იმ შემთხვევაში, თუ თბილისში ვიზიტს დააპირებს ლავროვი ან სხვა რომელიმე რუსი მაღალჩინოსანი, რომელსაც საქართველოს კანონი ოკუპირებული ტერიტორიების შესახებ დარღვეული აქვს. მუქარა ოპოზიციის იმ ლიდერებისგან ისმის, რომლებმაც თითქმის 8 თვის წინ გავრილოვი აიძულეს პარლამენტის სპიკერის სავარძლიდან ამდგარიყო და შემდეგ ქვეყანა დაეტოვებინა.

სამოქალქო მოძრაობები, რომელთა პროტესტსაც ე.წ გავრილოვის ღამე და ხანგრძლივი აქციები მოჰყვა, ხელისუფლებას მოუწოდებენ, არ დაუშვას თბილისში ოკუპაციის მხარდამჭერი რუსი პოლიტიკოსების ვიზიტი. წინააღმდეგ შემთხვევაში, აქტივისტები საზოგადოების ერთიან და მწვავე რეაქციას აანონსებენ.

ოპონენტების შეთავაზება, ევროპის საბჭოს მინისტრთა კომიტეტის სხდომა, თბილისის ნაცვლად სტრასბურგში ან სხვა ნეიტრალურ ტერიტორიაზე ჩატარდეს, მიუღებელია მმართველი გუნდისთვის. "ქართულ ოცნებაში" ამბობენ, რომ ღონისძიებას საქართველომ უნდა უმასპინძლოს და ეს ქვეყნის პრესტიჟის საკითხია.

როგორ და რა ფორმით ჩატარდება მაისის სხდომა - ეს ევროპელ პარტნიორებთან კონსულტაციით გადაწყდება. მოსამზადებელ სამუშაოებს საგარეო საქმეთა სამინისტრო აწარმოებს.

მარია ზახაროვას კომენტარამდე, რუსეთის საგარეო საქმეთა მინისტრის ყოფილმა მოადგილემ, გრიგორი კარასინმაც განაცხადა, რომ რუსეთის დელეგაცია თბილისში დაგეგმილ ევროსაბჭოს მინისტრთა კომიტეტის სხდომაში მონაწილეობას მიიღებდა.

საკითხი აქტუალური მას შემდეგ გახდა, რაც სალომე ზურაბიშვილმა ევროპის საბჭოში სიტყვით გამოსვლისას განაცხადა, რომ საქართველო აპირებს, გვერდი აუაროს კანონმდებლობას, რომელიც უკრძალავს ქვეყანაში შემოსვლას იმ პირებს, რომლებიც ნებართვის გარეშე იმყოფებოდნენ ოკუპირებულ ტერიტორიებზე.

ამ განცხადებას ოპოზიციის მწვავე კრიტიკა მაშინვე მოჰყვა, "ქართულმა ოცნებამ" კი განმარტა, რომ ეს პრეზიდენტის პირადი პოზიცია იყო და საბოლოო გადაწყვეტილებას პარტნიორებთან კონსულტაციის შემდეგ მმართველი გუნდი მიიღებს.

წარო: კურიერი

 

ლიცენზია
დატოვე კომენტარიკომენტარები (0)
ჩაწერა სახელი

Copyright © 2006-2020 by Resonance ltd. . All rights reserved
×