სახელი*
    ელ–ფოსტა
    წერილის ტექსტი*
    საკონტროლო კოდი* კოდის განახლება
    გაგზავნა
    "რაც ფარმაცევტულ ბაზარზე ხდება, საშინელებაა, კლიენტები აბსოლუტურად დაუცველები არიან"
    მარი ჩიტაია
    21.03.2017

     სპეციალისტებს მედიკამენტების ხარისხთან დაკავშირებით სერიოზული ეჭვი აქვთ. ფაქტები, რომ ბაზარზე ფალსიფიცირებული წამლები იყიდება, ოფიციალურად დადასტურებული არ არის, თუმცა უამრავი ადამიანი ჩივის, რომ მკურნალობას ხშირად არ მოაქვს შედეგი. ჯანდაცვის რეფორმაში ქვეყანა მილიონობით ლარს ხარჯავს, მაგრამ ფარმაცევტული ბაზრის მიმართულებით ბევრი რამ მოუგვარებელია.

    ძვირადღირებულ მედიკამენტებს ისედაც ვერ ყიდულობს ხალხი. ბაზარზე მრავლად შემოდის მათი შემცვლელები, რომლებსაც ფარმაცევტები მომხმარებლებს ხშირად უნებართვოდაც სთავაზობენ, მაგრამ ასეთი წამლებით მკურნალობა არაეფექტურია.

    იმის გამო, რომ წამლების ლაბორატორიული შემოწმება ძვირი ღირს, თანაც საქართველოში ასეთი ლაბორატორია (თუ არ ჩავთვლით ადგილობრივი ფარმაცევტული კომპანიების შემადგენლობაში არსებულს), არ არსებობს. ორიოდე ლაბორატორია, რომლებიც ქართული სააფთიაქო კომპანიების ქოლგის ქვეშაა, სპეციალისტების შეფასებით, მიკერძოებული სტრუქტურები არიან და მათ მიერ ჩატარებული კვლევის შედეგები საზოგადოებისთვის ნაკლებად დამაჯერებელია.

    დაზარალებულები იშვიათად, მაგრამ მაინც მიმართავენ მომხმარებელთა უფლებადამცველ ორგანიზაციებს, თუმცა, რაც უნდა გასაკვირი იყოს, მსგავსი საჩივრით ან განაცხადით არც ერთხელ არ მიუმართავთ სამედიცინო საქმიანობის სახელმწიფო რეგულირების სააგენტოსთვის, რომელიც წამლის ხარისხზე პასუხისმგებელი ერთადერთი ოფიციალური უწყებაა ქვეყანაში.

    არასამთავრობო ორგანიზაცია "გახსოვდეს ჰიპოკრატეს" დამფუძნებელი მარინა ბერაძე აცხადებს, რომ საქართველოში წამლის გვერდითი ეფექტების მონიტორინგის სისტემა ვერანაირ კრიტიკას ვერ უძლებს.

    "წამლის ხარისხი ყველა დროის პრობლემაა საქართველოში. წლებია, რაც ხალხი ამ საკითხზე ჩივის. ეს ხდება იმიტომ, რომ არ არსებობს სახელმწიფო ლაბორატორია, ობიექტური და მიუკერძოებელი, რომელიც ჩაატარებს კვლევას და შედეგს გააცნობს საზოგადოებას. მწარმოებლებს აქვთ ლაბორატორიები საკუთარ ბაზარზე, სადაც ჩატარებული კვლევა ყოველთვის მიკერძოებული იქნება.

    წამლის ხარისხის გადამოწმება ძვირადღირებული პროცესია და ამის შესაძლებლობა მომხმარებლებს არ აქვთ. რაც შეეხება პერიოდულ შემოწმებას, პასუხისმგებელი ორგანო არსებობს, რომელმაც უნდა გაგვცეს პასუხი. ფარმაცია არის სამომხმარებლო ბაზრის ყველაზე მოუწესრიგებელი მიმართულება. აქ შედის როგორც წამლის ხარისხი, ასევე მიზნობრივი მიმართულება. ჩვენ წამლის გვერდით მოვლენებს არ ვიკვლევთ. კარგი წამალიც კი, სწორად დანიშნული, გვერდით ეფექტს ტოვებს და მისი შესწავლა ყველა ქვეყანაში ხდება.

    როცა მინისტრი ამბობს, რომ არამიზნობრივად ხდება დანიშვნა, დიდწილად ხარისხსაც უკავშირდება და, თქვენ წარმოიდგინეთ, ასეთი მედიკამენტი ადამიანის ჯანმრთელობას როგორ დააზიანებს. უხეშად ირღვევა ჩვენი უფლება, რომ ჯანსაღ გარემოში ვიცხოვროთ", - აცხადებს მარინა ბერაძე.

    ფაქტები, რომელზეც ჩვენი მკითხველებისგან და სხვა რიგითი მოქალაქეებისგან წამლების ხარისხთან დაკავშირებით ვიგებთ, საკმაოდ ბევრია. მომხმარებლების უმეტესობა ჩივის, რომ მკურნალობამ შედეგი ვერ გამოიღო, რასაც უხარისხო მედიკამენტებს აბრალებენ.

    ირინა გამყრელიძე, 39 წლის: "თებერვლის დასაწყისში ექიმმა ბავშვისთვის ჭიის წამალი გამომიწერა. საკმაოდ ძვირი ღირდა და ფარმაცევტის რჩევით სხვა პრეპარატი გაცილებით იაფად შევიძინე. ანალიზი განმეორებით გავაკეთეთ და აღმოჩნდა, რომ წამალმა არ არგო. ეკონომიის გაწევა მინდოდა და ამის ნაცვლად დავზარალდი, რადგან შემდეგ მაინც ძვირი მედიკამენტის ყიდვა დამჭირდა".

    ელენა გათენაშვილი, პენსიონერი: ყოველდღიურად ვსვამ წამლებს და მუდამ მაქვს ეჭვი, რომ მათი უმეტესობა არაეფექტურია, ზოგი მგონი, საერთოდ არ მშველის, განსაკუთრებით, როცა იაფ წამალს ვყიდულობ. ამას წინათ დამამშვიდებელი წვეთები ვიყიდე და დამახასიათებელი მკვეთრი სუნიც კი აშკარად შესუსტებული ჰქონდა. ამ პრობლემაზე ექიმთან მუდმივად ვჩივი, მაგრამ მის თხოვნას, რომ წამლები ძვირადღირებულით შევცვალო, ვეღარ ვასრულებ".

     ამ რამდენიმე ხნის წინ მომხმარებელთა უფლებების დამცველ ორგანიზაცია "ეტიკს" მოქალაქე ცისანა ხარაბაძემ მიმართა. ორგანიზაციის ხელმძღვანელის ამირან შენგელიას ინფორმაციით, დაზარალებულმა ერთ-ერთ აფთიაქში გულ-სისხლძარღვთა დაავადების მკურნალობის პრეპარატი მოითხოვა და ფარმაცევტის რჩევას ენდო.

    "პაციენტმა მხოლოდ ანოტაციის წაკითხვის შემდეგ გაიგო, რომ წამალი სინამდვილეში საკვებდანამატი იყო და მისი გამოყენება ძირითად სამკურნალო წამალთან ერთად იყო სასურველი. მან ე.წ. მედიკამენტში 80 ლარი გადაიხადა, თანაც 4 კურსი უნდა ჩაეტარებინა. როცა აფთიაქში წამლის დაბრუნებაზე უარი უთხრეს, ჩვენს ორგანიზაციას შუამდგომლობის თხოვნით მიმართა. გულთან მივიტანეთ მისი გასაჭირი, მივმართეთ აფთიაქის წარმომადგენლებს, ვეცადეთ დახმარება, მაგრამ არაფერი გამოგვივიდა. სამართლებრივი ბაზა მოუწესრიგებელია და ამან არ მოგვცა საშუალება, რომ დაზარალებულის უფლებები დაგვეცვა. სურსათის სფერო, სადაზღვევო ბაზარი ან საბანკო სექტორი ამ მხრივ მეტ-ნაკლებად მოწესრიგებულია, რეგულაციები არსებობს, მაგრამ რაც ფარმაცევტულ ბაზარზე ხდება, საშინელებაა. აქ კლიენტები აბსოლუტურად დაუცველები არიან, ფარმაცევტებზე ბრმად მინდობილნი, რაც ხშირად მათ აზარალებს", - აცხადებს შენგელია.

    გარდა ამისა, მომხმარებელთა უფლებების უხეშად დარღვევაა კომპანიების აგრესიული მარკეტინგი, რეკლამები, წამლის შეთავაზების გაუმართლებელი მეთოდები და სხვა, რითაც ფარმაცევტული ინდუსტრია წამლების რეალიზაციას ცდილობს.

    "დღეს აფთიაქში სუბოტექსს უფრო ადვილად მოგცემენ, ვიდრე ხარისხიან მედიკამენტს. მოქალაქეები გვთხოვენ, ვუშუამდგომლოთ, წამლების უკან დაბრუნებაში დავეხმაროთ და სხვა, მგრამ სამართლებრივად ეს შეუძლებელია. უამრავი შემთხვევაა, როცა ფარმაცევტები თვითონ ურჩევენ კლიენტებს წამლების შემცვლელებს, რისი უფლებაც მათ არ აქვთ. ჩვენ არ გვაქვს სამედიცინო განათლება, რომ ვიცოდეთ, რა სჯობს.

    აყველგან აგრესიული მარკეტინგია, რომლის ხაფანგშიც მომხმარებელი ადვილად ებმევა. ამას მოწმობს წამლის რეკლამაც, რაც არ უნდა იყოს ნებადართული. არ შეიძლება, ასეთი სიხშირით მოგვდიოდეს რეკლამა, როგორც ეს დღეს ხდება. ხალხი რეკლამაში ყურმოკრულ წამალს ყიდულობს. ყოველდღიურად უამრავი ჩვენი თანამოქალქე შეცდომაში შეჰყავთ", - აცხადებს ამირან შენგელია.

    ჯანდაცვის სფეროს ექსპერტი, ჯანდაცვის მინისტრის ყოფილი მოადგილე ვახტანგ მეგრელიშვილი არ მალავს, რომ მისთვის ხარისხთან მხოლოდ ევროპული წარმოების მედიკამენტი ასოცირდება. დანარჩენს იგი არ ენდობა.

    "ყველა წამალს აქვს გარკვეული პროცედურა გავლილი, ანუ სახელმწიფოს მიერ ბაზარზე დაშვებულია. შესაბამისად, ამ წამლების მოქმედება უნდა იყოს სტანდარტიზებული. მომხმარებელს შეიძლება გაუჩნდეს ეჭვი, მაგრამ წამლის ეფექტურობას ან უეფექტობას ვერ დაადასტურებს. ამისთვის სპეციალური ლაბორატორია არსებობს, თუმცა მასზე ხელი ბევრს არ მიუწვდება.

    ერთადერთი, რაშიც ეჭვს ვერ შევიტან, არის ევროპული მედიკამენტების ხარისხი. ამ დროს ჩვენთან დიდი რაოდენობით იყიდება ინდური, ეგვიპტური, ჩინური, რუსული, უკრაინული და ადგილობრივი წარმოების წამლები, რომლის ხარისხზეც ასე თამამად ვერ ვისაუბრებ. სიმართლე გითხრათ, არ ვარ დარწმუნებული, რომ ამ ქვეყნებიდან შემოტანილი მედიკამენტების მომხმარებლები დაცულია", - აცხადებს მეგრელიშვილი.

    წამლების ხარისხთან დაკავშირებული პრობლემები ნაცნობია შრომის, ჯანმრთელობისა და სოციალური დაცვის სამინისტროს სამედიცინო საქმიანობის სახელმწიფო რეგულირების სააგენტოსთვის, რომელიც ხარისხზე პასუხისმგებელი ერთადერთი სტრუქტურაა საქართველოში.

    როგორც სამედიცინო საქმიანობის სახელმწიფო რეგულირების სააგენტოს ფარმაცევტული საქმიანობის დეპარტამენტის რეგისტრაციის სამმართველოს ხელმძღვანელი ნაილი შენგელიძე განმარტავს, 2016 წელს სულ შედგა ადმინისტრაციული სამართალდარღვევის 488 ოქმი, ჩამორთმეულია 84 500-მდე ერთეული აბი, კაფსულა, ამპულა და სხვა, ვადაგასული, შენახვის პირობების დარღვევით შენახული და სხვა ერთეული მედიკამენტი.

    "პირველ ჯგუფს მიკუთვნებული ფარმაცევტული პროდუქტის რეალიზაციის წესი 2016 წელს დაირღვა 44 შემთხვევაში. მოგვიანებით გადამოწმდა იგივე სუბიექტები და 26 შემთხვევაში დარღვევა განმეორებით გამოვლინდა (მესამე გამოვლენის შემთხვევაში ეს დაწესებულებები უნდა გაუქმდეს). 2015 წელს პირველ ჯგუფს მიკუთვნებული ფარმაცევტული პროდუქტის რეალიზაციის წესის დარღვევის 34 ფაქტი დადასტურდა.

    ლევან სამხარაულის სახელობის ექსპერტიზის ეროვნულ ბიუროსთან გვაქვს გაფორმებული ხელშეკრულება, სადაც ხდება შესყიდული ნიმუშების სრული ლაბორატორიული ტესტირება და ვიღებთ დასკვნას, რამდენად შეესაბამება კონკრეტული წამლის ნიმუში განსაზღვრულ კრიტერიუმებს. გარდა ამისა, არის ადმინისტრაციული კონტროლის მექანიზმი. შევისყიდით მედიკამენტებს, შევისწავლით, როგორია შეფუთვა-მარკირება, თვითონ პრეპარატის მახასიათებლები: რა ფერისაა აბი, როგორია დიამეტრი და ა.შ. იმ შემთხვევაში, თუ რაღაც ეჭვი არსებობს და ვიზუალურად ჩანს პრობლემა, ნიმუშს ვაგზავნით ლაბორატორიაში.

    2016 წელს შევისყიდეთ დაახლოებით 500 ნიმუში. აქედან 1 შემთხვევაში მედიკამენტი აღმოჩნდა წუნდებული. 2015 წელს 2 ასეთი ფაქტი დაფიქსირდა. გასაგები მიზეზის გამო ჩვენ წამალსა და მეწარმე სუბიექტს ვერ დავასახელებთ", - განუცხადა "ბიზნეს-რეზონანსს" შენგელიძემ.

    რაც შეეხება კონკრეტულად ხარისხთან დაკავშირებით (სანებართვო პირობების დარღვევის) გამოვლენილ ფაქტებს, ამ კუთხით შარშან 93 ფაქტი გამოვლინდა, 2015 წელს კი - 91.

    შენგელიძის ინფორმაციით, სააგენტოში არ დაფიქსირებულა არც ერთი ფაქტი, რომ მომხმარებლებს წამლის ეფექტთან და მედიკამენტების ხარისხთან დაკავშირებით სხვა პრობლემაზე ოფიციალურად ეცნობებინათ.

    "ჩვენ გვესმის მოქალაქეებისგან მხოლოდ სიტყვიერად, რომ რაღაც წამალმა არ არგო. არ ვიცით, თვითონ ეს წამალი თავად შეარჩიეს თუ ექიმის დანიშნულებით შეიძინეს. ნებისმიერ მოქალაქეს აქვს უფლება, მიმართოს რეალიზატორს და ექიმსაც, რომელმაც დანიშნა პრეპარატი. საჭიროა, შეგროვდეს ეს მონაცემი, რომ საბოლოოდ შეფასდეს ერთიანი რეაგირებისთვის. განმეორებით შეფასდეს სარგებლის და რისკის ბალანსი, შესაძლებელია, სულაც აიკრძალოს მისი გამოყენება (თუ ის ახალი მედიკამენტია) ან ინსტრუქციაში კორექტივი შევიდეს. ჩვენთან ასეთი გამოვლენის ინფორმაცია არ გვაქვს და ამიტომ კონკრეტული მაგალითებით ვერაფერს გეტყვით", - დასძენს ნაილი შენგელიძე.

    ინფორმაციისთვის, საქართველოს ფარმაცევტულ ბაზარზე 10 000-მდე მედიკამენტია რეგისტრირებული. სამკურნალო საშუალება ყოველ ხუთ წელიწადში ერთხელ გადის რეგისტრაციას. სახელმწიფო პროგრამა 100 000 ლარით ფინანსდება.

    ლიცენზია
    დატოვე კომენტარიკომენტარები (0)
    ჩაწერა სახელი

    Copyright © 2006-2017 by Resonance ltd. . All rights reserved
    Site Meter