სახელი*
    ელ–ფოსტა
    წერილის ტექსტი*
    საკონტროლო კოდი* კოდის განახლება
    გაგზავნა
    რუსული ხომალდები სირიის პორტებს ტოვებენ, სირიის ნაპირებთან ამერიკული ხომალდების რაოდენობა იზრდება, თუმცა დარტყმა ჯერ გადაწყვეტილი არ არის
    ნინო ქეთელაური
    14.04.2018

     ამერიკული საბრძოლო ხომალდი "უინსტონ ჩერჩილი" გუშინ ხმელთაშუა ზღვაში შევიდა და სირიის ნაპირებისკენ აიღო გეზი. სირიის ნაპირებთან უკვე იმყოფება კიდევ ერთი კრეისერი "ჯეიმს კუკი". თითოეული მათგანი რამდენიმე ათეული ფრთოსანი რაკეტა "ტომოჰავკითაა" აღჭურვილი. სირიისაკენ ასევე მიემართება ამერიკული ავიამზიდი "ჰარი ტრუმენი".

    ამის პარალელურად პენტაგონში აცხადებენ, რომ სირიის ქალაქ დუმაში პრეზიდენტ ბაშარ ასადის ძალების მიერ ქიმიური იარაღის გამოყენებაზე საპასუხო ზომები კონფლიქტის ესკალაციის საფრთხესთან თანხვედრაში უნდა იყოს. გაეროში კი რუსეთისა და აშშ-ის წარმომადგენლები მასშტაბური კონფლიქტის თავიდან აცილების აუცილებლობაზე საუბრობენ.

    "ჩვენს პრეზიდენტს ჯერ არ მიუღია გადაწყვეტილება სირიაში შესაძლო მოქმედებებთან დაკავშირებით, მაგრამ აშშ და ჩვენი მოკავშირეები თუ გადაწყვეტენ სირიაში მოქმედებებს, ეს გაკეთდება იმ პრინციპების დასაცავად, რომლებზეც ჩვენ ყველა ვთანხმდებით, იმ ფუძემდებლური ნორმების დასაცავად, რომელიც ყველა ქვეყნისთვის სასარგებლო იქნება", - ეს განცხადება გუშინ გაეროს უშიშროების საბჭოს სხდომაზე გაეროში აშშ-ის მუდმივმა წარმომადგენელმა ნიკი ლეილიმ გააკეთა.

    მისივე თქმით, ამერიკის შეფასებით, სირიის ხელისუფლებამ ამ ქვეყანაში სამოქალაქო ომის პერიოდში, ქიმიური იარაღი, სულ მცირე, 50-ჯერ გამოიყენა, ხოლო საზოგადოებრიობის შეფასებით - 200-ჯერ.

    გაეროში რუსეთის ელჩი ვასილი ნებეზნია კი აშშ-ს, საფრანგეთსა და დიდ ბრიტანეთს მოუწოდებს, არ მიიყვანონ მსოფლიო სახიფათო ზღვრამდე და სირიაში არსებული სიტუაციიდან მშვიდობიანი გამოსავალი იპოვონ.

    "საჭიროა სასწრაფოდ მოიძებნოს მშვიდობიანი მიდგომა კოლექტიური ძალისხმევის ფარგლებში. რუსეთი მზადაა თანაბარუფლებიანი თანამშრომლობისთვის ყველა პარტნიორთან და წარმოქმნილი საკითხების დიალოგის გზით მოსაგვარებლად. ჩვენ შეურყევლად მიმართული ვართ სირიაში კონფლიქტის მშვიდობიანი დარეგულირებისკენ ცნობილ საერთაშორისო საფუძველზე და განვაგრძობთ აქტიურ ძალისხმევას ამ მიმართულებით და ამისკენ მოვუწოდებთ ყველა პარტნიორსაც", - განაცხადა ნებენზიამ.

    გაეროს გენერალურმა მდივანმა ანტონიუ გუტიერეშმა კი გუშინ პირდაპირ განაცხადა, რომ მსოფლიოში "ცივი ომი დაბრუნდა". მისივე თქმით, "აქამდე არსებული ესკალაციის შემაკავებელი მექანიზმები უკვე აღარ მოქმედებს."

    პენტაგონში ვარაუდობენ, რომ სირიაზე იერიშის მიტანამ, შესაძლოა რუსეთთან და ირანთან ფართომასშტაბიანი კონფლიქტი გამოიწვიოს. როგორც "ნიუ იორკ თაიმსი" საკუთარ წყაროზე დაყრდნობით წერს, საფრთხეებისა და რისკებზე აშშ-ის თავდაცვის მინისტრმა ჯეიმს მეტისმა დახურულ შეხვედრაზე ისაუბრა.

    გამოცემის ცნობით, შეხვედრაზე ჯეიმს მეტისმა განაცხადა, რომ აუცილებელია სავარაუდო ქიმიური იარაღის გამოყენებაში ბაშარ ასადის როლზე დამატებითი მტკიცებულებების მოპოვება. მისი თქმით, ეს მნიშვნელოვანია საერთაშორისო თანამეგობრობის დასარწმუნებლად, რომ აუცილებელია სამხედრო მოქმედება.

    პენტაგონის ხელმძღვანელი ფიქრობს, რომ საპასუხო ზომები უნდა იყოს კონფლიქტის ესკალაციის საფრთხესთან თანხვედრაში.

    ამის პარალელურად, გუშინ რუსულმა სამხედრო ხომალდებმა სირიის ქალაქ ტარტუსის სიახლოვეს მდებარე სამხედრო-საზღვაო ბაზა დატოვეს. ეს იმ სატელიტური სურათებით დასტურდება, რომელიც ისრაელის კომპანიამ "აისიაიმ" გამოაქვეყნა.

    კომპანიის მონაცემებით, ჩვეულებრივ პორტში 9 რუსული გემი მაინც იყო, თუმცა, 11 აპრილის მონაცემებით, ადგილზე მხოლოდ ერთი წყალქვეშა ნავი რჩება.

    "აისიაის" სპეციალისტები მიიჩნევენ, რომ რუსეთის საზღვაო გემების პორტიდან გასვლა დაკავშირებულია აშშ-ის მოსალოდნელ სარაკეტო დარტყმაზე, რომელიც ვაშინგტონი ქალაქ დუმაში ქიმიური იარაღის გამოყენების საპასუხოდ აპირებს.

    ბრიგადის გენერალის, ანალიტიკოსის სამხედრო-პოლიტიკურ და უსაფრთხოების საკითხებში ამირან სალუქვაძის შეფასებით, აშშ-რუსეთს შორის პირდაპირი დაპირისპირება არ იქნება. როგორც ის აღნიშნავს, ორივე მხარე შეეცდება, რომ ერთმანეთის სამხედრო მოსამსახურეებს საფრთხე არ შეუქმნას. შესაბამისად, თუ აშშ სირიაზე სარაკეტო დარტყმას გადაწყვეტს, იერიშის შესახებ წინასწარ აცნობებს რუსეთის თავდაცვის უწყებას, რათა მას საბაბი არ მიეცეს.

    "მართალია, ირანის მხრიდანაც გაისმა მუქრაა, რომ აშშ-ის ჩარევის შემთხვევაში ძალას გამოიყენებს, მაგრამ არ მგონია, რომ პირდაპირ საომარ დაპირისპირებაში შევიდეს მასთან. იმიტომ, რომ, მიუხედავად რუსეთის რიტორიკისა, თუ აშშ სარაკეტო დარტყმებს განახორციელებს, ვერ წარმომიდგენია, რომ ამას რუსეთმა უპასუხოს. ის უბრალოდ შესაძლოა დაეხმაროს ასადის რეჟიმს, რომ მან უპასუხოს ამერიკას, როგორც ეს ხდებოდა წინა საუკუნეში უამრავი კონფლიქტის დროს.

    "კრემლის ყველა განცხადებაში მკაფიოდ ჩანს, რომ სირიაში მოქმედ რუს სამხედრო მოსამსახურეებს არ უნდა შეექმნას საფრთხე. აქ ამაზეა საუბარი. თავის მხრივ, არც რუსეთმა უნდა შეუქმნას საფრთხე აშშ-ის კონტინგენტის წევრებს სირიის ტერიტორიაზე. ამისთვის არსებობს პენტაგონსა და რუსეთის თავდაცვის უწყებას შორის სამხედრო ცხელი ხაზი, რომელსაც ასეთი შემთხვევებისთვის იყენებენ ხოლმე.

    "წინა სარაკეტო იერიშის დროს სწორედ ამ ცხელი ხაზის მეშვეობით ჩააყენეს რუსეთი საქმის კურსში. დარწმუნებული ვარ, ახლაც, თუ ამერიკა ასეთ გადაწყვეტილებას მიიღებს, ანალოგიურად მოიქცევა და რუსეთს არ ექნება საბაბი, რომ ძალისმიერი პასუხი განახორციელოს", - აცხადებს ამირან სალუქვაძე.

    რაც შეეხება იმას, განახორციელებს თუ არა აშშ სარაკეტო დატყმას, ანალიტიკოსი ამბობს, რომ ჯერ-ჯერობით საზღვაო დაჯგუფების კონცენტრაცია მიმდინარეობს და სავარაუდოდ პროცესები აპრილის ბოლოს, მაისის დასაწყისში განახლდება.

    "ამ ეტაპისთვის არ არის საკმარისი დაჯგუფება იმისთვის, რომ აშშ-მა ეფექტიანი ხანმოკლე ან შედარებით ხანგრძლივი სამხედრო კამპანია ჩაატაროს. ამისთვის საჭიროა მძლავრი დაჯგუფების შექმნა.

    "გავრცელდა ინფორმაცია, რომ ავიამზიდი "ჰარი ტრუმენი" რამდენიმე ათეულ სამხედრო ხმალდათან ერთად დაძრულია რეგიონისკენ. ასევე საუბარია დიდი ბრიტანეთის ჩართვასათან დაკავშირებითაც. ასე რომ, უნდა დაველოდოთ ამ დაჯგუფების შექმნას. ამას საშუალოდ 2 კვირა დასჭირდება და როდესაც ეს პროცესი დასრულდება, არ არის გამორიცხული, რომ აშშ-ის სარაკეტო დარტყმები განხორციელდეს.

    "მანამადე რუსეთმა დაიწყო საზღვაო სწავლებები სირიის მიმდებარედ, რომელიც 26 აპრილამდე გასტანს. გარდა იმისა, რომ მას სადემონტრაციო ხასიათი აქვს, ტარდება იმისთვის, რომ გარკვეულწილად ხელი შეუშალონ ამერიკის ფლოტის მანევრებს.

    "ვნახოთ როგორ განვითრდება მოვლენები. სავარაუდოდ, პროცესების გააქტურებას აპრილის ბოლოს, მაისის დასაწყისთვის უნდა ველოდოთ", - აცხადებს ამირან სალუქვაძე.

    სამხედრო-ანალიტიკური ჟურნალი "არსენალის" მთავარი რედაქტორი ირაკლი ალადაშვილი ვარაუდობს, რომ რაღაც ეტაპზე ორივე სახელმწიფოს მხრიდან უკან დახევის მომენტები ჩაერთვება.

    "დაახლოებით ანალოგიური სიტუაცია იყო 1 წლის წინაც, როდესაც ახლად არჩეულმა პრეზიდენტმა ტრამპმა თავის მუქარა შეასრულა და 2017 წლის 7 აპრილს სირიის აეროდრომს სარაკეტო დარტყმა მიაყენა. მაშინ რუსეთის პრეზიდენტის, პუტინის პოზიცია არ იყო ისეთი მკვეთრი, როგორიც დღეს არის. თუ წინა შემთხვევაში ეს ამბავი ჩაყლაპა, დღეს უკვე დაიმუქრა, რომ საპასუხოდ აქტიურ ქმედებებს განახორციელებს.

    "ახლა ტრამპი თავისივე სიტყვების ტყვეობაშია, თქვა და უნდა შეასრულოს როგორც ზე-სახელმწიფოს პრეზიდეტმა. თუმცა, ამას შემდეგ რა მოჰყვება, ესაა ყველაზე საინტერესო.

    "მე მაინც მგონია, რომ გარკვეულ ეტაპზე ჩაერთვება უკან დახევის პროცედურები, როგორც მოსკოვში, ისე ვაშინგტონში. ერთ-ერთი მხარე ვერ შეასრულებს მუქარას, თუმცა, ორივე ეცდება გამარჯვებულის პოზიციდან გამოვიდეს და პოლიტიკური დივიდენდები მოიპოვოს", - აცხადებს ირაკლი ალადაშვილი.

    ლიცენზია
    დატოვე კომენტარიკომენტარები (0)
    ჩაწერა სახელი

    Copyright © 2006-2018 by Resonance ltd. . All rights reserved