სახელი*
    ელ–ფოსტა
    წერილის ტექსტი*
    საკონტროლო კოდი* კოდის განახლება
    გაგზავნა
    "ლესტერის" უფროსობას ვუთხარი, რომ ისეთივე მებრძოლი სულის ფეხბურთელები გვინდა, როგორებიც ახლა გვყვანან"
    მარი მგალობლიშვილი
    21.05.2016

     სპორტული საზოგადოება ინგლისის პრემიერ ლიგაში განვითარებულმა მოვლენებმა აალაპარაკა - სენსაცია და სალაპარაკო თემა "ლესტერის" გაჩემპიონებამ გამოიწვია. გუნდის დამრიგებელი კლაუდიო რანიერი "გაზეტა დელო სპორტთან" ინტერვიუში განვლილ სეზონს აჯამებს.

    - რამდენად რთული და დამღლელი იყო საჩემპიონო სეზონი?

    კლაუდიო რანიერი: როდესაც არ ვმუშაობ, მაშინ უფრო სწრაფად ვიღლები. ასეთ დროს თავს კომფორტულად ვერ ვგრძნობ. ახლაღა ვაცნობიერებ, რაც გავაკეთეთ - ინგლისური ფეხბურთის გრანდები უკან ჩამოვიტოვეთ!

    - რას გრძნობდით, როცა გასულ ზაფხულს ინგლისში სამუშაოდ მიდიოდით, იფიქრებდით, რომ ჩემპიონი გახდებოდით?

    კ.რ: ბედნიერი ვიყავი, რადგან სამწვრთნელო საქმიანობაში ვბრუნდებოდი. ისე ძლიერ მინდოდა მწვრთნელობა, რომ იტალიის სერია ა-ს კლუბის გაწვრთნასაც სიხარულით დავთანხმდებოდი. პრემიერლიგის კიდევ ორი გუნდი მიწვევდა, მაგრამ საბოლოო ჯამში, არჩევანი სხვა მწვრთნელებზე შეაჩერეს. "ლესტერში" ყველაფერი მომეწონა: სამწვრთნელო შტაბი, სამომავლო გეგმები, კლუბის ბაზა და სტადიონი.

    - როგორ გაიხსენებდით იმ საღამოს, როდესაც ჩემპიონად გამოცხადდით?

    კ.რ: როდესაც "ჩელსისა" და "ტოტენჰემის" მატჩი დაიწყო, ცოლს ვუთხარი: "არა მგონია, ყველაფერი დღეს გადაწყდეს. სანამ მასპინძლები კუთხურს ჩამოაწვდიდნენ, ვიფიქრე, რომ "ჩელსის" გოლის დრო იყო. ასეც მოხდა - გარი კეჰილმა ბურთი "ტოტენჰემის" კარში გადაგზავნა. რა თქმა უნდა, იმ დროს ჩემზე ბედნიერი არავინ მეგულებოდა, ჩვენ ხომ ჩემპიონები გავხდით.

    - სატრანსფერო პერიოდში როგორია თქვენი გეგმები?

    კ.რ: გასული სეზონის დაწყებამდე, კლუბის ხელმძღვანელობამ მიზნად პრემიერლიგაში დამკვიდრება დამისახა. "ლესტერის" უფროსობას ვუთხარი, რომ ისეთივე მებრძოლი სულის მქონე ფეხბურთელები გვინდა, როგორებიც ახლა გვყვანან. ვიცი, რომ ჩემპიონთა ლიგის ჯგუფურ ეტაპზე ჩვენთან თამაშს უკვე ბევრი კლუბი ნატრობს, მაგრამ გპირდებით, "ლესტერი" მომდევნო სეზონშიც ისევე იბრძოლებს, როგორსაც წელს ხედავდით.

    - როდის მიხვდით, რომ ჩემპიონობა შეგეძლოთ?

    კ.რ: ეს იყო "მანჩესტერ სიტისთან" სტუმრად გამარჯვების შემდეგ. ასევე ლონდონის "არსენალთან" უკანასკნელ წუთებში გაშვებული გოლით წაგებამაც თავისი ქნა. მატჩის შემდეგ თანაშემწეს ვუთხარი, რომ ეს მარცხი ჩვენ უფრო ბრძოლისუნარიანს გაგვხდიდა და რომ დარჩენილ შეხვედრებს აუცილებლად მოვიგებდი.

    - როგორ ფიქრობთ, "ლესტერის" ჩემპიონობა ფეხბურთის ისტორიაში ყველაზე მოულოდნელი მოვლენაა?

    კ.რ: არა, რადგან უმაღლეს ლიგაში გადასვლიდან ძალიან მალე, "ნოტინგემ ფორესტმა" პრემიერლიგაც მოიგო და ჩემპიონთა თასიც. იმედია, იგივე შედეგს ჩვენც გავიმეორებთ.

    - იტალიაში დაბრუნებას არ აპირებთ?

    კ.რ: სიმართლე გითხრათ, ადრე სურვილი მქონდა იტალიის ნაკრებში მუშაობის, მაგრამ ისე აღმოჩნდა, რომ მარტო საბერძნეთის ნაკრებში მომიწია მუშაობა. რა თქმა უნდა, თუ შანსი გამომიჩნდა, აუცილებლად ვიმუშავებ "სკუადრა აძურაში"

    ლიცენზია
    დატოვე კომენტარიკომენტარები (0)
    ჩაწერა სახელი

    Copyright © 2006-2019 by Resonance ltd. . All rights reserved