რეზონანსი
25.11.2021

Black Friday მომხმარებლის ერთ-ერთი სასურველი დღეა მთელი წლის განმავლობაში, როცა მაღაზიები მათ ნებისმიერი სასურველი პროდუქტის შეძენას დიდი ფასდაკლებებით სთავაზობენ.

Black Friday-ს დროს გასათვალისწინებელი რჩევები მომხმარებელს სახელმწიფო ინსპექტორის სამსახურმა საგანგებოდ ამ დღისთვის შესთავაზა.

ჩამონათვალში ყურადღება გამახვილებულია საბანკო ბარათის გამოყენების უსაფრთხოებაზე. სახელმწიფო ინსპექტორის სამსახური მოუწოდებს მოქალაქეებს, საბანკო ბარათის კონსულტანტის ან მესამე პირისთვის გადაცემისას ყურადღებით იყვნენ და ბარათზე დატანილი მონაცემები სხვა პირებისთვის არ იყოს ხელმისაწვდომი.

აქვე, რჩევებია მათთვისაც, ვინც ნივთების შეძენას ონლაინ აპირებს.

"რა რჩევები უნდა გაითვალისწინოთ მაღაზიაში შესყიდვის დროს? საბანკო ბარათის კონსულტანტის ან მესამე პირისთვის გადაცემისას იყავით ყურადღებით;

ეცადეთ, საბანკო ბარათზე დატანილი მონაცემები არ იყოს სხვა პირებისთვის ხილვადი ან ვიდეოსათვალთვალო კამერებისთვის იდენტიფიცირებადი;

შესყიდვის განხორციელებისას თქვენი პირადი მონაცემების მოთხოვნისას, დაინტერესდით რა მიზნით ხდება მათი შეგროვება (მაგ.: თქვენი ტელეფონის ნომერი მაღაზიამ შესაძლოა მარკეტინგული მიზნით გამოიყენოს და სარეკლამო შეტყობინებები გამოგიგზავნოთ);

გახსოვდეთ, რომ თქვენი პირადი მონაცემების გაზიარების შემთხვევაშიც, ყოველთვის შეგიძლიათ მოითხოვოთ მათი დამუშავების შეწყვეტა.

რა რჩევები უნდა გაითვალისწინოთ ონლაინ შესყიდვის დროს?

პირველ რიგში, დარწმუნდით ონლაინ მაღაზიის სანდოობაში და გაითვალისწინეთ შესაბამისი ვებგვერდის რეპუტაცია. ამასთან, სანდო ვებგვერდს მისამართის ველს თან უნდა ერთვოდეს ბოქლომის სიმბოლო და მისამართის პანელი იწყებოდეს HTTPS:// და არა HTTP:// სიმბოლოებით;

სხვადასხვა ვებგვერდებზე რეგისტრაციისას, გამოიყენეთ რთული, კომბინირებული და განსხვავებული პაროლები;

ონლაინ შესყიდვისას არ ისარგებლოთ საერთო მოხმარების კომპიუტერით და არ გამოიყენოთ საჯარო ე.წ. Public Wi-Fi;

თუ ნივთის შეძენისას ვებგვერდი ისეთ პერსონალური მონაცემებს გთხოვთ, რომელთა საჭიროება შესყიდვასთან კავშირში გაეჭვებთ, აუცილებლად დაინტერესდით - რატომ გთხოვენ აღნიშნულ მონაცემებს;

ონლაინ მაღაზიებისთვის გამოიყენეთ სპეციალურად შესყიდვებისთვის განკუთვნილი ბარათი, რომელზეც მხოლოდ კონკრეტული ტრანზაქციის/ტრანზაქციების განსახორციელებლად საჭირო თანხას დაიტანთ;

მოერიდეთ ვებგვერდებზე საბანკო ბარათის მონაცემების დამახსოვრებას;

ხშირად შეამოწმეთ საბანკო ანგარიშები და დარწმუნდით, რომ თქვენი ბარათით ტრანზაქციები მხოლოდ თქვენი განხორციელებულია." - წერს სახელმწიფო ინსპექტორი.

წყარო: „რუსთავი2“

სტატიების ნახვა შეგიძლიათ რუბრიკაში "ყველა სტატია"

ყველა ახალი ამბის ნახვა შეგიძლიათ ამ ბმულზე

საინტერესო ვიდეოები შეგიძლიათ იხილოთ რუბრიკაში "ყველა ვიდეო"

ბოლო ამბების ნახვა შეგიძლიათ ამ ბმულზე


Copyright © 2006-2021 by Resonance ltd. . All rights reserved
×