უძრავი ქონების ბაზარზე შესამჩნევი ცვლილებები დღემდე არ მომხდარა, თუმცა ბინებზე მოთხოვნამ და ფასებმა მცირედით იკლო. ბიზნესის წარმომადგენლები ამბობენ, რომ ტარიფები გაბერილია და რელობასთან შეუსაბამოა. მიუხედავად ამისა, უძრავი ქონების მფლობელების დიდი ნაწილი ბინებს ისევ ძვირად ყიდის ან აქირავებს, რაც სტაბილურობას ხელს უშლის.

სექტორმა პიკური პერიოდი გადალახა, ბაზარზე აჟიოტაჟი აღარ არის, თუმცა მიუხედავად ამისა, ფასებში მხოლოდ მცირედი კლებაა. ბაზარზე არსებულ არარეალურ სიტუაციაზე საუბრობს უძრავი ქონების ეროვნული ასოციაციის მრჩეველთა საბჭოს წევრი, კომპანია „ნოუბლ რიალ ისთეითის” დამფუძნებელი ვაჟა მებაღიშვილი.

"რა თქმა უნდა, მოთხოვნა იმ მასშტაბით აღარ არის, როგორც იყო. ბუმმა გადაიარა, თუმცა მაღალი ფასი ისევ ნარჩუნდება. უძრავი ქონების ბაზარს აძვირებს, მაგალითად, დაძაბულობა რეგიონში, ომით გამოწვეული ეკონომიკური ფონი, რაც გლობალურია, ასევე სამშენებლო მასალების სიძვირე. სიტუაციის დამშვიდება ძალიან კარგ შედეგს მოგვცემს, მაგრამ, როგორც ვხედავთ, პოლიტიკური ვითარება კვლავ რთულია და შესაბამისად, ფასების კუთხითაც ნაკლებად ველოდებით გამოსწორებას, თუმცა ბუნებრივი და კანონზომიერი პროცესი არის ის, რომ პიკურ პერიოდს, როგორც წესი, მოსდევს სტაბილურობა. იმედი მაქვს ასეც მოხდება და რაღაც გონივრულ ჩარჩოში მოექცევა ფასებიც.

ეს გაბერილი ფასები არასერიოზულად მიმაჩნია. ვაკვირდები რა სიტუაციაა ამერიკაში, ევროპაში და სამწუხაროდ, ასეთი აჟიოტაჟი მხოლოდ ჩვენ გვაქვს. არ ექცევა ყურადღება იმას, რომ დამქირავებელი იყოს გრძელვადიანი, სტაბილური და სანდო. პირიქით, არჩევანი კეთდება მოკლევადიანზე, გაუგებარზე და ძვირზე. ყველასთვის ცნობილია, თუ რამდენად გაბერილი ფასებით არის წარმოდგენილი უძრავი ქონება. ყველა ვხდებით, რომ ეს ეფექტი უსასრულოდ არ გაგრძელდება და როდესაც მოქმედების ვადა გაივლის, მერე რას იზამენ?! ომი რომ დასრულდება, მერე რას აპირებენ?! არ შეიძლება ბიზნესთან თამაში”, - განუცხადა "რეზონანსს” ვაჟა მებაღიშვილმა.

რადგან ბაზარზე არსებული ფასები ხელოვნურად გაზრდილი და გაბერილია, ბაზრის ექსპერტი, კომპანია `კიბეს” ხელძღვანელი ნელი გოგუაძე ადასტურებს, რომ გამქირავებლების მცირე ნაწილი ღირებულებას ცოტას აკლებს, თუმცა უდიდესი ნაწილი ისევ მაღალ ფასს ინარჩუნებს.

"მოთხოვნა ცოტათი ჩაცხრა და ფასებიც ასე თუ ისე კლებისკენ მიდის, თუმცა არა მკვეთრი შემცირებისკენ. არიან ბინის მფლობელები, რომლებიც ხვდებიან, რომ აჟიოტაჟური მოთხოვნა აღარაა და არც ფასებია საქართველოს ბაზრისათვის მისაღები. ზოგიერთი ამას ხვდება და ფასს ქვევით სწევს, თუმცა ამას მასიური ხასიათი არ აქვს. გამქირავებლების დიდი ისევ ინარჩუნებს მაღალ ღირებულებას. მაგალითად, არის ერთი ბინა, რომელიც ჩვეულებრივ სიტუაციში გაქირავდებობდა 500 დოლარად და ახლა 800 დოლარზე ნაკლებად არ აფასებენ. გასაგებია, რომ ახალ აშენებულ კორპუსშია, ახალი გარემონტებულია, დიდ დიღომში მდებარეობს, მაგრამ პატარა, 50 კვადრატამდე ბინაა და 800 დოლარი ნამდვილად არ მეყველებს იმაზე, რომ ეს ფასი რეალურია.

ბინის დაქირავების ბაზარზე არსებული ფასები არ ასახავს იმ რეალობასს, რაც უნდა იყოს საქართველოში. ვფიქრობ, თუ ტენდენცია შენარჩუნდება და მოთხოვნა მეტად აღარ გაიზარდა, ალბათ, ფასებიც დარეგულირდება”, - განუცხადა "რეზონანსს” ნელი გოგუაძემ.

რაც შეეხება მოლოდინს, სფეროს წარმომადგენლები ამბობენ, რომ თუკი რაიმე გაუთვლისწინებელი გარემოება არ შეიქმნა, ფასები დაიკლებს. დამატებითი მიგრაციული ტალღების გარეშე ქირაზე ტარიფების გაზრდას აღარ ელოდება "გალტ ენდ თაგარტის” უფროსი ანალიტიკოსი, კახა სამყურაშვილიც.

„რეალურად, ის მოლოდინი უძრავი ქონების ინვესტორებში, რომ შემოსული მიგრანტები აქ სამუდამოდ დარჩებიან და ქირის ტარიფი ყოველთვის ასეთ მაღალ ნიშნულზე შენარჩუნდება, ვფიქრობთ, არ არსებობს. დღეს უძრავი ქონების შეძენა და გათვლა იმაზე, რომ ეს ქონება ამ დონის იჯარას დააგენერირებს შემდეგი 7-8 წლის განმავლობაში, არარელურია.

ჩვენ რომ შევხედეთ, გაყიდვაში რამდენია რუსი მიგრანტების წილი, ეს საკმაოდ დაბალი რიცხვია, ანუ ისეთივე რიცხვია, როგორიც როგორიც იყო მაგალითად 2019 წელს, ანუ თბილისში ეს არის 2-3%, და ბათუმში - 10-15%. რაც საკმაოდ ნორმალური მაჩვენებელი იყო პანდემიამდეც. შესყიდვის ნაწილში დრამატულ ზრდას ვერ ვხედავთ, ქირის ნაწილში კი, პირიქით, ვხედავთ“, - აღნიშნა სამყურაშვილმა და ასევე განაცხადა, რომ წლის ბოლოსთვის ფასები დოლარში გაზრდილია 20-25%-ით, მაგრამ ლარში, ვალუტის გამყარების გამო, სხვაობა არის 5-7%, ეს კი მიზეზია იმისა, რომ ბაზარი ინარჩუნებს სიმყარეს.

„რაც შეეხება სამომავლოდ ფასების ზრდას, ვფიქრობთ, რომ ის დრამატული ვითარება, რაც იყო 2021-2022 წლებში, მეტ-ნაკლებად დასტაბილურებულია. აღარ ველოდებით ნახტომისებურ ზრდას, საკმაოდ ზომიერ ერთნიშნა ზრდას ველოდებით უძრავი ქონების ფასებში, ხოლო ქირების შემთხვევაში, ვფიქრობთ, რომ გაჯერდა ბაზარი. რაღაც დამატებითი მიგრაციული ტალღების გარეშე, აღარ ველოდებით, რომ ტარიფები გაიზრდება 2023 წლის განმავლობაში“, - აღნიშნა კახა სამყურაშვილმა.