ია აბულაშვილი
18.03.2021

„ტბას მიერთვის წყალი ფოსოსი, რომელი გამოსდის ყარსის მთას, და მოდის ჩრდილოთ. ამ წყალზედ არს, წყაროსთავის ეკლესია, ფრიად დიდი, მშვენიერი, გუმბათიანი, რომელიც ააშენა მირდატ გორგასლის ძემან“ - ასე აღწერს ვახუშტი ბატონიშვილი წყაროსთავის ეკლესიას, რომელიც მდებარეობდა კარწახის ტბის მახლობლად.

შუა საუკუნეების ქართული ტაძარი, რომელიც დღევანდელი თურქეთის ტერიტორიაზე მდებარეობდა, მოხსენიებულია მესხური დავითნის ქრონიკაში. მემატიანე ჯუანშერის ცნობით, რომელიც მე-11 საუკუნეში მოღვაწეობდა, პირველი ტაძარი მე-6 საუკუნის დასაწყისში ვახტანგ გორგასლის ძის მირდატის დროს აშენდა და არქიტექტურით ოპიზის ტაძარს წააგავდა. 

მე-10 საუკუნეში გუმბათოვან ტაძრად გადაკეთდა და გუმბათის ყელი ორნამენტებით და ჯვრის გამოსახულებებით შეუმკიათ. აღმოსავლეთ ფასადს კი ამშვენებდა ფრესკა ღვთისმშობელი ყრმით.

წყაროსთავის საეპისკოპოსო ერთ-ერთი უძველესი იყო საქართველოში, მისი ეპარქია მოიცავდა ტერიტორიას არტაანიდან ყარსის მთამდე. 

წყაროსთავი ძველი ქართული მწერლობის მნიშვნელოვანი კერაც იყო. აქ მოღვაწეობდნენ ცნობილი მწიგნობრები: მე-11 საუკუნეში ექვთიმე გრძელი, მე-13 საუკუნეში საბა მწერალი. 

ცნობილია წყაროსთავიდან მოღწეული ძვირფასი ხელნაწერები:  წყაროსთავის სახარება და მე-12 საუკუნეში შექმნილი წალკის ოთხთავი. 

წყაროსთავის ეკლესია, სრულ განადგურებამდე, 1902 წელს აღწერა ექვითმე თაყაიშვილმა თურქეთში მოგზაურობის დროს. დღეს ამ უნიკალური ტაძრიდან მხოლოდ ქვებია შემორჩენილი, რომელიც სოფლის გარშემოა მიმოფანტული.

ვიდეო რეკლამა

სტატიების ნახვა შეგიძლიათ რუბრიკაში "ყველა სტატია"

ყველა ახალი ამბის ნახვა შეგიძლიათ ამ ბმულზე

საინტერესო ვიდეოები შეგიძლიათ იხილოთ რუბრიკაში "ყველა ვიდეო"

ბოლო ამბების ნახვა შეგიძლიათ ამ ბმულზე

ლიცენზია
ვიდეო რეკლამა

Copyright © 2006-2022 by Resonance ltd. . All rights reserved
×