რეზონანსი
12.06.2021

უნდა გვქონდეს ვაქცინების გარანტირებული მოწოდება და ამასთან, ადამიანები უნდა იყვნენ მზად, რომ ვაქცინა გაიკეთონ, ორივე ფლანგზე არის სამუშაო, - ამის შესახებ ალერგოლოგ-იმუნოლოგმა, ბიძინა კულუმბეგოვმა საქართველოს პირველ არხს განუცხადა.

„გვჭირდება რეალურად თვეში 500 000-დან 600 000-მდე ადამიანის აცრა. ეს მარტივი არ იქნება. ლოჯისტიკურად ამის გამართვა არ არის მარტივი. ამასთან, ხელს გვიშლის ის, რომ ვაქცინებზე ულიმიტო ხელმისაწვდომობა არ გვაქვს. ორ პრობლემას ვაწყდებით: უნდა გვქონდეს ვაქცინების გარანტირებული მოწოდება და მეორე მხრივ, ადამიანები უნდა იყვნენ მზად, რომ ვაქცინა გაიკეთონ. ამიტომ, ორივე ფლანგზე არის სამუშაო. 200 000 ადამიანის აცრა ეს არის ის ნიშნული, რომელსაც გრიპის სეზონის დროს ვაღწევდით. ეს ნიშნული არის იმ ადამიანების, რომლებიც დღესვე მზად არიან, რომ ვაქცინა გაიკეთონ", - განაცხადა კულუმბეგოვმა.

მისი თქმით, მნიშვნელოვანია როგორც ვაქცინების საჭირო რაოდენობა, ისე მოქალაქეების დარწმუნება, რომ ვაქცინაცია სასიცოცხლოდ მნიშვნელოვანია.

„ვუახლოვდებით იმ ზღურბლს, როდესაც უკვე არიან ადამიანები, რომელთა გარკვეული ნაწილი ფიქრობს, რომ ცოტას კიდევ დააკვირდება და მერე გადაწყვეტს ვაქცინაციას ან მოსახლეობის ის ნაწილი, რომელიც ამბობს, რომ კატეგორიულად არ უნდა ახლად შექმნილი ვაქცინა. ამიტომ, ახლა გვჭირდება ძალიან სერიოზული მუშაობა, რომ დავითანხმოთ ეს ადამიანები, ავუხსნათ და დავარწმუნოთ, რომ სასიცოცხლოდ მნიშვნელოვანია ქვეყნის არსებობისა და განვითარებისთვის და თითოეული ოჯახის კეთილდღეობისთვს, რომ ქვეყანაში პანდემია დასრულდეს. აქ არის ძალიან ბევრი სამუშაო. ახლა ვართ კომფორტულ სიტუაციაში, ვაქცინა გვაქვს ცოტა და მთხოვნელი გვყავს ძალიან ბევრი, ამიტომ ეს კომფორტი მალე დაგვერღვევა და ეს იქნება ის ივლისი და აგვისტო, როცა უფრო მეტი ვაქცინა გვექნება, ვიდრე მსურველი იქნება ამ ვაქცინის. მაქსიმუმი უნდა გავაკეთოთ ყველამ, ეს არის ზეპარტიული და ზესახელმწიფოებრივი საკითხია. ყველა უნდა ვიყოთ ერთ აზრზე და ყველა უნდა დავდგეთ ერთ ფერხულში, რომ ადამიანების 60%-ის აცრა მოხერხდეს. დარწმუნებული ვარ, რომ თუ ჩვენ მოვინდომებთ, ეს არის აბსოლუტურად რეალური. მთავარია, ვაქცინებიც გვქონდეს, მარტო ცარიელი პროპაგანდაც არ გვიშველის", - განუცხადა საქართველოს პირველ არხს კულუმბეგოვმა.

სტატიების ნახვა შეგიძლიათ რუბრიკაში "ყველა სტატია"

ყველა ახალი ამბის ნახვა შეგიძლიათ ამ ბმულზე

საინტერესო ვიდეოები შეგიძლიათ იხილოთ რუბრიკაში "ყველა ვიდეო"

ბოლო ამბების ნახვა შეგიძლიათ ამ ბმულზე

ლიცენზია

Copyright © 2006-2021 by Resonance ltd. . All rights reserved
×