აბსოლუტურად მოკლებულია საფუძველს ყოველგვარი გაცხადება, რომლითაც ცდილობენ, რაიმე ფორმით რეპუტაცია შეულახონ ან პანიკა დათესონ მოსახლეობაში, თითქოს ჯანმრთელობის დაცვის მათთვის გარანტირებულ უფლებას რაიმე საფრთხე ემუქრება, - ამის შესახებ ჯანდაცვის მინისტრმა, მიხეილ სარჯველაძემ აღნიშნა კონკრეტული ჯგუფების მიერ საყოველთაო ჯანდაცვის პროგრამასთან დაკავშირებულ ე.წ. საფრთხეებზე გაკეთებულ განცხადებაზე.
მიხეილ სარჯველაძემ აღნიშნა, რომ საქართველოს ჯანდაცვა კვლავაც განაგრძობს შემდგომ განვითარებას.
„ასეთი ტიპის განცხადებები ზოგიერთი ექსპერტისგან, ზოგიერთ შემთხვევაში ჟურნალისტებისგან, ბოლო ხანებში მართლაც მომრავლდა. იმდენად დაუსაბუთებელია ასეთი განცხადებები, ეს არ იქნებოდა საყურადღებო, რომ არა ერთი ფაქტორი - ჯანდაცვაზეა საუბარი, ადამიანების სიცოცხლეს და ჯანმრთელობას ეხება. შესაბამისად, უნდა აღინიშნოს, რომ ეს არის მტკნარი ტყუილი. არავითარი ნიშანი არ არსებობს საიმისოდ, რომ რაიმე შეფერხება შეიძლება არსებობდეს ჯანდაცვის სისტემის გამართულად ფუნქციონირების თვალსაზრისით. ყველაფერი, რაც დაგეგმილია, ბუნებრივია, ხორციელდება გეგმის გათვალისწინებით. რა თქმა უნდა, საქართველოს ჯანდაცვა კვლავაც განაგრძობს შემდგომ განვითარებას", - განაცხადა მიხეილ სარჯველაძემ.