უკრაინას შესაძლოა, რუსეთთან სამშვიდობო შეთანხმების ფარგლებში ტერიტორიების დათმობა მოუწიოს, – განაცხადა კიევის მერმა ვიტალი კლიჩკომ „ბიბისისთან“ ინტერვიუში. იგი პირველი მოქმედი ჩინოვნიკია, რომელმაც ეს შესაძლებლობა დაუშვა

„ერთ-ერთი სცენარი არის ტერიტორიის დათმობა. ეს არ არის სამართლიანი, მაგრამ მშვიდობისთვის, დროებითი მშვიდობისთვის, შესაძლოა, ეს იყოს დროებითი გამოსავალი“, – განაცხადა კლიჩკომ.

კლიჩკომ ასევე აღნიშნა, რომ უკრაინელი ხალხი „არასოდეს შეეგუება რუსეთის მიერ ოკუპაციას“, მაგრამ მშვიდობის მისაღწევად უკრაინის პრეზიდენტს, ვოლოდიმირ ზელენსკის შესაძლოა, „მტკივნეული გადაწყვეტილების“ მიღება მოუწიოს.

ჟურნალისტის კითხვას, განიხილავდა თუ არა ზელენსკი მასთან ერთად მშვიდობის მიღწევის შესახებ დეტალებს, კლიჩკომ უპასუხა: „არა. პრეზიდენტი ზელენსკი ამას თვითონ აკეთებს. ეს არ არის ჩემი ფუნქცია“.