უძრავი ქონების ბაზარზე მოთხოვნამ იკლო. ბოლო კვლევები აჩვენებს, რომ მყიდველთა ძირითადი ნაწილი უცხოეთში მცხოვრები საქართველოს მოქალაქეები ან უცხო ქვეყნის მოქალაქე ეთნიკურად ქართველები არიან. მათი მხრიდან წამოსული მზარდი ნაკადი კი მინელდა. ქართული ბაზარი გაჯერებულია, რამაც სფეროში რყევები გამოიწვია.

საინვესტიციო ბანკ "გალტ ენდ თაგარტის" მიმოხილვაში ცალსახად ნათქვამია, რომ უძრავი ქონების რეალიზაციაში ემიგრანტი ქართველები ყველაზე მკვეთრ სურათს ქმნიან, თუმცა ამჯერად მოთხოვნა შენელებულია. სფეროს სპეციალისტების აზრით, ძნელია იმაზე საუბარი, კონკრეტულად ვინ წარმოადგენს ბაზრის მთავარ საყრდენს. თუმცა, ერთხმად ამბობენ, რომ ჭარბი მოთხოვნა მინელდა და დარგშიც გარკვეული რყევა გაჩნდა, რაც ფასებზეც აისახა და კორექტირების საჭიროებაც დადგა.

სამშენებლო კომპანია ,,სიგმას" დირექტორი ზურაბ ლაჩაშვილი ,,რეზონანსთან" საუბრისას ცალსახად ამბობს, რომ უძრავი ქონების ბაზარზე მოთხოვნა შემცირდა, ხოლო თუ ვინ წარმოადგენს ძირითად მყიდველს, ამაზე ერთი კონკრეტული ფირმის მაგალითზე საუბარი უჭირს.

,,მიგრანტთა ჭარბი რაოდენობა უკვე აღარ არის. მათმა დიდმა ნაწილმა, ვინც უძრავი ქონების ბაზარზე აქტიურობდა, ქვეყანა დატოვა. მზარდი მოთხოვნა მინელდა და ამ ეტაპზე, ღირებულების კორექცია მიმდინარეობს. ფასებიც სტაბილურობისკენ მიდის.

ძნელია ვისაუბრო იმაზე, თუ ვინ არის ბაზარს ძირითადი მოთამაშე. კონკრეტული ფირმის მაგალითზე ვერ ვიტყვი ვინ არიან ძირითადი შემსყიდველები, მაგრამ ერთი რამ ცხადია, ადგილობრივ ბაზარზე ბინების გაყიდვა შემცირებულია", - განაცხადა ლაჩაშვილი.

"გალტ ენდ თაგარტის" მიმოხილვაში გამოკვეთილ აქცენტებს ეთახმება, "ერისთავი ისთეითსის" მმართველი პარტნიორი ზურაბ ერისთავი. ისიც ადასტურებს, რომ უძრავი ქონების რეალიზაციაში ქართველები ყველაზე მკვეთრ სურათს ქმნიან.

„ქართველი ადამიანი ადგილობრივი ბაზრისთვის ყველაზე ყველაზე მნიშვნელოვანი კლიენტია. შესაბამისად, ის ტენდენცია, რაც 20 წლის წინ დაიწყო, რომ ოჯახების გაყოფა ხდება, ახალ წყვილებს სჭირდებათ შედარებით პატარა ბინები, ეს მიმართულება ყოველთვის აქტიურია. ამას ხელს უწყობს მაგალითად, საბანკო დაკრედიტებაზე წვდომა. ჩვენ გვქონდა გარკვეული შეზღუდვები, თუმცა ახლა ეს შეზღუდვები გაცილებით ნაკლებია.

რაც შეეხება რუსულ გავლენას ამ ყველაფერზე. ნამდვილად შეინიშნებოდა დიდი აქტივობა. ყოველ შემთხვევაში იმ ფონზე, რასაც ადრე ვაკვირდებოდით. განსაკუთრებით გაიზარდა რუსეთის მოქალაქე, მაგრამ ეროვნებით ქართველების მიერ უძრავი ქონების შეძენის წილი საქართველოში“, - განაცხადა ერისთავმა.

საყურადღებოა, რომ მოთხოვნა ეხება ყველა კატეგორიის ბინას, დაწყებული ეკონომ კლასიდან, დამთავრებული პრემიუმ კლასით.

სამშენებლო დარგის ექსპერტ  შოთა გუჯაბიძეს კი უჭირს იმის თქმა თუ კონკრეტულად ვინაა მიბმული ქართულ ბაზართან, რადგან სეგმენტურობა ცვალებადია.

,,ემიგრანტებმა ბუმი შექმნეს და პიკს მიაღწიეს უძრავი ქონების ბაზარზე. აქ მარტო ეთნიკურად ქართველ მოქალაქეებს არ ვგულისხმობ. მათ რიცხვშია უცხო ქვეყნის მოქალაქეებიც, რომელიც სხვა ეკონომიკური პროცესების გამო იმყოფებიან საქართველოში.

გარკვეული პერიოდის შემდეგ მათთვისაც ჩვენი უძრავი ქონების ბაზარი ორგანული გახდა. ახლა უკვე აღარ ჩქარობენ და აქტივობაც შენელდა. არც აქვთ სურვილი მკვეთრად მომატებული ფასი გადაიხადონ. ნაკადის შემცირება, ემიგრანტი იქნება თუ სხვა ქვეყნის მოქალაქის, უცებ ვერ დააგდებს გაზრდილ ღირებულებას. შესაბამისად, ვისაც უკვე მაღალი ფასი აქვს გადახდილი, მსგავსი ქონების რეალიზაცია და იაფად გაყიდვა უჭირს."- განაცხადა რეზონანსთან გუჯაბიძემ.

უძრავი ქონების სექტორში ხდება ეკონომიკური შოკებიც. მყიდველთა ნაკადს არასტაბილური ეკონომიკური ფონიც ამცირებს, მაგრამ ევროპასთან ინტეგრაცია და მათ სავაჭრო სივრცეში მოქცევა, თავისთავად ზრდის ბაზარზე მოთხოვნას.

,,თუ გადავხედავთ ბოლო 30-20 წლის ტენდენციას, არის მოკლევადიან პერიოდებში ვარდნის ტენდენცია იყო, მაგრამ საბოლოო ჯამში მაინც ზრდა აღინიშნება. არასტაბილურტი ეკონომიკური ფონი ამცირებს ემიგრანტებისა და ყიდვა-გაყიდვის ნაკადს. მეორეს მხრივ, ევროპასთან ინტეგრაცია და მათ სავაჭრო სივრცეში მოქცევა თავისთავად აფართოვებს ბაზარს.

ჩვენ შევისწაველეთ საქართველოს ანალოგი ქვეყნები. შერჩეულთა შორის იყო პასტსაბჭოთა სივრცის, სუფთა ევროპული და მომიჯნავე ქვეყნები. საინტერესო იყო ის რომ, ევროკავშირიში ინტეგრაციის წინა და შემდგომ პერიოდებში, ამ ანალოგ ქვეყნებში უძრავი ქონების ფასის ზრდა 15-20%-დან დაფიქსირდა. ეს ციფრი გვიჩვენებს როგორი ნახტომი შეიძლება დაფიქსირდეს ჩვენთანაც.

არსებობს შემაფერხებელი ფაქტორებიც, როგორიცაა ბაზრის სეზონურობა. ძალიან მოწყვლადია ბაზარი პოლიტიკურ პროცესებთან. სანამ ეს მდგომარეობა დალაგდება და საბოლოო სახეს მიიღებს, ბაზარი ცოტა შენელებულია.

დანამდვილებით შემიძლია განვაცხადო, რომ მომავალ 5 წლიან პერიოდში მოთხოვნა მზარდი იქნება. არათუ დედაქალაქში, საქართველოს სხვადასხვა ქალაქებშიც აქტიურობაა. ბოლო წლების ტენდენცია ისეთია, რომ ბათუმში, ქუთაისში, რუსთავში უძრავი ქონების თვალსაზრისით მასშტაბებში გაიზარდა. ეს გვიჩვენებს, რომ მარტო თბილისში არ იქნება ლოკალიზებული და ათვისებული. შესაბამისად, ფასები ცენტრში სტაბილურად, მაგრამ ნელა აიწევს", - განაცხადა გუჯაბიძემ.

"გალტ ენდ თაგარტის" განახლებული მიმოხილვის მიხედვით, თბილისში უძრავი ქონების ბაზარი შემცირდა. მარტში დედაქალაქში 229 მლნ 400 ათასი დოლარის ღირებულების ბინა გაიყიდა, რაც წლიურად 8.4%-იანი კლებაა. აღსანიშნავია, რომ ჯამურად 2024 წლის პირველ კვარტალში 717 მლნ 400 ათასი დოლარის ღირებულების 9 506 ბინა გაიყიდა. ღირებულება 2.5%-ით არის გაზრდილი, რაოდენობრივად კი 2%-ზე მეტით შემცირებაა. თბილისის უძრავი ქონების ბაზარზე ყველაზე დიდ მოთხოვნას საქართველოს მოქალაქეები ქმნიან, რაც მთლიანი გაყიდვების 85%-ს შეადგენს.