ოკუპირებულ ცხინვალის რეგიონში ე.წ. ვადამდელი საპრეზიდენტო არჩევნები მიმდინარეობს, სადაც კრემლის ფავორიტად დე ფაქტო პრეზიდენტის მოვალეობის შემსრულებელი მარატ კამბოლოვი მოიაზრება. კონფლიქტოლოგ პაატა ზაქარეიშვილის პროგნოზით, მოსკოვის კანდიდატი პირველივე ტურში დამაჯერებლად გაიმარჯვებს, რაც რეგიონის რუსეთის ფედერაციაში დე ფაქტო ინტეგრაციასა და მოსკოვის პოლიტიკის უპირობო გაგრძელებას ისახავს მიზნად.

პარლამენტის თავმჯდომარე შალვა პაპუაშვილი დღევანდელ ბრიფინგზე ქვეყანაში მიმდინარე კვირის მთავარ პოლიტიკურ საკითხებზე ამახვილებს ყურადღებას. განცხადებები შეეხებოდა როგორც ექსპრემიერ ღარიბაშვილის ირგვლივ მიმდინარე პროცესსა და ოპოზიციური პარტიების შესაძლო გაერთიანებას, ისე საკონსტიტუციო სასამართლოში „გახარია საქართველოსთვის" საკითხის დამატებას, ნამახვანჰესის საქმეს, ოკუპირებულ ცხინვალში დაგეგმილ ე.წ. არჩევნებსა და საქართველოს საგარეო პოლიტიკის აქტუალურ თემებს.

მთავრობამ გრანტების მართვის სააგენტოს დახურვის გადაწყვეტილება მიიღო. პრემიერ-მინისტრ ირაკლი კობახიძის განცხადებით, უწყება, რომელიც წელიწადნახევრის წინ დიდი ზარზეიმით შეიქმნა, წლის ბოლომდე დაიხურება, რადგან, როგორც პრემიერი ამბობჰს, „ენჯეოები" უცხოური ინტერვენციის ინსტრუმენტია". ექსპერტები კი სააგენტოს გაუქმებას მის უფუნქციობასა და დაბალ ეფექტიანობას უკავშირებენ.

ოპოზიციურ პოლიტიკურ ველზე შესაძლოა ახალი პოლიტიკური გაერთიანება გამოჩნდეს - „პატრიოტთა ალიანსის" ლიდერი ირმა ინაშვილი ირაკლი ღარიბაშვილთან პოლიტიკური ერთობის შესაძლებლობას კვლავ არ გამორიცხავს. ამბობს, რომ შეთავაზება ყოფილი პრემიერის მიმართ კვლავ ძალაშია და მათი პოლიტიკური პლატფორმა პოლიტიკურ ველზე „სერიოზულ სიახლეს" შეიტანს.

პატიმრობაში მყოფი ენმ-ის ერთ-ერთი ლიდერი მორიგ წერილს აგზავნის, რითაც ოპოზიციას „უმოქმედობის დასრულების, შიშის დაძლევისა და რეალური მოქმედებისკენ" მოუწოდებს. ლევან ხაბეიშვილი კოლეგებს ურჩევს, სატელევიზიო ეთერებში დროის გაყვანის სანაცვლოდ, ერთიანობა აჩვენონ და მასშტაბური საპროტესტო აქციები დააანონსონ.

საქართველოში ოპოზიციური პარტიების შესაძლო აკრძალვის საკითხი კვლავ პოლიტიკური დღის წესრიგის ერთ-ერთ მთავარ თემად რჩება. მმართველი გუნდი აცხადებს, რომ საკონსტიტუციო სასამართლოს მიმართავს და სურს, საკითხის განხილვა იანვარში დასრულდეს. ოპოზიციაში კი მიიჩნევენ, რომ პარტიების აკრძალვა ქვეყანაში პოლიტიკური სივრცის კიდევ უფრო შეზღუდვას ნიშნავს და მიაჩნიათ, რომ ასეთ გადაწყვეტილებას დასავლეთის მხრიდან მძაფრი რეაქცია მოჰყვება.

"ქართულ ოცნებაში" ბოლო პერიოდში გახშირებულ სამთავრობო და საკადრო ცვლილებებს ოპოზიცია კადრების დეფიციტს, შიდა დაპირისპირებასა და გარკვეულ სხვა პრობლემებს უკავშირებს, ხელისუფლება კი ცვლილებებს მენეჯერული ეფექტიანობისა და კონკრეტული შედეგების საჭიროებით ხსნის. მმართველ გუნდში აცხადებენ, რომ თანამდებობებზე გადაადგილება ჩვეულებრივი პოლიტიკური პროცესია.

ხელისუფლება „რუსოფობიის წინააღმდეგ ბრძოლას" ააქტიურებს - პრემიერ-მინისტრ ირაკლი კობახიძის განცხადებით, მმართველი გუნდი საქართველოში ქსენოფობიისა და რუსოფობიის გაღვივების ნებისმიერ მცდელობას „ჩანასახშივე" დაუპირისპირდება, თუმცა, ამ პოლიტიკის პარალელურად, რუსეთთან მიმართებით „პრაგმატული და პრინციპული" კურსი გაგრძელდება.

უკვე რამდენიმე თვეა ოპოზიციის ერთ-ერთი გამორჩეული სახე, „სტრატეგია აღმაშენებლის" ლიდერი გიორგი ვაშაძე საჯარო არ გამოჩენილა. პოლიტიკურ პროცესებში ის საერთოდ აღარ მონაწილეობს, მისი პარტიის ვებ-გვერდიც აღარ ფუნქციონირებს და მითითებულ მისამართზე ინტერნეტ-მაღაზიაა განთავსებული. პარტიაში აცხადებენ, რომ ვაშაძე უცხოეთში იმყოფება და მისი პასიურობაც ამით არის გამოწვეული, თუმცა ანალიტიკოსები „რეზონანსთან" საუბრისას სხვა ვერსიებსაც განიხილავენ.

„ქართული ოცნება" მესამე წრეზე მიდის და პარტიების აკრძალვის თაობაზე საკონსტიტუციო სარჩელს კიდევ ერთ პარტიას - „გახარია საქართვეოსთვის" ამატებს. ეს ავტომატურად გაზრდის სარჩელის განხილვის ვადას. ის ფაქტი, რომ ამას მმართველი პარტია უკვე მეორედ აკეთებს, გარკვეულ კითხვებს აჩენს, მათ შორის თავად „ოცნების" მხარდამჭერებში.

საქართველოს მთავრობაში ცვლილებებია - პრემიერმა ირაკლი კობახიძემ სახელმწიფო უსაფრთხოების სამსახურის უფროსის თანამდებობაზე გეკა გელაძის ნაცვლად თამაზ ბორაშვილის კანდიდატურა წარადგინა. გელაძე კი შინაგან საქმეთა სამინისტროში ბრუნდება და ამჯერად მინისტრის მოადგილის პოსტს დაიკავებს.

ოპოზიცია მომავალ კვირას სამთავრობო ცვლილებებსა და ხმაურიან დაკავებებს აანონსებს „ნაციონალური მოძრაობის" ერთ-ერთი ლიდერის, ლაშა ფარულავას მტკიცებით, სუს-ის ყოფილი უფროსი მამუკა მდინარაძე შინაპატიმრობაშია, ხოლო მოქმედ პრემიერ ირაკლი კობახიძეს მალე ზერაბ პატარიძე ჩაანაცვლებს. ანალიტიკოს რამაზ საყვარელიძის შეფასებით, ეს უფრო ჭორაობას ჰგავს, თუმცა, მისივე თქმით, „ბევრი ჭორი მერე ახდენილა".