საფრანგეთის ახალ ელჩთან, ოლივიე კურტოსთან შეხვედრაზე არასამთავრობო ორგანიზაციების წარმომადგენლებთან ერთად ყოფილი დიპლომატი, „საქართველოს ინდუსტრიული ჯგუფის“ არა-აღმასრულებელი დირექტორი, გელა ბეჟუაშვილიც იმყოფებოდა. ბეჟუაშვილი „ქრონიკასთან“ სატელეფონო საუბარში აცხადებს, რომ ეს იყო გაცნობითი ხასიათის შეხვედრა.

„გაცნობითი შეხვედრა იყო, უბრალოდ, აინტერესებდა საქართველოს მდგომარეობა“, - განაცხადა გელა ბეჟუაშვილმა.

„ქრონიკის“ კითხვაზე, რა თემებზე ისაუბრეს შეხვედრაზე, ბეჟუაშვილმა განაცხადა: „ყველა თემაზე - ეკონომიკაზე, უსაფრთხოებაზე, ევროპულ ინტეგრაციაზე“. მისივე განცხადებით, შეხვედრა ელჩთან, სახლში შედგა.

„კურიერის“ ინფორმაციით, საფრანგეთის ახალი ელჩი ოლივიე კურტო, 15-მდე არასამთავრობო ორგანიზაციის წარმომადგენელს ფარულად, ჭანტურიას ქუჩაზე ერთ-ერთი საცხოვრებელ კორპუსში შეხვდა.

მმართველი გუნდის შეფასებით, კითხვებს იწვევს ის, თუ რატომ ჩაატარა ელჩმა შეხვედრა ბინაში ორგანიზაციებთან, რომლებიც „ქართული ოცნების“ თქმით, ანტიქართულ და ანტიკონსტიტუციურ აქტივობებში არიან მხილებულები.