FARA-ს მიზანი ამერიკის საზოგადოებისთვის გამჭვირვალობის ხელშეწყობაა და გამჭვირვალობას თუ იმსახურებს ამერიკელი ხალხი, ქართველი საზოგადოებაც იმსახურებს მას, – ამის შესახებ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე რატი იონათამიშვილი სოციალურ ქსელში წერს და ეხმაურება აშშ-ის სახელმწიფო დეპარტამენტის პრესსპიკერის, მეთიუ მილერის განცხადებას.

„ნუთუ ასეთი დაბალი წარმოდგენა აქვთ ქართველ ხალხზე, რომ ფაქტობრივ ტყუილს იტყვიან და ამას აქ ვინმე დაიჯერებს? არც კეზერაშვილი და ალასანია წარმოადგენენ მთავრობას და არც „დროა“ და „გირჩი“ – არასამთავრობო ორგანიზაციებს. სწორედ ამერიკის საზოგადოებისთვის გამჭვირვალობის ხელშეწყობაა FARA-ს მიზანი და თუ გამჭვირვალობას იმსახურებს ამერიკელი ხალხი, ქართველი საზოგადოებაც იმსახურებს მას!“ – წერს რატი იონათამიშვილი.

აშშ-ის სახელმწიფო დეპარტამენტის პრესსპიკერმა, მეთიუ მილერმა პრესკონფერენციაზე განაცხადა, რომ ამერიკული „ფარა“ ეხება ადამიანებს, რომლებიც უცხოური მთავრობების სახელით მოქმედებენ და არა მათ, ვინც ლეგიტიმური არასამთავრობო ორგანიზაციების საქმიანობას ახორციელებენ. მისივე თქმით, ეს განსხვავებული რამ არის.