აშშ-ის სამხედრო გემებზე თავდასხმების გაგრძელების შემთხვევაში, მეტ ირანულ ნავთობტანკერს დავარტყამთ, - ამის შესახებ აშშ-ის სახელმწიფო მდივანმა მარკო რუბიომ განაცხადა. „ირანი ამერიკულ სამხედრო გემებზე თავდასხმების გაგრძელებას ცდილობს და ყოველ ჯერზე, როცა ამას გააკეთებენ ან ამის გაკეთებას შეეცდებიან, ნავთობტანკერებს დაკარგავენ", - განაცხადა რუბიომ.
შეგახსენებთ, აშშ-ის ცენტრალური სარდლობის ცნობით, ამერიკულმა სამხედრო ძალებმა ხუთი ირანული ნედლი ნავთობის გადამზიდი ტანკერი გაანადგურეს, მას შემდეგ, რაც ირანის ისლამური რევოლუციის გუშაგთა კორპუსმა ბოლო ორი დღის განმავლობაში აშშ-ის საზღვაო ძალების სამხედრო გემზე ბალისტიკური რაკეტებით თავდასხმა ორჯერ სცადა.
მოგვიანებით, ირანის ისლამური რევოლუციის გუშაგთა კორპუსმა ნავთობტანკერებზე დარტყმების საპასუხოდ, იორდანიაში, აშშ-ის სამხედრო ბაზაზე იერიშის შესახებ გამოაცხადა.
ანალიტიკოსების უმეტესობა თანხმდება, რომ მოვლენები ძალიან სახიფათო ფაზაში შედის, სადაც ორივე მხარე „წითელი ხაზების" გაფართოებას ცდილობს.
მარკო რუბიოს განცხადება და ტანკერების განადგურება აშშ-ის მხრიდან ახალი ტაქტიკაა - იმის ნაცვლად, რომ უბრალოდ მოიგერიონ ირანული რაკეტები, ამერიკელებმა პირდაპირ ირანის მთავარ ეკონომიკურ არტერიას ნავთობის ექსპორტსა და ისლამური რევოლუციის გუშაგთა კორპუსის დაფინანსების წყაროებს დაარტყეს.
ექსპერტების ნაწილი მიიჩნევს, რომ ეს არის ვაშინგტონის მცდელობა, შექმნას ძლიერი შემაკავებელი ეფექტი, აჩვენოს თეირანს, რომ ამერიკულ გემებზე თავდასხმა ირანს კოლოსალური ფინანსური ზიანი დაუჯდება.
თუმცა, მეორე მხრივ, სამხედრო ანალიტიკოსები შიშობენ, რომ ეს სტრატეგია ირანს კუთხეში ამწყვდევს. იორდანიაში ამერიკულ ბაზაზე საპასუხო დარტყმა სწორედ იმის სიგნალია, რომ თეირანი უკან დახევას არ აპირებს და მზადაა, კონფლიქტი მთელ რეგიონზე გავრცელდეს. როდესაც ირანი ეკონომიკური შემოსავლის დაკარგვის საფრთხეს ხედავს, ის კიდევ უფრო აგრესიულად უტევს აშშ-ის ხმელეთის ბაზებსა და მოკავშირეებს.
ენერგეტიკული ბაზრის ექსპერტები უკვე საუბრობენ ნავთობის ფასების მკვეთრ ნახტომზე და ჰორმუზის სრუტეში ნაოსნობის სრულ პარალიზებაზე, რაც გლობალურ ეკონომიკას დარტყმის ქვეშ აყენებს.