საქართველოში სამშენებლო სექტორი სტაბილურობას ინარჩუნებს. ახლო აღმოსავლეთში არსებული კონფლიქტის მიუხედავად, ბაზარზე უძრავი ქონების გაძვირების ტენდენცია ჯერჯერობით არ შეიმჩნევა. მართალია, დაახლოებით თვენახვევრის წინ, როცა აშშ-სა და ირანს შორის სამხედრო დაპირისპირება დაიწყო, საფასო რყევა შეინიშნებოდა, მაგრამ სიტუაცია მალევე დასტაბილურდა. სპეციალისტები ადასტურებენ, რომ ბაზარი სტაბილურია და ახლო მომავალში რაომე განსაკუთრებული ცვლილებები მოსალოდნელი არ არის.

მსოფლიოში ვითარება სულ უფრო იძაბება, მაგრამ მთავრობის დაპირება სურსათისა და მედიკამენტების გაიაფებასთან დაკავშირებით ძალაში რჩება. აპრილის ბოლომდე ზუსტად 2 კვირა რჩება. სპეციალისტები ფიქრობენ, რომ საკანონმდებლო ცვლილება გატარდება, რაც სავაჭრო ქსელებისა და დისტრიბუციის მაღალ მოგებას შეამცირებს. კონტროლის მექანიზმი კი გაძლიერდება.

მმართველი პარტია აპრილში კვლავ ელოდება შეერთებული შტატების დელეგაციის ვიზიტს, რაც მათი შეფასებით, ორმხრივი ურთიერთობის გააქტიურების პერსპექტივას უკავშირდება, ვიზიტის ზუსტი დეტალები და ჯგუფის შემადგენლობა ჯერჯერობით არ გასაჯაროებულა, თუმცა, "ოცნებაში" მიაჩნიათ, რომ შეხვედრები ურთიერთობის ახალი ფურცლიდან დაწყებას ხელს შეუწყობს.

ისრაელის პრემიერ-მინისტრმა ბენიამინ ნეთანიაჰუმ თურქეთის პრეზიდენტი რეჯეფ თაიფ ერდოღანი გააკრიტიკა და „იქსზე" დაწერა, რომ ერდოღანი მხარს უჭერს ირანის რეჟიმს და ქურთებს ხოცავს. „ჩემი ხელმძღვანელობით, ისრაელი გააგრძელებს ბრძოლას ირანის ტერორისტულ რეჟიმთან და მის მოკავშირეებთან; მაშინ როცა ერდოღანი მხარს უჭერს მათ და ხოცავს საკუთარ ქურთ მოქალაქეებს",- წერს ნეთანიაჰუ.

რომის პაპმა ლეომ განაცხადა, რომ მას ტრამპის ადმინისტრაციის „შიში არ აქვს" და ომის წინააღმდეგ საჯაროდ გამოსვლას გააგრძელებს. ეს განცხადება მან მას შემდეგ გაავრცელა, რაც აშშ-ის პრეზიდენტმა ირანთან დაკავშირებული მისი პოზიციის გამო უჩვეულოდ მწვავე კრიტიკა გამოთქვა.

12 აპრილის არჩევნებით უნგრეთში ვიქტორ ორბანის 16-წლიანი მმართველობა დასრულდა, პეტერ მადიარის "ტისა"-მ 15%-იანი სხვაობით დაამარცხა "ფიდესი" და საპარლამენტო უმრავლესობა მოიპოვა. ორბანმა კი მთავარ კონკურენტს არჩევნებში გამარჯვება მიულოცა და მარცხი აღიარა.

აშშ-ის პრეზიდენტის, დონალდ ტრამპის მიერ ირანის პორტების ბლოკადის გამოცხადებამ და ჰორმუზის სრუტის გარშემო მზარდმა სამხედრო და დიპლომატიურმა დაპირისპირებამ გლობალური ენერგეტიკული ბაზრები და საერთაშორისო პოლიტიკა ერთდროულად ააფეთქა - ნავთობის ფასი 100 დოლარს გადასცდა, ბაზრებზე ვარდნა დაფიქსირდა, ხოლო მსხვილი სახელმწიფოები და ნავთობის ტრანსპორტირების კომპანიები შესაძლო ესკალაციისთვის ემზადებიან.

უკრაინის პრეზიდენტის ვოლოდიმირ ზელენსკის წინადადებას აღდგომის დღესასწაულზე ცეცხლის შეწყვეტასთან დაკავშირებით აქვს შანსი, რომ განხორციელდეს - უკრაინელები იმსახურებენ ტერორისგან თავისუფალ სადღესასწაულო დღეს, - ამის შესახებ უკრაინის საგარეო საქმეთა მინისტრი, ანდრეი სიბიგა სოციალურ ქსელში წერს.

პრეზიდენტმა დონალდ ტრამპმა განაცხადა, რომ ჰორმუზის სრუტის გახსნა „საკმაოდ მალე" არის მოსალოდნელი, თუმცა, აღნიშნა, რომ პროცესი მარტივი არ იქნება და საერთაშორისო ჩართულობას საჭიროებს. მისი თქმით, რამდენიმე ქვეყანა მზად არის დახმარებისთვის, პარალელურად კი ვაშინგტონი ირანთან მოლაპარაკების ფონზე კონფლიქტის დასრულების გზებს განიხილავს.

ბრიუსელში 21 აპრილს დაგემილ ევროკავშირის საგარეო საქმეთა მინისტრების შეხვედრაზე, სხვა მნიშვნელოვან საკითხებთან ერთად, საქართველოში არსებული ვითარებაც ერთ-ერთ მთავარ განსახილველ თემად არის დასახელებული. დღის წესრიგში აღნიშნულია, რომ მინისტრები „აზრებს გაცვლიან სამხრეთ კავკასიაზე, განსაკუთრებული ფოკუსით სომხეთ-აზერბაიჯანის ურთიერთობებზე... და საქართველოში არსებულ ვითარებაზე."