პარლამენტის თავმჯდომარე შალვა პაპუაშვილმა სტამბოლში, ჟურნალისტებთან რეგიონულ პოლიტიკაზე ისაუბრა, სამხრეთკავკასიელი მეზობლები შეაქო, ოპოზიციის ქმედებებს „სამარცხვინო" უწოდა, ევროკავშირზე საუბრისას კი აღნიშნა, რომ „ბრიუსელი იქცა დამაბრკოლებელ ფაქტორად, მისი ფილტრით ვრცელდება საქართველოს შესახებ არასწორი ინფორმაცია, ამიტომ არის მნიშვნელოვანი ორმხრივი კომუნიკაცია".

მოსკოვმა უკვე ღიად განაცხადა, რომ საქართველოს ევროკავშირში გაწევრიანებას ეწინააღმდეგება. აქამდე თუ საუბარი იყო მხოლოდ ნატოზე, ახლა რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ თქვა, რომ ეს „მძიმე დარტყმას" მიაყენებს საქართველოს სავაჭრო ურთიერთობებს რუსეთთან და მოსკოვს მოუწევს ის „არამეგობრული ქვეყნების" სიაში შეიყვანოს.

გერმანიის საგარეო უწყების ოფიციალურ ვებ-გვერდზე საქართველოსთან დაკავშირებულ ინფორმაციაზე პრეზიდენტად კვლავ სალომე ზურაბიშვილია მოიხსენიებული, ხოლო ილია დარჩიაშვილი საგარეო საქმეთა მინისტრად, მაშინ, როდესაც ისინი უკვე დიდი ხანია ამ პოსტებზე აღარ არიან. საქართველოს ხელისუფლებამ გერმანიას ორი ნოტა გაუგზავნა, თუმცა როგორც საგარეო საქმეთა მინისტრი ამბობს, ქართული მხარის მოთხოვნებს სათანადო რეაქცია არ მოჰყოლია.

მას შემდეგ, რაც უნგრეთის საპარლამენტო არჩევნებში პეტერ მადიარის „ტისამ“ გაიმარჯვა, ბუნებრივია, ახალი პარლამენტი პრემიერ-მინისტრად ამ პარტიის ლიდერს დაამტკიცებს. ამ ფონზე, საინტერესოა, რა ბედი ელის შავი ზღვის წყალქვეშა კაბელის პროექტს, რომლის შესახებ გაფორმებულ მემორანდუმზე უნგრეთიც ერთ-ერთი ხელმომწერია საქართველოს, აზერბაიჯანს და რუმინეთთან ერთად. ენერგეტიკოსების განცხადებით, მნიშვნელობა არ აქვს, უნგრეთის პრემიერ-მინისტრი ორბანი იქნება, თუ მადიარი, შავი ზღვის წყალქვეშა კაბელის პროექტს არავითარი საფრთხე არ ემუქრება და ჩვეულებრივად გაგრძელდება. 

პოლონეთის საგარეო საქმეთა მინისტრმა რადოსლავ სიკორსკიმ განაცხადა, რომ ვარშავა უკრაინის ევროკავშირში დაჩქარებული გაწევრიანების იდეას არ უჭერს მხარს და ამ პოზიციაში უნგრეთის მომავალ პრემიერ-მინისტრ პეტერ მაგიარსაც ეთანხმება. მისი თქმით, კიევმა უნდა გაიაროს სრული ინტეგრაციული პროცესი და დააკმაყოფილოს ყველა კრიტერიუმი, მიუხედავად იმისა, რომ უკრაინა 2027 წელს წევრობაზე აკეთებს აქცენტს.

ოპოზიციაში ამბობენ, რომ დასავლელი პარტნიორების კრიტიკა, განსაკუთრებით დემოკრატიისა და ადამიანის უფლებების საკითხებზე, მიუთითებს საქართველოს ხელისუფლებისგან დისტანცირებაზე, რაც თანდათან „ქართულ ოცნებას" საერთაშორისო იზოლაციაში აქცევს. თუმცა თავად „ოცნებაში" ამ მხრივ გარღვევად აფასებენ ბოლოდროინდელ ვიზიტებს, შეხვედრებს, თუ სხვა ტიპის კომუნიკაციებს დასავლურ ქვეყნებთან, თუ ლიდერებთან.

არ არის გამორიცხული, რომ აშშ-მა და ირანმა ცეცხლის შეწყვეტის დრო კიდევ ორი კვირით გაახანგრძლივონ. ინფორმაციას საერთაშორისო გამოცემა „ბლუმბერგი“ ავრცელებს, საკუთარ წყაროებზე დაყრდნობით და ვინაიდან ამ ინფორმაციას ცნობილი ბიზნეს-პლატფორმა ავრცელებს, ფაქტია, რომ აშშ-სა და ირანს შორის კონფლიქტით და ჰორმუზის სრუტის ჩაკეტვით, უკვე მსხვილი ფინანსური კორპორაციებიც დაიღალნენ. ამ პოზიციას იზიარებენ ქართველი ანალიტიკოსები და აცხადებენ, რომ თუ ეს კონფლიქტი გაგრძელდება, გლობალური ეკონომიკური რეცესია გარდაუვალი იქნება.  

რუსეთის თავდაცვის სამინისტრომ გამოაქვეყნა იმ კომპანიების სია ევროპაში, რომლებიც უკრაინისათვის დრონებს ამზადებენ. მოსკოვში აცხადებენ, რომ ეს კომპანიები რუსეთის პოტენციური სამიზნეებია. რას ნიშნავს ეს - რუსეთი რეალურად აპირებს ევროპაზე დარტყმას, თუ უბრალოდ მორიგი ფსიქოლოგიური ზეწოლაა?

ევროსაბჭოს ადამიანის უფლებათა დაცვის კომისარი მაიკლ ოფლაერტი 14-16 აპრილს საქართველოში 3-დღიანი ოფიციალური ვიზიტით იმყოფებოდა, რომლის ფარგლებშიც ხელისუფლების, სამოქალაქო სექტორის წარმომადგენლებსა და სახალხო დამცველს შეხვდა. ასვევ საოკუპაციო ხაზის მიმდებარედ, სოფელ ოძისს ეწვია, მოინახულა სოფელ წეროვანის დევნილთა დასახლება და ადგილზე გაეცნო ოკუპაციის შედეგად შექმნილ ვითარებას. ანალიტიკოსთა შეფასებით, შეხვედრებზე სავარაუდოდ განსახილველი საკითხების ნუსხა საკმაოდ ფართო იქნებოდა და გასცდებოდა ადამიანის უფლებებს.

ოპოზიციის გარკვეულ წრეებში სულ უფრო აქტიურად საუბრობენ, რომ ხელისუფლების დამარცხება არჩევნების გზით შესაძლებელია. ეს თემა ექსპრეზიდენტმა სალომე ზურაბიშვილმა წამოჭრა, რომელიც 2025 წლის ადგილოობრივ არჩევნებზე ღიად გამოდიოდა არჩევნებში ოპოზიციის მონაწილეობის წინააღმდეგ. ახლა მის შეცვლილ პოზიციას იზიარებენ ის პარტიები, რომლებმაც ადგილობრივ არჩევნებში მიიღეს მონაწილეობა - „ლელო - ძლიერი საქართველო" და „გახარია საქართველოსთვის".

მიმდინარე კვირაში "ახალგაზრდა ფინანსისტთა და ბიზნესმენთა ასოციაცია" - აფბამ განცხადება გაავრცელა, საიდანაც ცნობილი ხდება, ნათია ჯანაშია, რომელიც "ბრიტანულ-ქართულ აკადემიის" მინორიტარული წილის (30 %) მფლობელია, ამავე აკადემიის მაჟორიტარ აქციონერს (70%), „საქართველოს განათლების ჯგუფს“ ლონდონის სასამართლოში უჩივის. 

მედიკამენტების გაიაფების საკუთარ რეცეპტს გვთავაზობს „ევროპელი სოციალისტების“ თავმჯდომარე, ვლადიმერ ბოჟაძე. სახელმწიფო ფარმაცევტული ქარხნის შექმნის გზით, მინიმალურ ფასად დამზადდება ყველაზე მეტად მოთხოვნადი მედიკამენტები და შესაბამისად, წამლებიც იაფი იქნება. ყოველ შემთხვევაში, ასეთ გამოსავალს მიაგნო დეპუტატი და როგორც მოსალოდნელი იყო, დარგის სპეციალისტების აზრიც ორად გაიყო: ერთი ნაწილი ფიქრობს, რომ ბოჟაძის ეს იდეა უსუსური განცხადებაა, რადგან ფარმაცევტული ქარხნის აშენებას დიდი კაპიტალდაბანდება სჭირდება. სპეციალისტების მეორე ნაწილი ამ იდეას მიესალმება, რადგან მედიკამენტების გაიაფებასთან ერთად, ამით ადგილობრივი წარმოება განვითარდება.