თბილისში საერთაშორისო სიმპოზიუმი სახელწოდებით - "ღმერთი, სამშობლო, ადამიანი" გაიხსნა. ღონისძიება ეძღვნება საქართველოში ქრისტიანობის სახელმწიფო რელიგიად გამოცხადების 1 700 წლის იუბილეს, მისი მიზანი კი საქართველოს ქრისტიანული მემკვიდრეობის, მისი ისტორიული, კულტურული და სულიერი მნიშვნელობის გააზრება და მსოფლიო ცივილიზაციის განვითარებაში საქართველოს როლის წარმოჩენაა.

ღონისძიება საქართველოს კათოლიკოს-პატრიარქმა, შიო მესამემ გახსნა. მან, სხვა საკითხებთან ერთად, საქართველოს ოკუპირებულ ტერიტორიებზეც გაამახვილა ყურადღება.

"დღეს ჩვენი ფიქრი და ლოცვა განსაკუთრებით მიემართება აფხაზეთსა და ცხინვალის რეგიონში მცხოვრებ ადამიანებს. საქართველოს ამ ძირძველმა ისტორიულმა მხარეებმა, ქრისტეს რწმენითა და სიყვარულით, დედასამშობლოსთან ერთად, მშვიდობით უნდა განაგრძოს არსებობა. უფლის შეწევნით, ეს ასეც იქნება და ჩვენ შორის კვლავ აღდგება ძმური ერთობა და სიყვარული", - განაცხადა პატრიარქმა ღონისძიების გახსნისას.

სიმპოზიუმი რამდენიმე დღე გაგრძელდება და თემატურ სესიებს მოიცავს. მოხსენებით გამოვლენ ქართველი და უცხოელი მეცნიერები, ისტორიკოსები, თეოლოგები, კულტურის მოღვაწეები და სასულიერო პირები.

ღონისძიების გახსნის ღონისძიებას პრეზიდენტი, პრემიერ-მინისტრი და პარლამენტის თავმჯდომარე ესწრებიან.