ბოლო რამდენიმე თვის განმავლობაში, გერმანიამ აზერბაიჯანში ექვსი ოპოზიციონერი აქტივისტი დააბრუნა. ყველა მათგანი პოლიტიკურ თავშესაფარს ითხოვდა და ყველას უარი ეთქვა, - ინფორმაციას BBC ავრცელებს.

„აზერბაიჯანში დეპორტაციის შემდეგ ყველა მათგანს თვალთვალი, დაკავება და დაპატიმრება ელოდა. გერმანიაში დარჩენილი აქტივისტები ამას აპროტესტებენ", - წერს BBC.

თავშესაფარზე უარი უთხრეს და აზერბაიჯანში დააბრუნეს მუთალიმ ორუჯევი, მალიქ რზაევი, ჯაფარ მირზოევი, პუნხან ქერიმლი, ზია იბრაჰიმი და სამირ აშუროვი.

აზერბაიჯანელმა ჟურნალისტმა აფგან მუხთარლიმ, რომელიც გერმანიაში ცხოვრობს, Deutsche Welle-სთან ინტერვიუში თქვა, რომ ექვსივე აზერბაიჯანელი გერმანიაში, პოლიტიკურ საკითხებთან დაკავშირებით, აქტიურობას აგრძელებდა: მათ, აზერბაიჯანში რეპრესიებისა და ადამიანის უფლებების დარღვევის წინააღმდეგ, არაერთხელ მოაწყეს ან მონაწილეობდნენ საპროტესტო აქციებში. ამ აქციებიდან ყველაზე რეზონანსული იყო 2020 წელს 12-დღიანი შიმშილობა გერმანიის კანცლერის ოფისის წინ. მუხთარლის თქმით, „ამის გამო ბაქოს ხელისუფლება გაბრაზდა „ზედმეტად აქტიურ" ემიგრანტებზე, მათ დეპორტაციას მიაღწია და ახლა მათზე შურს იძიებენ".