პარლამენტის საგარეო ურთიერთობათა კომიტეტის თავმჯდომარის მოადგილე მარიამ ლაშხი დონალდ ტრამპის მიმართ ქართული ოპოზიციური სპექტრის მხრიდან კრიტიკას ეხმაურება და აღნიშნავს, რომ ახლა პრორუსულობას უკვე აშშ-ს პრეზიდენტს აბრალებენ.
„ჩვენ თუ ვიყავით „პრორუსულები" აღმოჩნდა, რომ თურმე ტრამპიც „პრორუსული" ყოფილა. სასაცილოა, სატირალი რომ არ იყოს იმიტომ, რომ შინაარსისგან დაცლილი, გაანალიზებისგან დაცლილი მსჯელობები მათი ხელწერაა, პირადი შეურაცხყოფებიც მათი ხელწერაა და არც ახალია მათი მხრიდან", - განაცხადა ლაშხმა.
დონალდ ტრამპი ქართული ოპოზიციური სპექტრის კრიტიკის ობიექტია. საპარლამენტო უმრავლესობის წარმომადგენელთა თქმით, შეურაცხმყოფელი და ღიმილის მომგვრელია ოპოზიციონერთა ფერისცვალება, რომლებიც ყველაფერს აკეთებდნენ ტრამპის ინაუგურაციაზე დასასწრებად, თუმცა ანტიამერიკულ ნარატივზე მას შემდეგ გადავიდნენ, რაც შეერთებული შტატების პრეზიდენტმა მათთვის არახელსაყრელი განცხადებები გააკეთა.