პარლამენტის იურიდიულ საკითხთა კომიტეტის თავმჯდომარის პირველი მოადგილე, თორნიკე ჭეიშვილი მედიასთან პარლამენტის დროებითი საგამოძიებო კომისიის გასული კვირის მუშაობას აფასებს. მისი თქმით, 2008 წლის ომის თემაზე გამოკითხვებით წარმოჩინდა, რომ მაშინ პოლიტიკური ლიდერების მხრიდან საქართველოს მოქალაქის სიცოცხლეს სამწუხაროდ ჩალის ფასი ჰქონდა.

„უკვე სისტემურად დასტურდება ის ანტიეროვნული, ანტისახელმწიფოებრივი ქმედებები, რომელიც მათ მთელი იმ წლების განმავლობაში, რომელიც უკავშირდება „ნაცმოძრაობის“ რეჟიმს და შემდგომაც, განახორციელეს ისევ და ისევ საქართველოს წინააღმდეგ. კონკრეტულად ის თემები, რომელიც იყო მიმოხილული გასული კვირის განმავლობაში, ჩვენ ვნახეთ რიტორიკა და ნარატივი, რომელიც წარმოაჩენს, რომ მაშინ პოლიტიკური ლიდერების მხრიდან საქართველოს მოქალაქის სიცოცხლეს სამწუხაროდ ჩალის ფასი ჰქონდა და მხოლოდ და მხოლოდ საკუთარი პოლიტიკური პიარისთვის ცდილობდნენ ამ ომის გამოყენებას“, - აღნიშნა თორნიკე ჭეიშვილმა.

„ნაციონალური მოძრაობის“ რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებითი საგამოძიებო კომისია პარლამენტში საქმიანობას განაგრძობს.