აშშ-ის სახელმწიფო დეპარტამენტი დღეს სტამბოლში გამართულ რუსულ-ამერიკულ მოლაპარაკებებთან დაკავშირებით განცხადებას ავრცელებს.

უწყების ცნობით, სახელმწიფო მდივნის თანაშემწის მოადგილის, სონატა კოულტერის ხელმძღვანელობით შეერთებული შტატების დელეგაცია შეხვდა რუსულ დელეგაციას, რომელსაც ელჩი ალექსანდრ დარჩიევი ხელმძღვანელობდა.

როგორც სახელმწიფო დეპარტამენტი აღნიშნავს, სახელმწიფო მდივან რუბიოს რუს კოლეგასთან შეთანხმების შემდეგ კონსულტაციების მეორე რაუნდი იყო. პირველი რაუნდი 27 თებერვალს გაიმართა.

„27 თებერვლის შეხვედრაზე ჩამოყალიბებული კონსტრუქციული მიდგომის გათვალისწინებით, აშშ-ის და რუსეთის დელეგაციებმა გაცვალეს ნოტები, რათა მიღწეულ იქნას ურთიერთგაგება რუსეთისა და აშშ-ის ორმხრივი მისიებისთვის დიპლომატიური საბანკო საქმიანობის სტაბილურობის უზრუნველსაყოფად. შეერთებულმა შტატებმა გაიმეორა შეშფოთება რუსეთის ფედერაციის პოლიტიკის შესახებ, რომელიც კრძალავს ადგილობრივი პერსონალის დასაქმებას, რაც არის მთავარი დაბრკოლება მოსკოვში აშშ-ის საელჩოში პერსონალის დაკომპლექტების სტაბილური და მდგრადი დონის შესანარჩუნებლად. მდივნის თანაშემწის მოადგილე კოულტერმა და ელჩმა დარჩიევმა განიხილეს უახლოეს პერიოდში ამ საკითხებზე შემდგომი შეხვედრის გამართვა, საჭიროებისამებრ, თარიღის, ადგილის და წარმომადგენელთა ვინაობას მომავალში განსაზღვრით“, – ნათქვამია განცხადებაში.