დილიდან ხალხმრავლობაა მუხათგვერდის ძმათა სასაფლაოზე - გმირებს პატივს მიაგებენ, მათ ისტორიებს კი ოჯახის წევრები ჰყვებიან.

"გიორგი აიყვანეს ტყვედ 8 აგვისტოს და შემდეგ, როგორც ვიცი, 9 აგვისტოს არის დაღუპული. დროშას არ დაადგა ფეხი, [უთხრეს] მიწას აკოცეო და არ აკოცა. გიორგი ყოველთვის ასე იზამდა. წლებთან ერთად მონატრება და ცრემლები გროვდება, არაფერი არ იცვლება, პირიქით, ყველაფერი უფრო მძიმე ხდება. 8 აგვისტო განსაკუთრებით მძიმეა," - აღნიშნა გიორგი ანწუხელიძის მეუღლემ, მაკა ჩიკვილაძემ.

"ბათუმის 24-ე ბრიგადაში მსახურობდა ჩემი ძმა. უყვარდა საკუთარი ქვეყანა და შეეწირა საქართველოს სიყვარულს. ომი არ ინდობს არავის, არც დიდს, არც პატარას და არც მოხუცს. დედებს მადლობას ვუხდი ასეთი შვილების აღზრდისთვის," - განაცხადა სერჟანტ ზურაბ ნაჭყებიას ძმამ, რევაზ ნაჭყებიამ.

რუსეთ-საქართველოს ომის დაწყებიდან 17 წელი გავიდა. 400-ზე მეტი დაღუპული, 2 000-ზე მეტი დაჭრილი და იძულებით გადაადგილებული 10 000-ით ადამიანი - ეს რუსეთის აგრესიის შედეგია. 5-დღიანი საბრძოლო მოქმედებები მხოლოდ საერთაშორისო თანამეგობრობის გააქტიურების შედეგად შეწყდა- 2008 წლის აგვისტოში ოკუპანტებმა 50-ზე მეტი სოფელი გაანადგურეს. ამ დრომდე, რუსი სამხედროები აკონტროლებენ 100-ზე მეტ ქართულ სოფელს. საქართველოს მოქალაქეებს მავთულხლართები და სხვა ხელოვნური ბარიერები ყოფს.