ჩვენ დავაანონსეთ, რომ ის ადამიანები, რომლებიც საპროტესტო მუხტს ღალატობენ, მიდიან არათუ „ქოცების“ წინააღმდეგ, არამედ საკუთარი ამომრჩევლის წინააღმდეგ, – ამის შესახებ „ნაციონალური მოძრაობის“ წევრმა, ირაკლი ფავლენიშვილმა განაცხადა.
მისი თქმით, აღნიშნული პარტიები თვითდაზიანების რეჟიმში არიან.
„ნეიტრალურ კანდიდატზე საუბარი ჩვენთვის საინტერესო არ გახლავთ. ეს ხალხი არაადეკვატურ და თვითდამაზიანებელ პროცესში შედიოდა, წინასწარ იყო ცხადი. რუსთაველის საზოგადოება არის ამ აქციის ორგანიზატორი, ჩვენ სრულიად სოლიდარულები ვართ, რადგან გვგონია, რომ მშვიდობიანი რევოლუციის გარეშე ამ ქვეყანაში არაფერი გამოვა. თბილისის გამოგლეჯა და ასეთი ტაქტიკა ძალიან არაადეკვატური და ირონიული გახლავთ აბსოლუტური უმრავლესობისთვის, რომლებსაც არჩევნები გაუქმებული აქვთ. ეს ხალხი ცდილობს, იყოს ივანიშვილის სისტემური ოპოზიცია. როცა ქვეყანაში ინსტიტუციები არ არსებობს, არჩევნები გაუქმებულია, დიქტატურა მყარდება, მშვიდობიანი პროტესტის ალტერნატივა არ არსებობს. ეს ყველას კარგად ესმის, გარდა იმ ოპოზიციური პარტიებისა, რომლებსაც ამის თავი არ აქვს. ისინი ამჯობინებენ იყვნენ სისტემური ოპოზიცია და არა რეალური. ეს უფრო მეტ რისკებს და საფრთხეს უკავშირდება“, – განაცხადა ფავლენიშვილმა.