4 ოქტომბერი და მშვიდობიანი რევოლუციის მოწყობა ისევ განხილვის ეპიცენტრშია. რუსთაველის გამზირის ლიდერი პაატა ბურჭულაძე ამ დღეს ეროვნული კრების გამართვას აანონსებს და ხალხს რუსთაველზე გამოსვლისკენ მოუწოდებს. მმართველი პარტიის რიტორიკა უცვლელია: ამბობენ, რომ მშვიდობიანი რევოლუცია არ არსებობს და ვინც კანონის წინააღმდეგ წავა, მკაცრად დაისჯება.

„არ არსებობს დღეს ადამიანი, რომელიც არ გრძნობს, რომ ცვლილებები გარდაუვალია", - განაცხადა მოძრაობა „რუსთაველის გამზირის" ლიდერმა, პაატა ბურჭულაძემ.

მისი თქმით, 4 ოქტომბერს რუსთაველის გამზირზე გაიმართება ეროვნული კრება, რომელზეც გადაწყვეტენ, რომ საქართველო ეკუთვნის ქართველ ხალხს.

„არ არსებობს ორი საქართველო, არის ერთიანი, ძლიერი საქართველო. არ არსებობს დღეს ადამიანი, რომელსაც არ აქვს პროტესტის გრძნობა, რომელიც არ გრძნობს, რომ ცვლილებები გარდაუვალია. არ არსებობს ღირსეული ადამიანი, რომელიც არ ხედავს, რამდენი უდანაშაულო ადამიანი ზის ციხეში და როგორ გვიყალბებენ ჩვენს ისტორიას. დღეს აქ შევიკრიბეთ სხვადასხვა პროფესიის ადამიანები.

„მე დაგპირდით, რომ გავაერთიანებდით ხალხს. ერთიანობა საჭიროა და შესაძლებელიც. ჩვენ, ყველანი - პროფესორ-მასწავლებლები, ექიმები, ჟურნალისტები, პოლიტიკოსები, სტუდენტები, სპორტსმენები - ერთად ვდგავართ და გეუბნებით თქვენ, ვინც დღეს მიხვდით, რა მავნებელია „ქართული ოცნება": ნუ მოგერიდებათ, ნუ შეგეშინდებათ, გადმოდით. გელოდებით 4 ოქტომბერს, 16:00 საათზე, რუსთაველზე. ჩავატარებთ ეროვნულ კრებას, სადაც გადავწყვეტთ, რომ ქვეყანა გვეკუთვნის ჩვენ, ქართველ ხალხს. დავიცვათ ჩვენი თავისუფლება, ღირსება და ჩვენი დროშა", - განაცხადა ბურჭულაძემ.

ენმ-ს წევრი იგორ ნარმანია ამბობს, რომ 4 ოქტომბერს არგამოსვლა პირდაპირი დანაშაულია:

„4 ოქტომბერი არის ბუნებრივად ისეთი დღე, როდესაც ქართველი ხალხი უნდა გამოვიდეს, რადგან ბიძინა ივანიშვილმა სპეცოპერაცია დანიშნა. მესმის, რომ ბევრი ადამიანი შეიძლება ნიჰილისტურად იყოს განწყობილი, თუმცა 4 ოქტომბერს არგამოსვლა პირდაპირი დანაშაულია", - აღნიშნა მან.

პოლიტიკური ოპონენტები აცხადებენ, რომ ზოგი პოლიტიკური ძალა, რომელიც მშვიდობიან რევოლუციას აანონსებს, რეალურად იარაღით დამხობას გეგმავს.

„მშვიდობიანი რევოლუცია და დამხობა ლექსიკონში არ არსებობს. მერე რა, რომ ზოგი აქტორი ასეთ ტერმინს არ იყენებს - ბევრ ფენომენს მალავს, მაგრამ რეალურად მშვიდობიანი დამხობა უნდათ იარაღით. თუ არის დამხობა და იარაღი, იქ მშვიდობა როგორ შეიძლება იყოს? ამას ქართველი ხალხი პასუხს გასცემს. ეს არის ძალადობრივი აქციები, რევოლუციური პროცესები, რომელსაც ბევრი პოლიტიკოსი არ უარყოფს. ისინი ზუსტად იციან, რომ არჩევნებს ვერ იგებენ და ხელისუფლების უკანონო შეცვლა სურთ, რაზეც, სამწუხაროდ, უცხოეთიდან მხარდაჭერა აქვთ", - განაცხადა „ხალხის ძალის" დეპუტატმა გურამ მაჭარაშვილმა.

შეგახსენებთ, პაატა ბურჭულაძეს თანამოაზრე მშვიდობიანი რევოლუციის მოწყობის იდეაში ენმ-ს ლიდერი ლევან ხაბეიშვილიცაა, რომელიც ბოლო კვირებია 4 ოქტომბრის აქციაზე საუბრობს.

„სახელები და გვარები ყველაფერს გვეუბნებიან"

მმართველ პარტიაში აცხადებენ, რომ ქვეყანაში არეულობის მცდელობას არ დაუშვებენ.

„ბურჭულაძე და ხაბეიშვილი საოცარი „პარაა", ზიტა და გიტა. არავის მივცემთ საშუალებას, რომ ქვეყანაში რაიმე არეულობა მოაწყოს", - განაცხადა თბილისის მერმა კახა კალაძემ.

კალაძის თქმით, ვინც კანონის წინააღმდეგ წავა, მკაცრად დაისჯება. „ოპოზიცია კარგად იცის, რა ხდება ქვეყანაში. მათ არანაირი შანსი არ აქვთ საზოგადოებაში მხარდაჭერის მოპოვების. „ქართული ოცნება" ყველა ოლქსა და მუნიციპალიტეტში გაიმარჯვებს, როგორც მერების, ასევე საკრებულოების არჩევნებში", - აღნიშნა მან.

პრემიერი ირაკლი კობახიძეც გამოეხმაურა ბურჭულაძის მოწოდებას:

„მშვიდობიან დამხობაზე საუბარი რადიკალური ოპოზიციის სახეს აჩვენებს. სახელები და გვარები ყველაფერს გვეუბნებიან. ეს აჩვენებს მათ სულისკვეთებას და დამოკიდებულებას. სახელმწიფო დგას თავის ადგილზე და არავის მისცემს არც მშვიდობიანი, არც არამშვიდობიანი დამხობის საშუალებას. როგორც ვპირდებოდით საზოგადოებას მთელი ამ წლების მანძილზე, რომ ამის საშუალებას არავის მივცემდით და ვასრულებდით ამ პირობას, ასევე ვპირდებით ახლაც და ამ პირობასაც აუცილებლად შევასრულებთ", - განაცხადა კობახიძემ.