თბილისში დატრიალებულმა ტრაგედიამ მთელი ქვეყანა შეძრა. სასტიკად არის მოკლული 26 წლის მასწავლებელი გიგა ავალიანი. მას გიგა ავალიანს საცხოვრებელ სახლთან დახვდნენ და თავის არეში მძიმე დაზიანება მიაყენეს. შემთხვევა პირველ ოქტომბერს მოხდა. მას შემდეგ ახალგაზრდა კლინიკაში, კომატოზურ მდგომარეობაში იმყოფებოდა. სოციალურ ქსელში მის დასახმარებლად ჯგუფიც შეიქმნა, სადაც უამრავი ადამიანი გაწევრიანდა. სამწუხაროდ ახალგაზრდას გადარჩენა ვერ მოხერხდა. ის დღეს დაიღუპა.
არსებული ინფორმაციით, ავალიანს სადარბაზოსთან რამდენიმე არასრულწლოვანი დახვდა, მათ შორის 16 წლის გოგო. დანაშაულის სავარაუდო მოტივად ეჭვიანობა სახელდება. მოკლული ბიჭის დედა წერს, რომ 16 წლის ნია ი-მ შეყვარებული "გიგასთან მიმოწერით აეჭვიანა", რასაც ქალის თქმით, ჩასაფრება და მკვლელობა მოჰყვა.
მომხდართან დაკავშირებით გამოძიება სსკ-ის 117-ე მუხლით დაიწყო, რაც ჯანმრთელობის განზრახ მძიმე დაზიანებას გულისხმობს. საქმესთან დაკავშირებით სამართალდამცავებმა არასრულწლოვანი ა.გ. დააკავეს.
უმძიმესია მოკლული ბიჭის დედის ვიდეომიმართვა:
"გაავრცელეთ, 16-17 წლის ბავშვებმა მომიკლეს შვილი, თუ არ დაიჭირეს, ხვალ თქვენ შვილებს მოკლავენ. ჯგუფურად მოკლეს. შეცვალეთ კანონები, მკვლელები არიან არასრულწლოვნები" - ამბობს მიმართვაში ეკა კუპრაძე მომხდარი ტრაგედიის შემდეგ.
გიგა ავალიანზე წარსულში საუბარი უჭირთ მის ახლობლებს. გვიყვებიან, რომ ახალგაზრდას დიდი მომავალი ჰქონდა, მუშაობდა მასწავლებლად, ასევე სწავლობდა სამედიცინოზე და ექიმობაზე ოცნებობდა. სოციალურ ქსელში საზარელ შემთხვევას უამრავი გამოხმაურება მოჰყვა:
"სამმა არასრულწლოვანმა სიცოცხლე წაართვა ჩემს მასწავლებელს - გიგას, რომელიც ჭკვიანი, ნიჭიერი და კეთილი ადამიანი იყო".
"შემზარავი ტრაგედია დატრიალდა, უაღრესად განათლებული, მომავალი ექიმი გამოგვაკლდა, ჩვენ ხელში გაზრდილი ვაჟკაცი, ჩვენი გიგა ავალიანი... ჩვენს ეკას რამდენი რამ გადახდა თავს, მაგრამ მაინც მედგრად ედგა თავის შვილებს, დააფრთიანა, გამოზარდა საუკეთესო ვაჟკაცები. ახლა კი რაღაა მისი სიცოცხლე... გული მიკვდება მისი ჯავრით".
ambebi.ge