28 ნოემბრის ე.წ. საწლისთავო აქციით პროტესტი არ დასრულებულა, კვლავ გრძელდება და როგორც პროტესტანტები აცხადებენ, გაჩერებას არ აპირებენ, მათ შორის დაანონსეს რეგიონებში გაშლაც. ანალიტიკოსთა შეფასებით, პარასკევის აქციაზე ოპოზიციონერთა გამოსვლებში სიახლე არაფერი არ იყო და თუ ასე გაგრძელდა ყოველგვარი სტრატრეგიის გარეშე, შედეგზე ვერ გავა.

როგორც ცნობილია, პარასკევს 28 ნოემბერს გააპროტესტეს პრემიერ-მინისტრ ირაკლი კობახიძის ერთი წლის წინანდელი განცხადება, რომ მომდევნო ოთხი წლის განმავლობაში აღარ დააყენებდნენ ქვეყნის ევროკავშირში გაწევრიანებისთვის საჭირო მოლაპარაკებების გახსნის საკითხს.

"ოცნების" მტკიცებით, ბრიუსელთან შეთანხმდა მანიფესტი, რომელიც ოპოზიციას 28 ნოემბრის აქციაზე უნდა წაეკითხა, თუმცა, არ წაიკითხეს და "თავი აარიდეს უხერხულ მდგომარეობაში აღმოჩენას".

რა აჩვენა 28 ნოემბრის აქციამ

ანალიტიკოსი ვახტანგ ძაბირაძე "რეზონანსთან" აცხადებს, რომ აქცია ხალხმრავალი იყო, თუმცა, მეორეს მხრივ ოპოზიციამ ვერ შეძლო მისი მხარდამჭერების გააქტიურება და ეს იქიდან გამომდინარეობს, რომ სიახლე არაფერი აქვთ სტრატეგიის თვალსაზრისით.

"აქცია რომ ხალხმრავალი იქნებოდა, მემგონი ეს ისედაც ნათელი იყო. ერთის მხრივ ოპოზიციური არეალი კი გაიზრადა, მაგრამ მეორეს მხრივ ოპოზიციური ელექტორატის აქტიური ნაწილი ხელშესახებად არ გაზრდილა. ეს პრობლემაა და ახლა ოპოზიციის ამოცანაა, რომ ეს საზოგადოება უფრო გაააქტიუროს და უფრო მიზანსწრაფული გახადოს.

"კარგა ხანია და თითქმის მთელი წელია არ გვინახავს პარტიული ოპოზიციონერები მიკროფონით ხელში რუსთაველზე, უფრო საზოგადოებრივი პროტესტი იყო, მაგრამ რაღაცნაირად გაბედეს. თუმცაღა, სამწუხაროდ ეს გამოსვლები სიახლით არაფრით გამოირჩეოდა - არც ახალი იდეა იყო, არც ტაქტიკურ სვლებზე თქვეს რამე, ისევ ძველი მოწოდებები იყო, რომ ქუჩაში უნდა გამოხვიდე და ეს პროპაგანდა ვერ მუშაობს ისე, როგორც ოპოზიცია ცდილობს, ამიტომ სხვა გზებია მოსაძებნი.

"მოლოდინი იყო, რომ თუ პოლიტიკოსები გამოვიდოდნენ, რაღაც ახალს შესთავაზებდნენ, თუმცა, ახალი არაფერი თქვეს და აქცია დაიშალა. შესაძლოა, ამ აქციას ქვეყნის შიგნით ისეთი რეზონანსი არ ჰქონია, მაგრამ ქვეყნის გარეთ მთელ ამ პროტესტმა დიდი პროგრესი განიცადა და შედეგიც მივიღეთ ის, რომ "ქართული ოცნება" დღემდე ცივილური სამყაროსთვის არალეგიტიმურ ხელისუფლებად რჩება.

ჩვენ გვინდა, რომ იქ პროცესები უფრო ჩქარა წავიდეს, მაგრამ დასავლეთი და დემოკრატია ისეთია, რომ პროცესები არცთუ ჩვენთვის სასურველი სისწრაფით ვითარდება, თუმცა, პრობლემა იციან, ხვდებიან და ამ პოზიციას ინარჩუნებენ.

"გასაგებია, რომ პროტესტი არ გაჩერდება, მაგრამ, როგორც ჩანს, მხოლოდ ეს პროტესტი იმ შედეგს ვერ მოიტანს, თუ არ გააქტიურდება ოპოზიცია და სხვაგვარი იდეურ-სტრატეგიური ფონი არ შეიქმნება. ეს ალბათ ჯერჯერობით რთულია და ამ მხრივ ნაბიჯები არ ჩანს",- განაცხადა ძაბირაძემ.

ანალიტიკოს პეტრე მამრაძის აზრით კი, საპროტესტო მუხტი შემცირდა.

"პროტესტის მუხტი შემცირდა, განსაკუთრებით შემცირდა საორგანზაციო რესურსები",- განაცხადა მამრაძემ.

დაამტებით კითხვაზე, კონკრეტულად რაში გამოიხატება მუხტის შემცირება, მამრაძემ გვითხრა:

"ხალხი იყო თითქმის იგივე, რაც 4 ოქტომბერს იყო, რამდენიმე უცხოელი პროფესიონალი ჟურნალისტი იყო და თქვეს, რომ მაქსიმუმ 4-4.5 ათასამდე იყოო, რაც მილიონნახევრიანი ქალაქისთვის სტატისტიუკური ნულია.

"მეორე მხარე იყო საინტერესო - არავითარი მომზადებული სიტყვები, პროგრამები არ იყო და ძალიან სწრაფად დაიშალნენ. იმდენად სწრაფად, გარშემო საზოგადოება ხუმრობდა, რომ შავი პარასკევია და ეტყობა ყველას მაღაზიაში ეჩქარებაო. ჩემი ნაცნობები ეკითხებოდნენ გარეულები შიგნით, რომ კი მაგრამ, ამით რას მიაღწევთო? დასავლეთი ამას უყურებს და ელოდებაო და უნდა გამოვჩნდეთო.

"სალომე ზურაბიშვილმა ეს მიიწერა, როგორც მისთვის დიდი გამარჯვება. ემზადებოდა, საფრანგეთთან კავშირი ჰქონდა, ფრანგ ჟურნალისტებს ვრცელი ინტერვიუ მისცა და მეორე დღესვე "ლე მონდ"-ში ვრცელი წერილი დაიბეჭდა, მეორე გვერდზე, რაც ძალიან პრესტიჟულია და იქ ნახსენებია, რომ ქართველი ხალხი ფეხზე დგას, არ ნებდება, მომავალი ჩვენია, ჩვენ გავიმარჯვებთ, ევროპული კურსი აღდგენა და ა.შ.

"ეს, ზურაბიშვილის ფსიქიკიდან გამომდინარე, დიდი გამარჯვებაა. ასეთი შედეგებია ვირტუალურ სივრცეში და რეალური არაფერია. მუხტი რასაც ჰქვია და ემოციური განცწყობა ძალიან შემცირებულია, სამწუცხაროდ, არის მარგინალების ჯგუფი, რომლებიც უწმაწური სიტყვებით და შესაბამისი ჟესტიკულაციით ილანძღებიან და ეს არის პროტესტი? ასე უნდა შევიდნენ ევროპაში?",- განაცხადა მამრაძემ "რეზონანსთან".

მმართველი პარტიისა და ოპოზიციის შეფასებები

"ოცნების" დეპუტატი ლევან მაჭავარიანი ამბობს, რომ ოპოზიციას აქციაზე ბრიუსელიდან გამოგზავნილი მანიფესტი უნდა წაეკითხა, თუმცა გადაიფიქრა.

"როგორც ორი კვირის წინ ბრიუსელიდან გამოგზავნილი წერილი ვიხილეთ, რომელიც რადიკალური ოპოზიციის წარმომადგენლებმა სიტყვასიტყვით წაიკითხეს, კვლავ იგივე სცენარი ვნახეთ - ბრიუსელის კაბინეტიდან გამოგზავნილი მანიფესტი; რადგან გამომჟღავნდა, რომ ეს ინფორმაცია უკვე გაჟონილი იყო, თავი აარიდეს ასეთ უხერხულ მდგომარეობაში აღმოჩენას და ამიტომ საერთოდ აღარ წაიკითხეს.

"კარგად გვახსოვს რადიკალური ოპოზიცია წლების განმავლობაში როგორ ლანძღავდა ბატონ ტრამპს, როგორ უწოდებდნენ მას რუსულ პროექტს და ასე შემდეგ და ამ მანიფესტშიც იგივე რიტორიკის გაგრძელებაა, სადაც მითითებულია, თითქოს "დიფ სთეითი" ბატონმა ტრამპმა და "ქართულმა ოცნებამ" ერთად გამოვიგონეთ. უკვე ასეთ აბსურდზე არიან დასულები", - განაცხადა მაჭავარიანმა.

"თავისუფლების მოედანის" ერთ-ერთი ლიდერი ლევან ცუცქირიძე ამბობს, რომ პროტესტი უნდა გაგრძელდეს, როგორც თბილისში რუსთაველზე, ისე სხვა ქალაქებში.

"ამ პროტესტმა მოიტანა პირველ რიგში, ჩვენი შეკავშირება, ჩამოყალიბება სოლიდარულ და მებრძოლ საზოგადოებად, როგორც უკვე ვთქვი, მაგრამ როგორც ვთქვი, "ქართულ ოცნებას" სრულიად აქვს ლეგიტიმაცია დაკარგული, მას აღარ აქვს აღარც დემოკრატიული ლეგიტიმაცია, აღარც საერთაშორისო და აღარც მორალური ლეგიტიმაცია აღარ აქვს, ამიტომ ეს პროტესტი უნდა გაგრძელდეს, როგორც რუსთაველზე, ისე სხვაგან, სხვა ქალაქებში.

"ჩვენ კიდევ უფრო მეტი ადამიანი უნდა მოვიმხროთ ამ პროტესტში. ამ რეჟიმს აღარაფერი დარჩა, რაც მას ამაგრებს შიშია, საზოგადოების გარკვეულ ნაწილში. ეს პროტესტი, ეს გმირული ბრძოლა, სწორედ ამ შიშს ამსხვრევს, საბოლოოდ ეს შიში გატყდება ყველგან",- განაცხადა ცუცქირიძემ.

ცუცქირიძის თქმით, დღეს პროტესტში მყოფ ადამიანებს, პოლიტიკოსებს, არასამთავრობო ორგანიზაციებს უფრო მეტი საერთო აქვთ, ვიდრე განსხვავება, მიუხედავად იმისა, რომ "ქართული ოცნება" ცდილობს, დაანაწევროს.

"ფედერალისტების" ლიდერი გიგა ბოკერია ამბობს, რომ ის წინააღმდეგობა რაც ერთი წელია გრძელდება, არის "სასიცოცხლოდ მნიშვნელოვანი ჩვენი ქვეყნის დამოუკიდებლობისთვის, სახელმწიფოებრიობისა და თავისუფლებისთვის", თუმცა "ჯერ არ არის საკმარისი იმისთვის, რომ რეჟიმი დამარცხდეს".

"აუცილებელი წინაპირობაა, ეს ერთწლიანი წინააღმდეგობა და მრავალათასიანი აქცია იმისთვის, რომ პროტესტი გაიზარდოს იმ ხარისხამდე, იმ რაოდენობამდე, იმ განშრევებამდე, რომელსაც ეს რეჟიმი და ეს სამარცხვინო ლიდერი ივანიშვილი ვერ გაუძლებს, ეს არის ჩვენი და ქართული საზოგადოების ამოცანა.

სხვა ალტერნატივა ქართული სახელმწიფოებრიობის, დამოუკიდებლობის, ქვეყნის თავისუფლებისა და ქვეყნის შიგნით მოქალაქეების თავისუფლების დაცვისა არ არსებობს. ეს რეჟიმი უნდა დამარცხდეს ისე, როგორც ეს მოხდა 30 წლის წინ კომუნისტურ რუსულ საოკუპაციო რეჟიმთან მიმართებით.

"მგონია, რომ პოლიტიკურმა ძალებმა ამ რეპრესიების ფონზე, რა დროსაც ბევრი პოლიტიკოსი, პოლიტიკურ ლიდერი და მოქალაქე ციხეშია, უნდა გააგრძელონ და არსებითად გააუმჯობესონ საკუთარი გზავნილი, რომლითაც საზოგადოების იმ ნაწილს, რომელიც ჯერ არ არის შემოერთებული პროტესტს და ვინც არის, დაანახებენ, რომ განსხვავებების მიუხედავად არსებობს ფუნდამენტურად საერთო მომავლის ხედვის ჩარჩო, რომელიც ამ რეჟიმის დამარცხების შემდეგ ამ ჭაობიდან ქვეყანას ამოიყვანს", - განაცხადა ბოკერიამ.