კარაკასი აშშ-ს პრეზიდენტის გადაწყვეტილებით აღშოთებულია, საერთაშორისო სამართალთან შეუთავსებლად მიიჩნევს დონალდ ტრამპის განცხადებას, რომ ვენესუელას საჰაერო სივრცე დახურულად უნდა ჩაითვალოს. რა მოჰყვება ქვეყნებს შორის დაძაბულ ვითარებას, ამის პროგნოზირება ანალიტიკოსებს უჭირთ, თუმცა, არ გამორიცხავენ, რომ "აშშ მაინც ინტერვენციისკენ გადაიხაროს".

„ამ ტიპის განცხადება წარმოადგენს მტრულ, ცალმხრივ და თვითნებურ ქმედებას. ვენესუელა მოითხოვს თავისი საჰაერო სივრცის პატივისცემას და აფრთხილებს, რომ არ მიიღებს ბრძანებებს, მუქარას ან ჩარევას ნებისმიერი უცხო ძალისგან", - ნათქვამია ვენესუელის მთავრობის განცხადებაში.

აშშ-ის პრეზიდენტმა დონალდ ტრამპმა სოციალურ ქსელში დაწერა, რომ ვენესუელის საჰაერო სივრცე დახურულად უნდა ჩაითვალოს.

„ყველა ავიაკომპანიას, პილოტს, ნარკოდილერს და ადამიანით ვაჭრობაში მყოფ პირს, გთხოვთ, განიხილოთ ვენესუელის საჰაერო სივრცე მთლიანად ჩაკეტილად. გმადლობთ საკითხისადმი თქვენი ყურადღებისთვის", - დაწერა ტრამპმა.

აღსანიშნავია, რომ აშშ-მა "მზეთა კარტელი" უცხოურ ტერორისტულ ორგანიზაციათა სიაში შეიყვანა და ძალაში უკვე 24 ნოემბრიდან შევიდა. რამაც ანალიტიკოსთა შეფასებით, საშუალება მისცა აშშ-ს რომ მადუროზე ზეწოლის ახალი ფორმები გამოიყენოს.

ვაშინგტონის მიხედვით, ტერმინ "მზეთა კარტელში" მოიაზრება ნიკოლას მადუროს მეთაურობით ვენესუელის მთავრობა და სამხედრო მაღალჩინოსნები, რომლებიც კორუფციასთან და ნარკოტრეფიკინგთანაა დაკავშირებული.

„ვენესუელა კატეგორიულად, მტკიცედ და აბსოლუტურად უარყოფს სახელმწიფო დეპარტამენტის მდივნის, მარკო რუბიოს ახალ და "უგუნურ ტყუილს", რომელიც „მზეთა კარტელს" ტერორისტულ ორგანიზაციად აცხადებს... ვენესუელას წინააღმდეგ უკანონო და უსამართლო ინტერვენციის გასამართლებლად", - ნათქვამია ვენესუელის საგარეო საქმეთა სამინისტროს საპასუხო განცხადებაში.

აშშ-ს სახელმწიფო მდივნის განცხადებით, აშშ გამოიყენებს ყველა საშუალებას ეროვნული უსაფრთხოების ინტერესების დასაცავად და ნარკოტერორისტების რესურსებისა და დაფინანსების აღსაკვეთად.

კარიბის ზღვის წყლებში ამერიკული სმახედრო ძალების მნიშვნელოვანი ზრდის ფონზე, პენტაგონმა ნიემბრის შუა რიცხვებში განაცხადა, რომ სამხედრო ოპერაცია დაიწყო "სამხრეთის შუბი".

„ეს მისია დაიცავს ჩვენს სამშობლოს, ჩვენი ნახევარსფეროდან განდევნის ნარკოტერორისტებს და ჩვენს სამშობლოს დაიცავს ნარკოტიკებისგან, რომლებიც ჩვენს ხალხს კლავს", - დაწერა აშშ-ს თავდაცვის მდივანმა პიტ ჰეგსეტმა.

აქვე აღსანიშნავია, რომ ამა წლის ივლისში აშშ-ს ფინანსთა სამინისტრომ კარტელს სანქციები დაუწესა.

"არაა გამორიცხული აშშ ინტერვენციისკენ გადაიხაროს"

თსუ-ს პროფესორი კორნელი კაკაჩია "რეზონანსთან" არ გამორიცხავს, რომ ბოლო მოვლენებიდან გამომდინარე შეერთებული შტატები მაინც ინტერვენციისკენ წავიდეს.

"როგორც ჩანს, არაა გამორიცხული, რომ შეერთებული შტატები მაინც ინტერვენციისკენ გადაიხაროს. თუნდაც ეს ნაბიჯი მიუთითებს იმაზე, რომ ტრამპის ადმინისტრაცია სერიოზულადაა განწყობილი ვენესუელის მიმართ. ცოტა რთულია იმაზე იაუბრო, სცენარები როგორ შეიძლება განვითარდეს, მაგრამ ფაქტია, რომ ბოლო თვეებისა და ბოლო დღეების ნაბიჯების მიხედვით, აშშ ნამდვილად აპირებს რაღაცის გაკეთებას, მაგრამ რას, ეს ამ ეტაპზე რთული სათქმელია.

"ერთ-ერთი მიზანი შეიძლება იყოს მადუროს ხელისუფლებიდან ჩამოცილება, რომელიც აშშ-ს დიდი ხნის სურვილია და თუ აშშ-ს ამის შესაძლებლობა მიეცემა, ბუნებრივია ისინი უარს ამაზე არ იტყვიან",- განაცხადა მან.

კაკაჩიას თქმით, მადუროს ხელისუფლებიდან ჩამოშორებას შესაძლოა დიდი გლობალური ცვლილებები მოჰყვეს.

"ამან შეიძლება ძალიან სერიოზული ცვლილებები გამოიწვიოს, არა მარტო ვენესუელასა და აშშ-ში. გამომდინარე იქიდან, რომ ვენესუელას ნავთობის საკმაოდ დიდი რეზერვები გააჩნია, ეს მნიშვნელოვნად გამოათავისუფლებს იმ ნავთობის ნაკადებს, რომლებსაც აშშ და დასავლეთის ქვეყნები ვერ აკონტროლებდნენ.

"თუ ვენესუელაში ხელისუფლება შეიცვლება და იქ პროდასავლურ-პროამერიკული ლიდერი იქნება, ეს აშშ-სთვის საკმაოდ მნიშვნელოვანი სტრატეგიული გამარჯვება იქნება. ეს ტრამპის იდეოლოგიურო დაპირისპირებაა ისევე, როგორც ირანთან, ის ფიქრობს, რომ ეს მისი პირადი საქმეა. ამასთან, აშშ განსაკუთრებით ყურადღებას აქცევს ლათინო ამერიკის ქვეყნებში საკუთარ გავლენას და ევროპის მიმართ ნაკლებად აქვს სტრატეგიული მიზნები.

"გამომდინარე იქიდან, რომ ვენესუელა მაინც მის გავლენის სფეროში მოიაზრება, ასეთი ანტიამერიკული რეჟიმის იქ ყოფნა, რომელიც აშშ-ს პოტენციურ მოწინააღმდეგეებთან - რუსეთთან და ჩინეთთან მეგობრობს და სტრატეგიული კავშირევბის დამყარებას ცდილობს, ეს ბუნებრივია ტრამპის ადმინისტრაციის გაღიზიანებას იწვევს",- განაცხადა მან.

უნდა ითქვას, რომ სექტემბერში ვენესუელას პრეზიდენტმა ნიკოლას მადურომ განაცხადა, რომ თუ აშშ ვენესუელას თავს დაესხმება, მისი ქვეყანა

"შეიარაღებული ბრძოლისთვის" მზადაა 2.5 მილიონი ჯარისკაცი და ძალოვნები მობილიზებულები ჰყავს. კითხვაზე, რამდენად მოსალოდნელია საქმე ასეთ დაპირისპირებამდე მივიდეს, კაკაჩიამ გვითხრა:

"მივა თუ არა საქმე აქამდე, ეს არავინ არ იცის. ჩვენ არ ვიცით როგორია საზოგადოებრივი აზრის კვლევები, ადგილობრივი მოსახლეობა რამდენად უჭერს მხარს მადუროს, როგორია განწყობები, რამდენია ოპოზიციის პოპულარობა, რამდენად გადაღლილია მადუროს დიქტატურით მოსახლოება და რამდენად მზადაა ქვეყანა ცვლილებებისთვის. თუ ეს ყველაფერი სახეზეა, მაშინ ცვლილებები იქნება, თუ არა და მაშინ გაჭირდება. ადრეც იყო მცდელობები აშშ-ს მხრიდან სხვადასხვა ხელისუფლებების დროს",- განაცხადა მან.

კაკაჩია ამბობს, რომ აშშ-ს ნაფიქრი ექნება და ალბათ რაღაც გეგმები არსებობს, როგორ შეიძლება წავიდეს პროცესები ვენესუელსათან მიმართებით.

"დარწმუნებული ვარ, ამერიკას ნაფიქრი ექნება ამაზე ისევე, როგორც ირანთან დაკავშირებით. ალბათ რაღაც გეგმები არსებობს",- განაცხადა კაკაჩიამ.